الاثنين، نوفمبر ٢١، ٢٠١١

ازاي تساعد ميدان التحرير؟


دعم كل فرد مهم, حتى لو مش قادرين تبقوا معانا في الميدان في طرق كتيرة ممكن تساعدونا بها هناك. هاحاول أجمع هنا كل طرق المساعدة من داخل و خارج الميدان.


1- متطوعين:   
  • محتاجين متطوعين من الأطباء يبقوا متواجدين في المستشفيات الميدانية. في مستشفى في جامع عمر مكرم و مستشفى في كنيسة قصر الدوبارة خلف المجمع. الاتنين بعاد عن خطوط التشابك مع الأمن المركزي. مش كفاية أخصائيين كبار في المستشفيات, محتاجين أطباء في الميدان نفسه لسرعة الاسعافات. محتاجين متطوعين كتير لأن الاصابات و القتلي في تزايد و الأطباء اللي هناك أرهقوا. بالأخص أطباء جراحة, عظام و رمد. 
  • محتاجين متطوعين محامين . أما بتواجدهم عند مشرحة زينهم للمتابعة مع أهالي الشهداء و التأكد من اتخاذ الاجراءات اللازمة لاثبات الاصابات التي أدت للوفاة, او بالتواجد في نيابة قصر النيل - محكمة عابدين للتواجد مع المتظاهرين المقبوض عليهم و الموجه لمعظمهم حتى الان تهم اصاباة و قتل زملاءهم المتظاهرين!!  للتنسيق أتصلوا بجبهة الدفاع عن متظاهري مصر 01220624003  أو التوجه لمركز هشا مبارك للقانون 1ش سوق التوفيقية , الدوا الخامس. خلف دار القضاء العالي- وسط البلد
  • متطوعين عند مشرحة زينهم , يتواجدوا مع أهالي الشهداء لدعمهم معنويا و للتصدي لأاي محاولات من العاملين بالمشرحة لفبركة التقريرات أو التعتيم على الاجراءات
2- التبرع بالدم:

التوجه لمستشفى القصر العيني القديم - مركز الدم 

3-اعاشة و احتياجات للمستشفى الميداني و للشهداء: 

  • أكل نواشف ( بسكوت بالعجوة, بقسماط, .. ) , تمر, موز, لبن, عصائر, مياه, حلاوة, مربى, عيش, معلبات سهل الفتح
  • ماسك و نظارات ماء للوقاية من الغاز المسيل للدموع ( بيتباعوا في محلات الأمن الصناعي ش الجمهورية محطة مترو أحمد عرابي, الماسك ب 13 جنيه )
  • توابيت للمشرحة في زينهم . ممكن تشتروها من  جورج عزيز نهاية شارع الترعة البولاقية شبرا
  • كمامات , بخاخات تنفس فنتولين, هيدرو سيف (يخفف من أعراض الغاز المسيل للدموع) , محلول ملح. محلول جفاف, فولتارين امبولات, ابيكو جل , قطرة نافكون, مراهم حروق.
  • بطاطين و كوفرتات
تابعوا احتياجات المستشفى و الميدان على تويتر على هاشتاج 
تابعوا نقاط تجمع الاعاشة في مناطق مختلفة من القاهرة
المعادي :  01007779965 والاسم أحمد عزب
الزمالك: 01223293958
باقي الأماكن مذكورة هنا 

تابعوا قوائم المقبوض عليهم و الشهداء و المصابين على صفحات
جبهة الدفاع عن متظاهري مصر
مجموعة لا للمحاكمات العسكرية للمدنيين



4- أرقام هامة: أحفظها و ساعد في نشرها 

أرقام المستشفي الميداني  01149900115  01117678422 
0113638828- 01202601079 0113638828

طوارئ مجموعة لا للمحاكمات العسكرية  01002850271




5- نشر حقيقة الأحداث:

كل حد مش قادر يتواجد في الميادين أرجوكو حاولوا تنقول الصورة الحقيقية للأحداث, على الصعيد المحلي ( بين أهلك, صحابك, زملاءك في الشغل, الناس في الشارع,... ) و على الصعيد الدولي ( ترجمة الاخبار و نشرها )

بداية الأحداث: فض اعتصام لمصابي الثورة. الاعتصام كان بقاله أكثر من أسبوع. عدد المعتصمين يوم الجمعة بالليا لم يتعدى ال 200 شخص. الاعتصام بالأساس كان في الجنينة اللي قدام المجمع, و المرور في الميدان كان مفتوح و عادي. نزلت قوات من الأمن المركزي 
بأعداد غفيرة, و فضت الاعتصام بالقوة و تعدت على المصابين. 
أنا قابلت شاب من المعتصمين  رجله مبتورة لأنه كان واخد فيها 12 رصاصة! تفتكروا دول مطلوب منهم يتصرفوا ازاي مع قوات أمن مركزي نازلة بتسحل و تضرب فيهم!
دي صورة حسن السوهاجي, أحد الظباط اللي كانوا بيشرفوا على الضرب بنفسهم. شوفته بنفسي بيمسك ولد و بيرميه في وسط مجموعة عساكر و هم طوحوا فيه ضرب بالهراوات و الرجلين. 
كان بيشتم و هو بيضرب و يقول " سيبونا نشوف شغلنا"

بعدها نزل ميدان التحرير أعداد أكثر للتضامن. و من ساعتها و المعركة مستمرة لم تتوقف الا ساعتين بالظبط صباح اليوم 21 نوفمبر.

