الحاجات الصغيرة

انشد يا قلبى غنوتك للجمال
و أرقص فى صدرى من اليمين للشمال
ماهوش بعيد تفضل لبكرة سعيد
ده كل يوم فيه الف الف احتمال
! عجبى
من رباعيات صلاح جاهين

كل يوم اصحى الصبح, حاجات كتير ممكن تعكنن عليا: خنقة الشوارع, زحمة الناس و معاكاساتهم, الحر و التلوث و الدوشة, سخافات الكلية, دكاترة الكلية اللى فاكرين انهم بيدرسوا كمبيوترات, تكتب و تسمع و تستوعب أكبر قدر من المعلومات فى وقت محدود… حاجات تانية كتير بتضايق لو الواحد بيدور على النكد

انا باخد قرار: انا هانبسط النهاردة
أول اما بأقرر كدة, بالاقى نفسى باخد بالى من حاجات صغيرة تبسطنى. حاجات ممكن تعدى على ناس غيرى على انها عادية ما تستاهلش, بس هى ديه الحاجات اللى تفرقلى.

لما اساعد ست عجوزة, فتدعيلى بجد من قلبها
لما بنوتة صغيرة لابسة لبس المدرسة تيجى تقوللى "ممكن اسمع معاكى الأغنية اللى بتسمعيها فى الووكمان" , و نقف انا و هى فى الشارع نسمعها مع بعض
لما مجموعة بنات اعدى من جنبهم, اسمعهم بيقولوا :عسولة اوى
لما أركب المترو و الاقى ولد صغير, الاعبه من بعيد فيضحكلى, و نفضل انا و هو متجاهلين الناس اللى حوالينا, نعمل حركات هبلة لبعض, و نضحك احنا الاتنين, عيال مع بعض.

حاجات كتير صغيرة, بس هى اللى مخلية حياتى حلوة.
هى ديه الحاجات اللى عايزة لما اكبر, افتكرها, و اقع فى حب الدنيا من اول و جديد