الجمعة، ديسمبر 04، 2009

عن ولد أسمر حليوة

النهاردة قابلت أول حب في حياتي
كان عندي 9 سنين و هو تقريباً كان عنده 23 سنة
مش فاكرة ذكريات محددة عن الفترة دي بس فاكرة تناتيف صغيرة حستا وقتها.
فاكرة اني كنت بنت لمضة و منعكشة و منطلقة. و فاكرة ان هو كان كل حاجة مبهرة لبنت صغيرة زيي. كان ثورجي وحنين و أسمراني و حليوة. و كمان كان بيدلعني, و أنا من صغري باحب الدلع زي عينيا.

و أنا رايحة أقابله كان فارق معايا انه اما يشوفني يلاقي فيا من البنوتة الصغيرة اللي كانت مبهورة بيه و عايزة تبهره.

فيه علاقات بتتوجد في حياة الواحد و مايعرفش يلاقيلها تفسير.
زي علاقتي بيه.
ازاي عيلة كلها رجلين و شعر منعكش تبقى بجد صاحبة ولد حليوة في اخر سنة في الجامعة!!
و ازاي يقعدوا 15 سنة من غير ما يشوفوا بعض و اما تروح تشوفه , تحضنه و تبقى مرتاحاله نفس الراحة اللي حستها و هي 9 سنين.

قعدت أتفرج عليه و هو بيتكلم و بيحكي حواديته. لما بيتحمس للحدوتة, بيميل بجسمه لطرف الكرسي, و بيحط ايده على دراع اللي بيتكلم معاه عشان يركز كل انتباهه على حدوتته. كل حركة صغيرة بيعملها كان ليها صدى في ذكريات و صور منغبشة و معالمها مش واضحة جوايا.
ألوان سايحة في خيالي. ملامح ولد اتهزت و ماكنتش واضحة لسنين رجعت تتشكل من تاني و تترسم من جديد.
ضحك و شمس و غنا و كلام كتير. ناس كتير حواليا, حضن يشيلني و حضن يضحكني. أصوات و صور رجعتلي, جزأ منها حقيقي و جزأ منها نسجه خيالي.
و في وسط كل ده, في وسط كل المشاعر و الصور و الألوان اللي بتتزاحم حواليا, في ركن دافي مستخبي جوايا, شرنقة صغيرة جواها بنت مفعوصة بتضحك و بتدندن مطمنة ان أول حب في حياتها ماكانش مزيف.

3 ديسمبر 2009

هناك 6 تعليقات:

Evaluna يقول...

:) :)

i love you!

radwa osama يقول...

مفيش حب مزيف يا بنت
حب يعنى حب .. بس فيه علاقات بس هى اللى بتنتهى واحنا وقتها بنقتل الحب لاننا غضبانيين من العلاقه .. ده راى يعنى .. حضن كببيييييييييييييييييييييييييييييييييييييييييييييييييييييييييييير

Ma3t يقول...

لا انا ماكانش قصدي كدة. ان كان قصدي ان تصوراتي الطفولية عنه لقيتها لسة موجودة برغم مرور السنين.
ما تقلقيش, انا مهما كان الغضب اللي جوايا, الحب بيفضل معايا

radwa osama يقول...

طمنتينى عليكى

atralnada يقول...

i thought i was your first true love
snif snif

fateimaD يقول...

انا مش عارفه اذا كان هوه ذات الشخص اللي انت بتشربي معاه شاي العصاري من اطراف البعاد علي العموم ربنا يوفقك للي يحتوي اليعسوبه الرقيقه والبنت المقاتله الشرسه المحاميه الذكيه خريجه العلوم بس المهم ماتضيعيش البنت من جواك البنت المفعوصه الضاحكه بريئه المشاعر