المتظاهرين أسلحتهم الأساسية للدفاع عن نفسهم : طوب و اعادة القاء القنابل المسيلة للدموع اللي بتضرب ناحيتنا تجاه الأمن
الأمن استخدم: خرطوش, غاز مسيل للدموع, رصاص مطاط و رصاص حي


المستشفى الميداني - خلف هارديز- اتهاجمت أكثر من مرة بقنابل غاز مسيل للدموع. و امبارح بالليل أقتحموها. و بعد أما تصدى لهم الأطباء و سألوهم اذا كانوا هيعتدوا على أطباء و مرضى, سابوا المستشفى لكن قبل ما يمشوا رموا جواها قنبلة غاز مسيل للدموع!
ملحوظة : المستشفى عالجت 3 جنود من الأمن و سابتهم


فيديو يوضح ضرب المتتظاهرين, و سحل بنات من شعرها, و ضرب شهيد بالعصا على رأسه ( الثانية 58 )






عناصر الداخلية كانت بتضرب في مستوى الرأس و الصدر:
صورة ل 3 من أجمل شباب مصر, فقدوا أعينهم 
مالك مصطفى - مبرمج, ناشط حقوقي و مدون فقد عينه اليمنى
أحمد عبد الفتاح- صحفي بالمصري اليوم 
أحمد حرارة - طيبي أسنان فقد عينه اليمين في 28 يناير, فقد عينه الأخرى 19 نوفمبر




الفيديو ده مصور من ناحية الداخلية في الثانية 38 :
ظابط يوجه عدة طلقات, ثم حوار بينه و بين أخر
-جت في عين الواد
- جت في عين أمه أبن ال ***
-جدع يا باشا




دي صورة الملازم المسؤول عن التصويب في عين الشباب
مصدر الصورة 

يقال ان تم التعرف على صاحب الصورة و ان هو : ملازم أول محمود صبحي الشناوي دفعة 2009 كلية شرطة و دفعى 2005 فرير. لكن لم يتم تأكيد المعلومة

صورة بتوضح جثث شهداءنا ملقاة في وسط القمامة في ميدان التحرير :
مصدر الصورة 

و ده فيديو بيوضح جر أحد الجثث من قبل عناصر من الأمن بمصاحبة مدنيين و القاءه على الجنب مع القمامة





6-المصريين بالخارج: 
و احنا في الميدان مش بنلحق نجمع المادة المصورة اللي خلصت. كل كام ساعة جمعوا فيديوهات و صور و ارفقوهم في تدوينة أو نوت واحدة, مع شرح موجز لأخر التطورات و انشروها.
أرجوكم ده مهم جدا. مهمتكو تسادعونا في نقل حقيقة اللي بيحصل, و مش بس في ميدان التحرير, كل الميادين الأخرى الثائرة

تقدروا كمان تبعتوا لأصدقاءكو و عائلاتكو هنا فلوس على حساباتهم الخاصة  و هم يشتروا الأدوية و الاعاشة اللازمة و يوصلوها

نظموا مظاهرات في أماكن عامة, أرفعوا صور مصابينا و شهداءنا, أعرضوا الفيديوهات في أماكن عامة , أفضحوا العسكر و الأمن و كل المتواطئين

النهاردة بالليل: الليلة 11 م يستضيف يسري فودة على برنامجه "اخر كلام" على قناة أون تي في : مالك مصطفى و أحمد حرارة (فقدوا عينهم للثورة) و أسرة شهيد الأسكندرية "بهاء السنوسي" ... شجع كل حد يتفرج عليهم و يسمع قصصهم 


هناك ٢١ تعليقًا:

samyqaid يقول...

ربنا معنا يا منى مش عارف الناس الى قاعدة بتتفرج عندة دم

غير معرف يقول...

My heart goes out to you. may GOD bless you all

غير معرف يقول...

e7na ma3ako men zaman w e7na men2ol kono 7azereen honak mo7awalah lel2ltifaf 3ala el thawra amalna feko kbeer .e7na ma3ko w allah yonsorko.ento ahl masr sha3b waa3y w shoja3 akeed 7atentesro

jamal nabhan

Ayman El-Sharkawey يقول...

شدوا حيلكم يا ولاد احنا علي اعتاب انتصار مصر تكون حره من حاشية المخلوع

koukawy يقول...

