الاثنين، نوفمبر 20، 2006

....لحظات

الوجع مش بيروح
كأن سكاكين جوة بطنى. او جرح كل اما يبتدى يلتئم و الالم يضعف, تضغط عليه و تحطله ملح, و يرجع الوجع بقوة من اول و جديد
بقالى يومين على الحال ده, و امبارح جسمى ضحك عليا, رحت نمت و الوجع مش موجود, و قرب الفجر رجعلى بقوة و صحانى من النوم

مش عارفة انام , ولعت النور الصغير اللى جنب السرير و مسكت الكتاب اقراه, ٣ صفحات و ما قدرتش اكمل
حطيت الكتاب على جنب, زقيت اللحاف و رحت على المطبخ, عملت كوباية نعناع سخن, و طلعت على الصالة لفيت شال حوالية, و قعدت على كرسى , تنيت رجلية تحتى, و غمضت عينى, و سبت عقلى ياخدنى بعيد عن الوجع, بعيد عن كل حاجة حوالية دلوقتى
لقيت نفسى بارجع لحاجات حصلتلى قبل كدة, و عقلى مش منتظم, حبة يرجع ورا سنين, بعديها يرجع شهور
اخدنى ليوم اما اختى الصغيرة اتولدت, و قعدنا نتسابق انا و اخويا فى الشارع على مين هيوصل البيت الاول و يشوفها
يوم اما طلعت الاولى على الدفعة و كل البنات فى السكن طلعوا فى البلكونات يزغرطولى
لما جدتى رفضت تنزل العلاج الطبيعى و هى فى المستشفى, و قعدت تحكيلى ازاى هى حرنت و ثارت عليهم. كانها طفلة صغيرة مستمتعة بلحظة تمرد
لما ب لف حوالية بطانية, و احنا على الرصيف فى الاعتصام قدام نادى القضاة, علشان كنت متلجة و كان لازم اذاكر
لما اصحابى جولى صباحية عيدميلادى و اخدونى اشترى الميكروسكوب اللى باحاول احوشله بقالى سنتين
اول مرة "هو" كتبلى فى ايميل انى هاوحشه, و قعدت متنحة قدام الشاشة , و وشى جايب الوان و عمالة اضحك كل شوية, و متلخبطة, و مرات اخويا قاعدة تتريق عليا
لما س بعتتلى كتب المذاكرة و انا مسافرة, و كل اما افتح صفحة الاقيها كتبالى رسالة صغيرة
لما كنت تعبانة اوى, و رحت فى حضن ماما بس عشان اعيط
لما ص صاحبى, كل اما يلاقينى باعيط من غير صوت و انا فى وسط المذاكرة, و هو مش عارف ايه اللى مزعلنى, يشغللى اغنية "الفرحة" لمحمد منير, و و يرقصلى و يعملى حركات هبلة علشان اضحك
لما كنت مقضية العيد لوحدى فى البيت علشان المذاكرة, و صحيت الصبح على واحد بيوصللى كحك و غريبة بابا موصى عليهم علشان يبسطنى

البرد عمال يزيد, بس الوجع بيقل, اكلفت اكتر جوة الشال, اشغل اغنية "مسك الليل" لسعاد ماسى, و ارجع تانى للحظات اللى كنت عايشاها, لحظات جايز تكون صغيرة اوى لو قارنتها بعمرى كله, بس هى ديه الجزأ الحقيقى فى حياتى, هى اللى خلتنى ابقى البنت اللى بتكتب دلوقتى

مرة اعز اصحابى قالى " انا كل يوم قبل اما انام بادعى انى ما انساش اى احساس حسيته فى يوم من الايام, حلو او وحش" ...انا مش فارق معايا افتكر اى احسا س وحش, بالعكس, عايزة لو عديت على حد من اللى وجعونى مابقاش فاكرة الوجع, و اقدر اعديهم بابتسامة عادية
لكن عايزة افتكر كل احساس حلو حسيته فى يوم, علشان عايزة اما اضحك فى وش حد يبان فى ضحكتى كل اللحظات الحلوة اللى جمعتنا سوا

جسمى دفى دلوقتى, و الوجع راح خالص...هادخل انام

هناك 10 تعليقات:

frozen love يقول...

eh el27saas da klo...7ram 3leky wlahy..rbna yktr tzkrna llayam el7elwa ..we y2ll mn tzkrna lelayam elw7esha l2nha mbttnsash

غير معرف يقول...

سلامتك.

"كل يوم قبل اما انام بادعى انى ما انساش اى احساس حسيته فى يوم من الايام, حلو او وحش"

مش فكرة كويسة خالص. اسألي واحد مش بينسى. اسمعي مني أنا.

wael elgazawey يقول...

الف سلامة عليكي انا عايز منك خدمة أنا صحفي وبعمل موضوع عن المدونات ودة ايميلي وياريت نتكلم عليه وهاخد منك كام اجابة عن كام سؤال كدة على المسينجر انا موجود الاربعاء من الساعة 12 ليلا والدعوة عامة لكل المدونون وياريت تتعاملوا مع الموضوع بجدية
وشكرا
waelelgazawey@hotmail.com

Elsede3' يقول...

souad massi???
3azeeem :)
aslan ana etbasat wana ba2ra elpost
i was longing for sth i dnt know
it's good to remember the happy moments, and still it's good to remember the bitter ones
after all, they add extra flavour

Ma3t يقول...

frozen love
يسمع من بقك
anonymous
اولا مش انا اللى بادعى الدعوة دى, انا بادعى للحاجات الحلوة بس
ثانيا, اسمع منى انت, مش لازم تنسى اى حاجة, بس مكن تدى فرصة للحظات تانية حلوة تتسجل فى ذاكرتك
:)
Wael:
حاولت و بعتلك ايميل
elsede3'
my friend, happy to have ur comment
yup soad massi is great, specially her last album, i just get lost with her
i am glad enak etbasat

Maat يقول...

loved this post. i do that alot: just let my mind roam and go to places i thought i've forgotten.....w lesa men kam yom kont ba2ool le nafsy "ya rab mansash ay 7aga men el 7agat de, 7atta ely betewga3 feha"...like u said.. that's what made me who i am today!

(this is pretty confusing... the whole "maat & ma3t" thing :D, great blog though)

karakib يقول...

مش عارف اقلك ايه بس لو و انت عيانه بتفكري كده و بتبقي حلوه كده يبقي حاولي ما تخفيش لو سمحتي :)
باهزر طبعا سلامتك الف سلامه
انتوك

Barracuda يقول...

ما كنتش اعرف ان المغص ممكن يطلع الكلام الحلو والاحساس الجميل والترابط بين الأشياء والأفكار والزمن.... معنى كده ان كل مغص هنلاقي كلام حلو كده ؟؟ يبقى ربنا يوجع بطنك يا شيخة !!!! ههههههههه اسف .. بس القافية تحكم

تحياتي واحترامي

Immature يقول...

ده كله من تأثير النعناع السخن . لو كنتى شربتى كراوية دافية كان الامر اختلف
:o)
تدوينة جميلة

ahmed sabry يقول...

عنيا دمعت وجسمي قشعر وانا بقار البوست دة . بس خلاص :)