الجمعة، نوفمبر 10، 2006

انا و على و الشوكولاتة



اسمه على
كنت فى رابعة ابتدائى و هو كان اكبر منى بسنة
قد ايه كانت الحياة بسيطة وقتها!!...هو جه و قالى "تصاحبينى؟" , و انا اخدت و قت للتفكير (دى كانت القاعدة وقتها) , و بعدين وافقت, و خلاص, الامور بقت واضحة :), انا صاحبته و اللى يضايقنى فى المدرسة , لازم هو اللى يتصرف معاه

كنت باحوش مصروفى, و كل كام يوم اشتريله شوكولاتة و بيبسى كان, مش ازازة بيبسى عادية-بأدلعه بقى- و اروح فى الفسحة اديهومله, علشان هو ده الوقت اللى كنا بنلحق نشوف بعض فيه
فى حصص الانجليزى, لما كان المدرس بيدى امثلة و ييجى فيها اسم "على" , كان كل اصحابى يلفوا ناحيتى و يغمزولى. و يبقى معروف ان الاسئلة اللى فيها الاسم ده , انا اللى هاجاوبها. و يا سلام بقى لو جه اسمى مع اسمه فى جملة واحدة

كنت اطول منه جدا, و كان شكلنا و احنا واقفين جنب بعض يفطس من الضحك, بس طبعا الحاجات دى ما تأثرش فية, الحب مافيهوش مين اطول من مين :)... كانوا اصحابى يقعدوا يتريقوا عليا, و يرسمولى صور فيها انا كبيرة و شايلاه على ايدى

و مرة خرجنا
كنا رايحين ناكل فى ماكدونالدز. و فاكرة كويس انى قعدت افكر البس ايه, و رسيت على الجينز و بلوفر ابيض باحبه اوى, علشان شكله و حلو و بسيط, فميحسسش اللى قدامى انى -لا سمح الله- قعدت افكر فى هالبس ايه
لميت كل الفكة اللى معايا و اللى فى البيت, و كملت ١١ جنيه, يا دوبك يكفوا مواصلاتى, و وجبة من ماكدونالدز, مع انى عارفة انه هيصر يدفع :) , بس الاحتياط ما يخسرش
اتقابلنا, و اكلنا و قعدنا نتكلم و نهرج , و طبعا هو اللى دفع, و بعدين رحنا نتمشى فى الشارع
و احنا ماشيين , واحد و خطيبته وقفونا و قاللولى " يا ريت لما نتجوز نجيب بنت امورة زيك" و ضحكولى...بكدة انا بقيت مبسوطة اكتر حاجة
و انا مروحة قعدت افكر فى كل اصحابى اللى مستنيين تفاصيل الخروجة تانى يوم, و ازاى مش هنقدر نستنى لحد الفسحة علشان احكيلهم, و هنقعد نكتب لبعض على ورق و نرميه لبعض اول ما المدرس يدينا ضهره

فضلت الدنيا ماشية كدة, ما بين شوكولاتة, و غمزات عبر ابواب الفصول, و مكالمة تليفون كل كام يوم, و كام كلمة بسرعة و الاتوبيسات بتاعة المدرسة بتتحرك, غير طبعا الجوابات الهبلة اللى من نوع
Let Love Live Long
i love you 1+1=2
i love you more 2+2=4
spice girls و طبعا قمة الرومانسية, اقتباسات من احدث اغانى

جه العيد و حوشت العيدية كلها, و نزلت اشتريتله كارت بيعمل موسيقى, و احدث BackStreetBoys CD
و انا واقفة معاه فى وسط الحوش بتاع المدرسة, ايديا ورا ضهرى مخبية الهدية, مستنية اسمع اخباره و بسرعة اديله الهدية علشان اجرى الحق الاوتوبيس ... على قاللى انه ما ينفعش يكمل معايا, و مشى و سابنى.
فضلت متنحة مكانى, و بعدين جريت على الاوتوبيس بتاعه, و اديته الهدية...و روحت البيت

هناك 33 تعليقًا:

frozen love يقول...

a7la w2t..we a7la 7ob ..we asfa 2lb....we kl 7aga kanet t7fa fe elayam de....zkryaaaaat!!

Lasto-adri *Blue* يقول...

i always wished to have such memories
but never did, and never will :(

Alaa يقول...

الرسومات دي باين عليها مرسومة في جنو لينوكس

Ma3t يقول...

Frozen love:
موافقة تماما, مش متخيلة قد ايه كانت حاجة حلوة انى افتكر الوقت ده
الدنيا كانت سهلة و جميلة :)

Lasto=adri *blue*
never mind, you'll always have other memories that will bring the same kind of childish happiness when u recall them.
or if u want that same kind of memory go and find a very short bf and get him lots of chocolate :D

Alaa:
رد واحد عندى
:P بع

Dananeer يقول...

