الأربعاء، يناير ٢٢، ٢٠١٤

جواب من علاء

ده جواب علاء كتبهولنا من السجن يوم 24 ديسمبر 2013. قعدنا أسابيع نتفاوض مع إدارة السجن عشان يسمحولنا نستلمه. في مرحلة ما لما سألنا ليه ما يينفعش ناخد الجواب؟ جالنا الرد "عشان كاتب فيه عن السجن"
فيوز من عقلي ضرب!
حابسينه في زنزانة انفرادي, بيقضي 20 ساعة في اليوم على الأقل تماما لوحده, أياما الاجازات بيمنعوا عنه التريض فممكن توصل لأنه محبوس انفرادي 48 ساعة او حتى 72 ساعة, متوقعين انه اما يكتب جواب هيكتبه عن ايه؟؟ دريم بارك!!!

اترددت قبل ما انشره, اترددت عشان الكلام مستخبي جواه كم غضب و وجع و احباط, و بعدين قررت انشره. دي حقيقة اللحظة اللي احنا عايشينها, ليه أنكرها أو احاول اجملها؟؟ 

كل زيارة بنروح و جوانا هوجة مشاعر: غضب, وجع, قلق من اللي لسة جاي, احباط, وحشة, راحة لوجود العائلة, و حب ... دايما دايما في وسط كل الوجع في طاقة حب فايضة

جواب علاء: 

إلى منى وسناء
وحشني جدا مع إني بشوفكم وأنا محبوس أكتر مما بشوفكم بره. يمكن عشان بره بقدر اتطمن عليكم في أي وقت وببقى متابع وفاهم أخباركم، أما في السجن لازم نقرر هنقضي وقت الزيارة القصير نتكلم في أي أخبار ونقسم الوقت بحرص وطبعا مش هلحق اسمع الأخبار التافهة الللي بتخليكم منى وسناء. خناقات منى على تويتر أو حالات الرومانسية اللي بتركبها، سناء أتفرجت على ماتشات الأهلي ولا لأ ومغامراتها العجيبة اللي بتقع فيها من غير ما تاخد بالها.
يمكن دي أصعب حاجة في الحبس، ان حد يبقى متحكم في وقتك بالشكل ده. لدرجة انك تتحرم حتى من القلق لأن مش هعرف ان خالد خد دور برد غير بعد ما يكون خف. ان حد تاني متحكم في تزامن أحساسنا بنفس الحاجة. يعني مثلا العاصفة الثلجية، وصلني المدد اللي بعتوه عشان البرد بعد ما خلصت خلاص. البلد كلها قعدت 4 أيام بتكلم بعض عن الطقس لكن على ما وصلتولي في الزيارة مكنش متاح لينا غير إني أطمنكم أن عرفنا نتصرف ووضعنا كويس. مش إن نحكي بحماس عن قد أيه الدنيا برد. 

وأنا بلبس كل هدومي فوق بعض وبرص بطاطين فوق بعض فكرت إن فيه ناس في عشش أو في الشارع معاها هدوم أقل وبطاطين أقل. بس بعد أبرد ليلة لما قررت أن لازم أسد شبابيك الزنزانة ثاني يوم ادركت إن حتى المشردين يقدروا يقوموا في أي وقت يختاروه يدوروا على حل للبرد. يمكن يلاقوا ويمكن لأ لكن أحساس إن سلطة ما هي اللي بتقرر ببيروقراطية عشوائية أمتى هيتفتح علي وامتى هلاقي كرتونة أسد بيها الشباك وامتى النبطشي هياخد إذن يجيب سلم ويطلع يسد الشباك يقهر.