ربنا معاكوا يا مني ... انا مش بقدر انزل بس بعمل اللي بتقولي عليه من نشر الحقائق و جوزي في التحرير برضو بعرف منه و بكتب

غير معرف يقول...

ربنا معاكم يا مني ... اعداد المؤيدين للثورة والرافضين لحكم العسكر بيزيد ... الحقيقة بتتضح والضباب بينقشع ... انتوا اصحاب قضية لا تسعون لأي مصالح شخصية او مادية ... كرامة حرية وعدالة ... ستنتصرون ان شاء الله ... سانشر واعمل كل ما يقرني عليه ربنا

اماني يقول...

انت بنت جدعة بنت ناس جدعة، قابلت جدتك مرة واحدة في حياتي وكانت مقابلة رائعة، استمتعت بقراءة ترجمتها لرواية بنتها، تجربة خيالية. احييك واحي عائلتك، باصلي لكم جميعًا وأكيد هنحاول كل واحد من مكانه وربنا معاكم
أماني

Seif Fikry يقول...

The video u have for "sahl el motazhreen" has proof in :15 of an army officer directly hitting the head of a protestor. The way the protestor fell on the floor looks like he was either dead or seriously injured . The officers face is very clear 3 seconds later

غير معرف يقول...

مطلوب للميدان
شير أو ضع ما يحتاجه الميدان أو نصائح قد تنقذ حياة مصرى
جمع المساعدات الى التحرير الان
اتفقوا هنا على أماكن التسليم من جميع المناطق
http://on.fb.me/TahrirUrgent

غير معرف يقول...

المعلومات عن الظابط صحيحة
وممكن ترجعوا لسجلات المدرسة (الفرير) فى ميدان صلاح الدين - مصر الجديدة

غير معرف يقول...

يا رب انصر المشير .. يا رب انصر الداخليه و احميهم و احرسهم و ساعدهم و سخر اللي يساعدهم .. يا رب ارحم شهداء الجيش و الشرطه و اشف مصابيهم ... و يارب ساعدهم بقوتك و سخرلهم اللي يساعدهم علي الملحدين الشاذين الداعين للتعري و الدافعين البلد الي الخراب و اسقاط النظام و احلال الفوضي ... يا رب انزل عليهم غضبك .. يا رب عذبهم ف الدنيا و ف الاخره .. يا رب زي ما اتحرقوا ف الدنيا يا رب زيدهم من نارك ف الاخره

غير معرف يقول...

بصراحة أنا بدعى برضوا بس بدعى ربنا يفرقكم ياللى فى ميدان التحرير عشان أنتم خاينين و مأجورين ضد بلد حبة الرمل فيها برقابيكم كلكم
سيبوا الناس تبنى البلد لو عندكم دم

غير معرف يقول...

any body still have blood in his body should leave Tahrir because you all are blined and with very boor minds

doesn't know how to build only distroying the country
and you all loosers at the end

غير معرف يقول...

الصورة دى متفبركة يا متعلمين

غير معرف يقول...

الصورة دى متفبركة يا متعلمين

غير معرف يقول...

منى يا منى ربنا معاكى يا منى
بصراحة خليتينى هابكى من نبرتك يا أم منى
الست مكانها فى بيتها بس أنتى يا منى مالكيش بيت عشان كدة بتروحى تتسرمحى فى الميدان اللى لازم يسموه ميدا الخونا
اللى بيخونوا بلدهم مصر

Noha يقول...

ممكن لو سمحتي تفعلي خاصية المشاركة مع مواقع التواصل كنت عايزة انشر المقال على فيس بوك ومش لاقية ايكونة المشاركة

شكرا

غير معرف يقول...

نها,
بصى يا سيتى, خدى كوبى من ال لينك فوق و اعملى بيست بعد كدة فى المكان المخصص للبوستس.
ارجو اكون عرفت افهمك قصدى إيه.
حفظ الله مصر و شبابها الايجابى الرائع.
بصمودكم فى الاعتصام سنحيا كراما بإذن الله.
الله معنا.

غير معرف يقول...

حسبى الله و نعم الوكيل فى كل واحد فى التحرير جيش شعب و شرطة وكل شخص مش حاسس بالبلد وديه مش سلبية بس المفروض يكون فى تفكير اذكى من كده يا بنى ادمين

غير معرف يقول...

God bless u bgad

غير معرف يقول...

actually i just read this 2day and it all came back to me that day was the day when it all started to make sense to me,the videos and yousri fouda's show were like a wake-up call that day i felt that i couldn't bare my silence anymore and the next day i was in tahrir trying to be positive and trying to participate ,normally a person dosn't say such words to strangers but i wanted to let u know that i'm proud of u and that i really look up to u as a girl who went through all what u've been through u impressed me i'm sure that there are alot of ppl that u know and that u don't went through the same from day one which we should also be proud of but just we haven't heard of them anyway i just wanted to shake off el malal el sawry wel 2ekte2ab el kollena 7asein beh :) nada hammad