حلوه
رجعيتنى لايام زمان و المدرسه
و لمه ماك
معرفش ليه صحيح ماكدونلز كان الراعى الرسمى بتاع الخروج؟
الرسومات عجبيتنى

Maat يقول...

this is so adorable and cute..... yaaaaah, i look back at those days and realize how innocent and naiive i was, then i wonder : WHY THE HELL COULDNT I STAY THERE FOREVER??

karakib يقول...

بقالي كتير ما ابتسمتش و انا بقرا تدوينه الابتسامه الناعمه دي ...
حلوه اوي علي فكره بس تفتكري علي عمل كده ليه ؟
و بعد الهديه رجع لك تاني و لا خدها و مشي خلاص ؟
تفتكري لو علي ظهر في حياتك مره تانيه هتعملي ايه ؟
انا رجل و كان عندي قصه شبيهه باللي بتحكيه تخيلي اني قابلت اول حد كنت كده كعاه لتاني مره بعد السنين دي كلها :) علي فكره احساس مختلف انك تشوفيه دلوقتي و يا سلام بقي لو قرأ التدوينه دي
انتوك

Shobiliani fe belad el 3aga2eb! يقول...

Ma3t, You're a breath of fresh air in a very dark Egyptian blogging world. You put a smile on my face and took me back to the days when things were pure, simple and platonic. Thank You.

Ma3t يقول...

انتوك
هدفنا اسعاد حضراتكم :)
على ما رجعليش بعد الهدية ولا حاجة, لكن حاول يرجعلى بعديها ب٣ سنين, كنت انا خلاص عملة فيها كبيرة و مهمة وقتها
بس و انا فى ثانوية عامة لقيته بيكلمنى, و رحت قابلته فى و سط البلد, و تانى رحنا ماكدونالدز, :) فى ناس ما بيتغيروش ابدا, كان بقالى سنين ما روحتش لانى اصلا ما بحبوش
المسلى انه اول ما شافنى قالى "انتى اتغيرت اوى, تخنت, و ابيضتى, و شعرك انعم" ...فقولتله "تبقى مصيبة لو كنت اسة زى ما انا فى رابعة ابتدائى, اكيد تخنت, و بيقيت باسرح شعرى" -كدبة ديه انا منعكشة على طول- بس حفظا لكرامتى
كانت اول مرة اقف مع على و يبقى هو اطول منى :)
و يوميها ورانى واحد من الكروت اللى انا اديتهالوا...وشى جاب الوان, و كان الكلام بالظبط هو اللى انا عملاه فى المدونة
كنت عبيطة اوى وانا عاملة فيها الحبيبة و انا ما حصلتش ١١ سنة

Ma3t يقول...

Shobiliani:
Thank you so much for ur touching words...it really is YOU who put a smile on my face
thanx

shaimaa يقول...

معت يا حبيبتي روحي ذاكري احسن

:P

وبطلي رغي

غير معرف يقول...

يااااااه أنا فاكرة علي ده, قضينا ليلة راس السنة بنتكلم عليه هاهاهاهاها و أنا كنت اللي هو "أنا عايزة من ده يا حزمبل أنا عايزة من ده"
أدخلي ذاكري يا بت

wael elgazawey يقول...

عارفة ان علي شكله بيقرا المدونة بتاعتك ايه استغربتي ليه كدة.. عموما انتي اسلوبك حلو اوي.. وانا متابع مدونتك بشكل كبير.. وأسلوبك رائع بس كما نصحك الجميع.. روحي ذاكري يا بت

karakib يقول...

كله نازل فالبنت تأنيب خشي ذاكري خشي ذاكري
ما تقوموا انتم تذاكروا و لا هي يعني الوحيده اللي لازم كل الناس تفكرها بالمذاكره
طب اقعدي بقي و اكتبي لو سمحتي علشان كتاباتك زي العسل
ممكن تكتبي بالتفصيل عن تاني لقاء مع علي لو سمحتي ؟؟؟
هاني جورج

Nilethought يقول...

My dear ma3t, i am getting addicted to your Blog. I even check it from my mobile when i am not in cairo. I think your latest entry was exceptionally warm. You are very feminine Btw. I picture you as a warm caring young egyptian woman. Don't be so late. The part of you still giving him his present despite of him leaving is extremely touching

Nilethought يقول...

My dear ma3t, i am getting addicted to your Blog. I even check it from my mobile when i am not in cairo. I think your latest entry was exceptionally warm. You are very feminine Btw. I picture you as a warm caring young egyptian woman. Don't be so late. The part of you still giving him his present despite of him leaving is extremely touching

Ma3t يقول...

جه وقت الرد
كل واحد داخل يقوللى ذاكرى يا بت...بت!! انا كرامتى متبعترة خالص فى المدونة دى
على العموم شكرا جدا يا انتوك, انا اللى هيضايقنى هابعتهولك تتصرف معاه :)

يا شيماء, ادينا غيرنا الخلفية بتاعة المدونة و خليناها فاتحة علشان ما تبرطميش تانى
:)

nilethought
again u touch me with ur sweet words

Barracuda يقول...