أتخيل أنكم بتتعاملوا مع إحساس مشابه وانتم بتدوروا على احتياجاتي وفق لمواصفات السجن. هدوم ثقيلة بيضاء بلا علامات. سمعت إن مها مأمون أضطرت تفك وتركب الجاكيتات من أول وجديد عشان يسمح بها وعلى ما ده تم كانت الحرارة رجعت 20 :-)
ومعرفش مين اللي لف وسط البلد يدور على محل لسة بيبيع راديو موجة واحدة وليه أصلا الهم ده؟
بس كل ده مجرد منغصات بتأكد على فكرة الحبس، ان ارادتك مسلوبة تماماُ وحد متحكم في وقتك وجسمك. المشكلة أنه متحكم في روحي، بيحددلي أشوف منال وخالد أمتى وأبوسهم واحضنهم قد ايه.
والمرعب أكتر إحساس أنه ممكن يقلل، لو أتحكم علي الزيارة هتبقى كل أسبوعين مش كل أسبوع، الجرايد بتتكلم عن تطبيق نظام الزيارة بكابينة زجاجية وتليفون، يعني لو أطبق علي مش هعرف ألمسكم، هتواصل مع خالد إزاي أنا كدة؟
واللي يقهر إن ناس كانت عاقلة أول أمبارح تكتب في الجرايد تحرض على منع زيارات زوجات وأبناء المعتقلين عشان الأخوان ميطلعوش تكليفات وأوامر! كأن المسجون ده مش بشر أصلاٌ.
ولا اللي لسة عاملين فيها عاقلين وقاعدين يكتبوا عن ازاي الحكم على ماهر ودومة وعادل نتيجة للإختيارات السياسية الخاطئة, 6 أبريل وفقدانهم شعبيتهم، كأن أحمد ماهر ده فكرة مجردة أو كأن المحبوس ده شخصية اعتبارية أسمها 6 أبريل مش بني آدم عنده بنت عندها 5 سنين محتاس هو دلوقتي في أنه يشرحلها هو فين وبعيد عنها ليه وهيرجع امتى.

قراءة الجرائد عموماٌ بقيت مستفزة جدا بعكس الحبسات اللي فاتت بس أهي بتضيع وقت. ما هو من نتائج ان غيرك متحكم في وقتك أن يبقى عندك وقت كثير مش عارف تعمل بيه ايه.
ماتتخضوش من كلامي, ظروفنا كويسة ومقارنة بحبسات سابقة احنا في وضع مريح جدا, وفي التريض بنبقي مع بعض ونص اليوم بندردش بالزعيق من بين الزنازين والوقت بيعدي في القراءة.
وبالمفاوضات الأمور بتتحسن, قعدنا اسبوع نتفاوض علي الجرائد والراديو, ادينا اهو بنتفاوض علي الجوابات ووعدونا ان الرسالة دي هتوصلكم وبقالنا اسابيع بنتفاوض علي حق نشر مقالات وعلي دخول تلفزيونات ويمكن في يوم من الأيام يسيبوكم تدخلوا جوابات من الاصدقاء وتوصلنا تلغرافات.
الواحد حاسس إنه صائب عريقات, الحياة تفاوض. الدنيا ماشية بس قهرة النفس وحشة.

يوم ما اقتحموا البيت وقبضوا علي كان خالد عيان ومش عارف ينام، أخدته في حضني ساعة لحد ما نام. وبصراحة اللي مكمل على قهري اني حاسس ان الحبسة دي ملهاش أي قيمة، لا ده نضال ولا فيه ثورة والعالم اللي مقضياها تفاوض رغم أنهم مش محبوسين دول ما يستاهلوش أني اتحرم من ساعة واخد فيها خالد في حضني، الحبسات اللي فاتت كان فيه معنى لأني أتحبس واتماسك، كنت حاسس اني داخل السجن بمزاجي وطالع منه كسبان، دلوقتي حاسس اني مش طايق الناس والبلد وان مفيش اي معنى لحبسي غير بس أنه يحررني من الاحساس بالذنب لعجزي قدام كم الفجر في الظلم والفجر في تبريره.

صحيح أنا لسة عاجز، بس أهو بقيت مظلوم من ضمن المظاليم ومرفوع عني الحرج والذنب. وبصراحة ساعة مع خالد أفيد كتير.
انا اصلا مش بفهم ازاي عارف اعيش من غيره ولا عمري فهمت ازاي بعرف اعيش من غير منال, لما جالنا خبر الضبط والاحضار منال قعدت تحاول تعمل ترتيبات عملية عشان شغلنا ميعطلش وانا اتوترت جدا منها ومن جلسة قعدتها مع ميسرة بحاول اسلمه جانب من شغلي وبتفق معاها مين يشيل باقي المسئوليات, كنت عارف زيها اني هتحبس بس مكنتش عايز او عارف افكر ازاي حياتنا تستمر من غير ما نبقي مع بعض. لكن في الآخر أهي بتستمر مش معنى ان إرادتي وتحكمي في الوقت توقفوا أن الزمن نفسه توقف.

