السبت، نوفمبر 18، 2006

الديك الرومى الباركورى


طول عمر عيلتى عندهم قدرة على اجتذاب اغرب المواقف, و كتير اما نيجى نفتكرها مع بعض ما نبقاش مصدقين ليه احنا اللى بيحصلنا الحاجات دى؟؟ ليه احنا اللى عندنا قطط بتفتح التلاجة؟ وكلب فاكر نفسه قطة و تبسبسله ييجى؟ و قطة فاكرة نفسها كلب و تنط فى بانيو مليان مية قبل اما تستوعب انها فى الاصل قطة و ما بنحبش المية...يااه امثلة ما بتنتهيش
المهم... القصة اللى افتكرناها من يومين, قصتنا مع الديك الرومى

مش فاكرة كان عندى قد ايه بالظبط, بس ده كان من اكتر من ٧ سنين علشان وقتها انا و اخويا الكبير كنا لسة فى مدرسة
زى كل يوم كنت صاحية انا و ماما و بابا الصبح بدرى علشان اجهز للمدرسة , نحاول نصحى اخويا و اختى اللى ما بيصحوش الا بالطبل البلدى
جرس الباب رن, و بابا قام فتح
لقينا واحد واقف و شايل ديك رومى فى ايده و بيقول لبابا
- معلش با استاذ احمد, و انا ماشى فى الشارع بتاعكوا لقيت الديك ده بينزل عليا من السما, معرفش جه منين, و انا
اصلى متأخر على الشغل, بس انت عارف ديه امانة و لازم نردها لصاحبها...والله لولا بس انى متأخر
بابا قاللوا ولا يهمك و اخد الديك الرومى ...فضلنا متنحين, اخويا صحى من النوم لقانا ماسكين ديك رومى فى وسط الصالة< قام دخل كمل نوم
حبسنا الديك فى اوضتى علشان نبعده عن القطط, و قمنا نشوف نكمل يومنا بشكل طبيعى ازاى
و فجأة كل حاجة اتقلبت فيلم كرتون
اختى الصغيرة صحيت, و هى لسة نايمانة و مش مجمعة دخلت اوضتى و لفت لقيت "وحش" , صوتت, الديك اتفزع و جرى من باب الاوضة اللى هى سابته مفتوح, القطط اخدوا بالهم و قعدوا يجروا وراه, و وراهم ماما و بابا بيحاولوا يمسكوا الديك و يحوشوا القطط... و المكان بقى مرستان كله عمال يجرى فى كل حتة و فوق كل حاجة, و اختى عمالة تصوت...و اخويا طبعا متجاهل كل ده و نايم
بعد اما نجحنا فى السيطرة على الموقف و حبس الديك, و تهدئة اختى و شرح الاحداث ليها
اخدنا الديك و اديناه لبواب العمارة اللى قدامنا اللى لسة بتتبنى , علشان يربطه على امل ان اصحاب الديك يعدوا و يشوفوه

بعد ايام يتضح ان الديك ده بتاع ناس ساكنين بعدينا بتلات اربع عمارات , و انه نط من سقف لسقف, عمل باركور يعنى, لحد اما نزل عمارة جنبينا و نط من سقفها على الراجل المسكين اللى كان ماشى فى امان الله...و مصيره وصله لينا فى الاخر

هناك 6 تعليقات:

غير معرف يقول...

2o5tek el-so3'ayara di mazloma fi 3eletko 5ales ;]

Ma3t يقول...

ماشى يا اختى يا صغيرة يا مظلومة, قفشاكى حتى و انتى عاملة فيها anonymous

shaimaa يقول...

معت ازيك يا بت انتي خلصتي امتحانات وفضيتي

:P

اكتر حاجه بتعجبني في اخوكي الكبير دا روقان اعصاابه وهدؤه الشديد

بس انا لو منكم كنت دبحت الديك الرومي دا واكلته هوا حد لاقي ديك رومي يجيله من السما

Elsede3' يقول...

wALLAHI fakarteeny ayam lma elwa7ed kan beyeb2a a3ed fe aman ELLAH we yela2y kalb da7'el 3aleeh men el la makan
di moshkelet ennek teb2y fe door ardy

karakib يقول...

ديك رومي :) الديك الرومي ده من الطيور الحلوه اوي اوي ... انا باحب كل الطيور لكن في حاجات كده ليها معزه خاصه زي البط و الديوك الرومي .. علي فكره و انا صغير مره ديك رومي نقرني في نافوخي :) و قعد يكركر بعدها فتره طويله ... الغريب اني كنت فرحان بيه اوي
انتوك

fateimad يقول...

تنتوفه من تناتيف ماعت غير عاديه وغير وغير وغير سيبك انتي من عيله جدعان