الثلاثاء، أكتوبر ٠٩، ٢٠٠٧

فى خيالاتى




جوة دماغى باعيش خيالات
خيالات بتتولد فى لحظات مش محسوبة, تنتوفة صغيرة تخلقلى عالم تانى اضيع فيه بتفاصيله و الوانه و روايحه
اغنية تاخدنى لكف ايدك, لكل خط فيه, امشى طراطيف صوابعى عليه , امسح الخطوط و ارسمهم من اول و جديد, و امضى اخرهم ببوسة
ريحة تاخدنى لصباحية العيد ايام ستى نفيسة الله يرحمها, و خبيز العيش, لحضن عمة ذكرياتى عنها اتوحدت مع احلامى بيها و مابقتش عارفة افصل الحقيقة من الخيال
وجع ياخدنى لكوباية شاى اخضر من ايد مامتك, و لابتسامة من باباك, و دفا فى وسط عيلة انا الصغيرة اللى فيهم
نور الشمس على وشى يفكرنى بجزيرة فى وسط النيل, بولد و بنت, بضحكة و بحب لسة بيتولد جواها

فى خيالاتى انا ماشية حافية على نجيلة مندية , شعرى منعكش و هايش حواليا
عيال كتير بتجرى حواليا,عيالى انا, حافيين و شعرهم ملولو , بيضحكوا للسما و بيسمعوا موسيقى فى دماغهم

فى خيالاتى دايما انت الشمس

هناك ٩ تعليقات:

اسامة يس يقول...

جميلة تلك الخيالات .. المرسومة بخيال خصب... بروح تجعلك تعيشها ... وتود ان تكون ان لم تكن فيها لتكن ظلاً ... جميل ان تسكب السطور المشاعر عذبة ندية طازجة شهيه
....
دمت بكل ود
خالص تحياتي

someone trying not to be alone يقول...

جميلة اوى مدونتك وكل سنة وانتى طيبة
عيد سعيد

بجد البوست فيه احاسيس كلها حلوة اوى


Mahy

غير معرف يقول...

من أجمل الحاجات اللي قريتها هنا
بجد احساسك رقيق جدا
لك تحيتي

FATMA يقول...

خيالاتك هايلة

كل سنة و انتي طيبة

hurricane_x يقول...

This is lovely, so pure and dreamy!

eZz " the junior " يقول...

الرسومات حلوة جداجداجدا

altwati يقول...

الله
نص رائعi

اميرة الرومانسيه يقول...

حلو اوى جو الطبيعه
وانك حاسه انك حره مدونه جميله وتستاهلى كل خير
تقبلى تحياتى
اميره الرومانسيه

Wild at Heart يقول...

البقاء لله يا ماعت