الفكرة مرعبة، قدامي جنايتين وواضح أنهم قرروا أن لازم ناخد أحكام، وواضح أن حال الثورة بائس لدرجة ان ينفع ناخد أحكام يعني الزمن يمكن يفضل واقف عندي وبيتحرك عندكم لسنين يعني خالد هيكبر من غيري، يعني قدامه أدوار برد كثير هينام من غير حضني.
أو يمكن لأ، يمكن هخرج بعد شهر أو شهرين، أو يمكن هخرج بعد ما يخلصوا خارطة الطريق الملعونة بتاعتهم. المسألة بمزاجهم والزمن والوقت تحت تحكمهم.
أنا آسف على الغم، انتم عارفين اني بكره جو أخي انت حر وراء السدود وقد أيه السجن عظيم ومش هيقدر يكسرنا. في كل مرة بتحبس حتة بتتكسر زي ما في كل مرة حد غيرنا بيتحيس ظلم كلنا بينكسر فينا حاجة، زي كل شهيد بيموت الكل بينزف، صحيح أهله وأحبابه بينزفوا اكثر بكثير بس كله بينزف وكله بيدفع الثمن.

أنا كويس قهرة الروح دي انتم عارفين اني كنت عايش معاها بره زي ما أنتم عايشينها وكل يوم فيه خبر يعصر القلب وفيه تخاذل بيكتم النفس أنا بس هنا عندي وقت كثير مش عارف أعمل بيه أيه فمركز مع القهر بزيادة.
أنا بس زهقت, لكن هتعدي زي ما اللي قبلها عدت وهرجع أشوفكم أقل وترجعوا توحشوني أقل عشان منى هتبقى مشغولة بخناقتها وشطحاتها الرومانسية وبالتوفيق ما بين أدوارها الكثير اللي بتتنازعها وسناء هتبقى مشغولة بمشاريعها الكثير الغامضة ومغامراتها الكثير العجيبة من غير ما تاخد بالها أصلاٌ، وأنا هبقى مشغول بمنال وخالد وبأسباب جديدة للغضب والمقاوحة.

بحبكم علاء
سجن ليمان طره 24/12/2013

هناك ٤٥ تعليقًا:

Ahmed Moharram يقول...

ربنا يفك سجنك ..

Rafik Wahid يقول...

! ربنا يفك سجنه و سجن كل المظلومين .. ربنا يقويكم و يهون عليكم الوقت

mostafasaid يقول...

ربنا يفك حبسته

محمد بن خطيب يقول...

ربنا يصبركم

Unknown يقول...
أزال المؤلف هذا التعليق.
Unknown يقول...

ربنا يفك سجنك انت و كل المظلومين

مهاوي يقول...

معليش بس انت ان سجنت لكن الذين في رابعه والنهضه والتي قلت انت والست ولدتك انهم معهم سلاح قدام كمرات التلفزيون ماتو من المسوؤل مين الذي كان سلمي ومات الا لانه ناصر الشرعيه تحمل جزء من الجبس عشان تعرف حكم العسكر حلو على ناس ومر على ناس

عمر زهران يقول...

ربنا يفك سجنك يابو خالد يا جدع ..

Unknown يقول...

مش عارف اقولك قد ايه قلبي اتوجع من رسالة علاء وعندي احساس بالغضب من اللي سجنينه هو وكل المظلومين، ومهما قلت مش هيجي شعرة في اللي انتي ومنال بتحسوا بيه، بجد ربنا يفك سجنه ويصبركم علي غيابه!!

Unknown يقول...

مش عارف أقول إيه
شد حيلك يا شقيق. شدوا حيلكوا يا منى انتي وسناء

Unknown يقول...

ربنا يفك اسره

هو القهر اللى فى الرساله يكفى لسنين
وحسبي الله ونعم الوكيل

امل سعيد يقول...

:) ragl w adha

امل سعيد يقول...

:) ragl w adha

Unknown يقول...

ربنا يفرجها عن قريب

Unknown يقول...

ربنا يفرجها عن قريب

Unknown يقول...

يارب انت على الظالم
يااااااااااااارب انصر المظلومين

Unknown يقول...

كلام من القلب

sohaila يقول...

ربنا عادل وكبير واكيد كل ظالم ليه يوم

نائل جرجس يقول...

طبعا موقف صعب جدا ,لكن بدل ماتشعر بالقهر حاول تعمل دراسات عليا في اي مجال بتحبه ,بدل ماتقرف نفسك بالجرايد

Unknown يقول...

اه... وجعت قلبي... مجرد القراءة حسستني بالقهر...... ربنا معاك ويقويك... وربنا يقصر الايام ان شاء الله وينصرنا عن قريب

Unknown يقول...

لابد من يوم معلوم تترد فيه المظالم ... ربنا يعجل بفرجه عليك وعلى كل اللى زيك..

Unknown يقول...

يا معين اعنهم واعنا نتحمل ظلمهم بلا حول ولا قوه كل اللى قدرنا عليه قاطعنا الاستفتاء لانهم ربطوه بالسيسي وبظلمكم

Unknown يقول...