الدنيا كانت بسيطة والقرارات اسهل بكتير .. الأيام كان ليها طعم ولون وريحة
وحب العيال ده وصحبيتهم أجمل بكتير من حب الكبار اللي مليان عقد
... تحياتي

غير معرف يقول...

la2 el-background el-fat7 we7esh 5aly 5ame2 :P

Ma3t يقول...

اتفقوا مع شيماء على الخلفية, و اللون اللى تؤمروا بيه هاعمله...انا عندى ايه اهم من ارضاء حضراتكم :)

KareemFromEgypt يقول...

:)

you did put a smile on my face too,

i love those old memories, although i didn't have ones when i was in primary school, i started in talta sanawey lel asaf, i was crippilingly shy when i was younger, anyway thanks for the smile and keep it up. we should have more bloggers who blog about their personal lives in such beautiful posts, la2 gamda ya3ni

karakib يقول...

انا شايف انه الخلفيه يبقي لونها بحلقي
(اللون اللي لما بنشوفه بنبحلق) يا ريت بحلقي غامق لو سمحتي علشان الفاتح بيوجع عينيا يعني لو ما كانش فيها رزاله
انتوك

shaimaa يقول...

هما كده الرجالة يا حبيبيتى
ميسطروش
كان طمعان فيكى
تلاقيه واحدة عزمته على شيبسى حجم عائلى فراح لها
ولا يهمك

لا بجد ؟ بوست الطفولة بتنطنط جواها ورقتك كمان


شيماء الصراحة خنقة

shaimaa يقول...

انتي يا بت انتي مبتزاكريش لييه

شكلي كده هضربك
:P

الالوان برده مش قوي

بصي جربي الفسفوري كده ونشوف

انا وراكي لحد ما تعزلي من البلوج سبوت دا

:P :P

Fadfadation يقول...

aah 2alebty 3alena mawage3 el madrasa :)

I wish i was a kid again :(

SPRING يقول...

ايه يا عم الحلاوة دي ، انا على ايامي كنا بنجيب لبعض عصير قصب و لا خروب ، بيبسي كانز ده تقدم كبير
هما الولاد كده يا بنتي مالهمش امان

Elsede3' يقول...

wooooooow
ana a3adt metanna7 beta3 5 mins keda reminiscing
these were the best days
i remember wen i first held a gal's hand...i was 7 then
i dunno but there was sth pure keda zaman
anywayz, the whole thing is gr8...
i like the drawings ALOT
wel template 7elwa...balash el fosfoory 3shan akeed hanet3emy

Immature يقول...

حاولى تفضلى صغيرة كده علطول اوعى تكبرى .. صدقينى هتندمى ..
بس "على" ده مش عارف ليه بيفكرنى بعلى اللى فى اعلان كومفورت . ميوحيش بالثقة ابدا

Captain L.J.Silver يقول...

elwa7ed makansh me2addar el2ayyam deeh fe wa2taha .....a3mel ay 7aga law yoom wa7ed bas menha yerga3 ........

Fantastic Post !

Ma3t يقول...

Kareemfromegypt
i am glad i made u smile :)
انتوك
يا باشا انت تؤمر, لو حضرتك تحب تبعتلنا كل يوم اللون المفضل لسعادتك, ونغير البلوج كله على اساسه
:)
shaimaa الاولانية
شكرا جدا على كلامك اللطيف
Shaimaa التانية
هو انتى كل اما تيجى تشوفينى, تروحى تبعتيلى على المذاكرة, طيب ادينى خلصت امتحانات و فضيتلك
fadfadation
don't we wll wish for that!
well i guess i am still a kid in so many ways :) , so i could still act like a total 3ayela, and get away wt it
Spring
مش باقولك, كنت مدلعاه اخر دلع
هم كدة , نبعتر عليهم فلوسنا ولا يتمر فيهم :)

Ma3t يقول...

elsede3'
my great friend and fan :)
yaeh there was a great pureness about it, and things were very uncomplicated
a chocolate was enough :)
don't forget to invite me to ur coming concert

Immature
يا ريت افضل صغيرة كدة على طول, تفتكر باختيارنا؟
هىهى حلوة اعلان كومفورت, جايز لو كان بيتعرض وقتها كان قرارى اختلف :)

captain l.j.silver
Seems like evry time u write me i end up saying thank u :)
so thank u again it is

Elsede3' يقول...

akeed isA...
hab2a 2a2ool 3aleeha felblog 3andy ba2a
bas 3al3omoom heyya lessa badry 7abba

Dina يقول...

eh dah kan bey7salli keda 3alatoul fel senn dah w kont a3od afakar el 3eib feya wala feehom (kont moqtane3a eno feya tab3an :D) w delwa2ti el 7al et2allab sob7an Allah aw ana bante2em menhom Looll :DD hehe ya khofi latkoun kolaha 3o2ad tofoula :D