الخميس، مايو 03، 2007

انا بومة و بتهلوس

بقالى كام يوم حالى متشقلب
بقيت عاملة زى البومة
افضل صاحية طول الليل, مش مهم بقى ورايا حاجة اعملها و لا لأ
عينيا بتفضل مفنجلة لحد اما الاقى نور الفجرية ابتدى يتسرب من بين ستاير شباكى, و اسمع صوت العصافير برة


وقتها احس بالتعب بيهدنى. الملم حاجتى , اطفى النور و ادخل السرير احاول انام
و يبتدى الفاصل التانى من شقلبة الحال: الاحلام الغريبة
انا مش باحلم بكوابيس , انا بس باحلم باحلام مليانة ناس و احداث و تفاصيل غريبة
احلام مرهقة جدا, باصحى منها حاسة ان راسى هتفرقع, كأنى كنت فى امتحان كيمياء استمر 4 ساعات

من يومين حلمت بعم دهب و بطوط. حلم طويل و فيه اننا بنتمشى فى سوق و بندور على مطعم نتغدى فيه, و عم دهب عامل نفسه واحد فقير, و قال ايه انا و بطوط ماشيين عمالين نبرطم لبعض
الغريبة ان و انا فى الحلم كنت حاسة انه شئ طبيعى جدا انه يبقى فيه بطوط و دهب, و ابقى باتمشى معاهم

و ياخرابى على الاحلام المريضة اللى بسبب كليتى

حلمت باتى فى المعمل, جهزت النسيج اللى هاشتغل عليه, و اخدت منه حتة و ابتديت اطبق عليه كل الخطوات اللازمة عشان افحصه تحت الميكروسكوب: تثبيت و تجفيف و معالجة و صباغة. خطوات مااعرفش ازاى افتكرتها فى الحلم و انا اصلا مش فاكراها دلوقتى. و رحت اورى الشريحة الازاز و عليها العينة للدكتورة, قامت بكل برود مفعصاها بايدها, و باظ الشغل

طيب ده حلم طبيعى من قلق الامتحانات و شغل المعمل
لكن فيه نوع تانى من الاحلام معايا بقاله سنين, ليه علاقى بدراستى للاحياء, كمان ليه علاقة بانى انا اصلا عقلى اتلحس بخيالاتى
باحلم بشكل رئتى من جوة, و ابقى شايفة رئتى و هما بيتنفخوا و يتملوا هوا مع كل شهيق, و بعدين حجمهم بيصغر بالراحة لما الهوا بيطلع مع الزفير
و لا لما حلمت بمخى...اررررر

من كام يوم حلمت بحلم متعب, و كنت جواه حاسة انى باحلم و عايزة اصحى بس مش عارفة و بعدين صحيت جوة الحلم و ابتديت احكى لحد على ازاى انا حلمت بحلم تعبنى, و ابتديت جوة الحلم احكى عن تفاصيل الحلم اللى حلمته فيه :) ... لما صحيت بقى ماكنتش فاهمة اى حاجة, و اخدت حبة وقت كدة لحد اما جمعت ايه اللى كان حلم و ايه اللى كان بجد

خلاص هانت, كلها حب و الدنيا تبتدى تنور بالراحة, و ميعاد نومى ييجى, هم كام ساعة بس اللى هانامهم , عشان اصحى اروح امتحان الكيمياء اللى ورايا بكرة

اسيبكوا لاحلامكو, و اروح اسلم نفسى لهلاوس احلامى

هناك 4 تعليقات:

shaimaa يقول...

برافو بصي فاضلك حلم كمان وتاخدي75 قرش
:P
انا كمان زيك كده بومه مش بنام غير لما النور يطلع وبرده بحلم بهلاوس كتيير
واضح ان نوم الصبح دا في حاجه غلط
يالا تصبحي علي خير انا كمان رايحه انااااااااام

karakib يقول...

طول عمري ما باعرفش أنام قبل الساعة اربعة الصبح بس من 3 أو 4 شهور ما بانامش الا لما أسمع صوت العصافير برضه و النور يطلع بس أنا صوت العصافير عندي من العصافير الكتير اللي باربيها في بلكونتي و باحلم أحلام غريبة برضه و كتبت تدوينة عن ده
باقابل ناس ما اعرفهاش و باتكلم معاها و بقوا أصحابي !! باشوف ناس ماتت

MSameer يقول...

بس انا عمري ما شفت بومه طعمه كده!!

انا بالى كتييييييييير ماباحلمش. هو علميا انا باحلم بس ش بافتكر. يمكن علشان بانام و انا ميت من التعب.


بس عادى الاحلام الخاصه بالامتحانات دى عادى و دايما بتبقى بماساه فى الاخر!!

المهم ان لما حلمت مؤخرا عارفه حلمت بايه ؟ انى باشرب سوجاره ولامؤاخه!!

:-)

Aardvark EF-111B يقول...

تجربتك مألوفه, عايشتها كثيرا و مازلت, أرق و سهر للفجر بغض النظر عن البلاوي اللي لازم تتعمل تاني يوم, أستحرم الوقت الضائع لكن سعيد بهدوء الليل, ولما أنام, أحلام متعبه, ميكي و بندق و بطوط و الأولادو عبقرينو, و دهب و تان تان, مجرد صحبتهم تخلي الحلم جميل, الله يعيننا