يا معين اعنهم واعنا نتحمل ظلمهم بلا حول ولا قوه كل اللى قدرنا عليه قاطعنا الاستفتاء لانهم ربطوه بالسيسي وبظلمكم

Unknown يقول...

يا معين اعنهم واعنا نتحمل ظلمهم بلا حول ولا قوه كل اللى قدرنا عليه قاطعنا الاستفتاء لانهم ربطوه بالسيسي وبظلمكم

Unknown يقول...

يا معين اعنهم واعنا نتحمل ظلمهم بلا حول ولا قوه كل اللى قدرنا عليه قاطعنا الاستفتاء لانهم ربطوه بالسيسي وبظلمكم

Taha Sewedy يقول...

ربنا موجود
ربنا يفك سجنه و يهلك الظالم

Taha Sewedy يقول...
أزال المؤلف هذا التعليق.
Unknown يقول...

الكلام مؤلم.. زى الواقع اللى إحنا عايشين فيه.. مؤلم و مليان إحباط.
أنا أسفة على عجزى، أسفة إنى من الناس الكتير اللى نفسهم يعملوا حاجة بس مش عارفين يعملوا ايه..مش فى ايدى غير الدعاء، ربنا يخرجهولنا بالسلامة هو و كل مظلوم
إن شاء الله هييجى يوم السجون تبقى مليانة المجرمين الحقيقين و خالية من اى مظلوم.. طول ما فى ناس بنقاء عيليتكو :) هانت.. أنا أسفة

Unknown يقول...

مش عايزين نقعد نولول و ندعي له واحنا نايمين ببيوتنا.
لازم يخرجوا و نسجن الظلمه المجرمين. .مكمليييين

Unknown يقول...

مش عايزين نقعد نولول و ندعي له واحنا نايمين ببيوتنا.
لازم يخرجوا و نسجن الظلمه المجرمين. .مكمليييين

Unknown يقول...

الفجر في الظلم والفجر في تبريره.... منّه لله الظالم، و منّه لله اللي بيبررله

المسافر يقول...

يا مصر يام الشهيد ....يا تنضفى ..يا تموووتى

Unknown يقول...

ربنا معاه وبكره نور الشمس تطلع

Unknown يقول...

سامحنا بنداري عجزنا و ضعفنا و خلفنا بنسيانك

Unknown يقول...

ربنا يعينك ويقويك...الظالم واحد ومرارة الظلم واحده بس بتتفاوت قوتها..ربنا يعين ويساعد ويصبر كل محبوس ظلم..
أري انك راجل فعلا...ورأيك من دماغك "حتي لو اختلفت معاك في اراء كتير"
بس اعرف ان سبب حبستك دي..انك حر ..
مش بإيدي اصبرك او اشجعك او..او...
بإيد كل واحد بره انه يساعد في رفع الظلم ويدعي للمظلوم الحبيس..لاننا كلنا مظلومين..في بلد فاق فيه الظلم حد المعقول..والقهر يتغني بأن مصر بلده ووطنه..
وحسبنا الله ونعم الوكيل..

Unknown يقول...

ربنا يعينك ويقويك...الظالم واحد ومرارة الظلم واحده بس بتتفاوت قوتها..ربنا يعين ويساعد ويصبر كل محبوس ظلم..
أري انك راجل فعلا...ورأيك من دماغك "حتي لو اختلفت معاك في اراء كتير"
بس اعرف ان سبب حبستك دي..انك حر ..
مش بإيدي اصبرك او اشجعك او..او...
بإيد كل واحد بره انه يساعد في رفع الظلم ويدعي للمظلوم الحبيس..لاننا كلنا مظلومين..في بلد فاق فيه الظلم حد المعقول..والقهر يتغني بأن مصر بلده ووطنه..
وحسبنا الله ونعم الوكيل..

Unknown يقول...

الحرية لأبو خالد ..‏ الحرية للجدعان ‏

Unknown يقول...

بجد وجعتلي قلبي ... ربنا يفك اسرك

Unknown يقول...

الحرية لعلاء و سحقا لسجانه

Unknown يقول...

اللهم فك أسرك سجنك ياعلاء - وترجع لخالد ولبيتك ولمصر

انسان السيدى بِشْر يقول...

بتيقلى علاء ياخد المركز الأول مستريح عن مجمل الأفشخانات اللى عاشها

انسان السيدى بِشْر يقول...
أزال المؤلف هذا التعليق.
Unknown يقول...

http://tatar7.com/ts3/register.php?ref=148

Unknown يقول...

هذا هو حكم العسكر فى كل مكان وزمان خراب خراب خراب
http://zedogamesflash.blogspot.com

Unknown يقول...

شكرا
http://peetk.com