بقالي كتير ما صحيتش على نور الشمس
بقالي كتير ما صحيتش على فراشات بتهمس في ودني و قلب خفيف.
و انا بانزل رجلي من على السرير في دماغي رجلي بتلمس رملة دافية و البحر على بعد خطوتين
الثورة مرهقة
خلاط مشاعر و تجارب. كأني عشت أ كتر من حياة, خبرت الحب و الخسارة و الألم, شفت الموت, و عرفت كل ألوانه. لون الدم و الكفن و لون دموع حد اتخطف منه حبيب في لحظة غدر.
بس برغم كل الوجع ده لسة خيالاتي زي ما هي
حب يغمرني بالزبدة الدافية
عيال كتير تشبهني و تشبهه بتجري حافية على البحر و بتضحك للشمس
معمل استخبى فيه بالساعات و أنا بدندن و باشتغل على مزاجي
قهوة الصبح نتشاركها في حضن دافي زي الشمس
حواديت كتير, و خيالات
برتقان و برقوق و شوكولاتة بيضا و موسيقى و رقص, و مداعبات, جنان و زعيق, دلع و مياصة
كل حاجة ... سعادة و حب بمنتهى الطفاسة
و أهم حاجة, ضحك كتير, ضحك من اللي يزغزغ كل تناتيف جسمنا
صباحكو فل :)
هناك تعليقان (٢):
صباح النور :)
روعة .. كلامك بيطلع نور
إرسال تعليق