الثلاثاء، يونيو ٠٥، ٢٠٠٧

سنة من عمرى

من سنة بالظبط كنت قاعدة جنبه, مد ايده و مسك ايدى, و و فى اللحظة دى حياتى كلها اتشقلبت

فاتت سنة
سنة مليانة باحداث كتيرة , و كتير منها احداث صعبة
القبض على اخويا و مجموعة من اصحابنا
دخولى عالم التدوين
تعب جدى ودخوله المستشفى
و انا و هو حصلنا, حبى ليه حصل

اوقات باحس الوقت سرقنا, عدى علينا بسرعة جدا, كأنى نمت و صحيت, و كل حاجة حصلتلى بس امبارح
كأنى لسة امبارح كنت قاعدة جنبه فى السينما, حاسة بوجوده جدا, و متلخبطة من اللى انا حساه
لسة امبارح كنت واقفة فى المينا فى الغردقة, و المركب اسبرنزابترسى, و انا شايفاه عليها و عمالة افكر محتاسة ازاى هاتعامل معاه
لسة امبارح كان حاطط ايده على خدى و بيقوللى انتى جميلة
لسة امبارح كنت قاعده معاه, و بيفرجنى الحاجات الصغيرة اللى هو مجمعها و مصنفها و هو صغير, و المقالات اللى عجبته و لسة محتفظ بيها
لسة كنت باتمشى فى الجبال فى سانت كاترين و باوصفله فى دماغى انطباعى عن المكان و الناس
لسة امبارح كان بيحضننى و انا باعيط
لسة كان بيبوس ايديا لاول مرة, و كنت باحس بمليون حتة فيا بتسيح

عارفة ان سنة جزأ صغير جدا من ال21 سنة اللى حيلتى, و اصغر كتير كمان من ال 30 سنة بتوعه
بس انا اتخلقلى عالم تانى , ليا انا بس فى السنة دى
فى السنة دى
انا استعدت نفسى ,اكتشفتها اكتر من اى فترة قبلها
رجعت امشى و اسمع موسيقى فى دماغى
رجعت العب مع كل عيل صغير بيعدى جنبى فى الشارع
رجعت ارقص و انا لوحدى فى اوضتى
و رجعتلى كل الاحلام اللى كنت فاكرة انى خسرتها

اوقات بابقى قاعدة و حد يجيب سيرته, و ابتسم
وقتها باحس اللى بيننا لا يمكن يبقى سنة بس, لا يمكن يبقى وقت اعرف احدد بدايته و نهايته
اللى بيننا عمر. عرفته فيه مبسوط, زعلان, متزرزر
اوفات فيه كنت باكبر, و اوقات اكتر كنت باعيش معيلتى الطبيعية
اوقات كنت بابقى عايزة استخبى جوة حضنه, و اتجاهل كل حاجة بتوجعنى براه, و اوقات كنت بابقى عايزة احضنه و ماخاليش حاجة توصلله و توجعه


لما بابقى قاعدة مركزة فة حاجة, و ارفع راسى الاقيه بيتفرج عليا بابتسامة, باحس ان كل حاجة حصلتلى قبله, حصلت بس عشان توصلنى للحظة دى
بس عشان ارفع عينيا و الاقيه بيضحكلى

هناك ١٥ تعليقًا:

غير معرف يقول...

:-)

radwa osama يقول...

مبدعة ..بتعرفى تمسكى احساسك,,ربنا يخليكو لبعض

Dananeer يقول...

اولا كل سنه و انتو سوا متاخره
ملقيتش تعليق بس عجبنى كلامك اوى اوى كلعاده

و بعدين هو فيه زيك يا فنانه
كفايه بتضحكينا بالكرتون بتاعك
:D

غير معرف يقول...

لسه كان بيبوس ايديا لاول مرة.وكنت باحس بمليون حته فيا بتسيح



ياااااااااااااااااااااااااااااااه
للدرجة دي انتي رخيصة كدة

انا اسف علي الكلام اللي بيوجع
بس هيا دي الحقيقة

واللي يقلك غير كدة بيخدعك

انا مقدر حاله الحب والهيام اللي انتي فيها
ولكن
ستعلمين يوما انه لن يكن فارس احلامك
لان البضاعه رديئة معيوبة

من يستطيع ان يامن لفتاه تركت نفسها لشاب باسم الحب
انا عارف انك هتفتكري اني اصولي معقد متطرف رجعي وغالبا من اصحاب الدقون
لا اطلاقا
انا شاب اقل ما يقال عنه انه صايع
واعلم من خلال لمحات حكاياتك عن هذا الشاب انه اصيع مني
لذلك
اعتقد ان حبك الي فشل
وهذا ما ستجنيه يداك
بتهورك واندفعاك
صدقيني الواد دة لما هيتجوز هيدور علي اللي هتحافظ علي بيته
وغالبا مش هتكوني انتي حتي لو بيحبك
مشكلة الشرقيين هتعملي ايه
؟؟؟؟؟؟؟؟
راجعي تصرفاتك الحمقاء
وحاولي الابقاء علي ما يمكن ابقاءه

اه نسيت اقلك
لو انتي بقي عارفة اللي فيها ومقضيها والحكاية يعني متفرقيش معاكي
والموضوع مليطة
يبقي اوكي

جود لاك

monasosh يقول...

رضوى و دنانير و شيماء
:) باموت فيكو

الاستاذ المجهول

انا فعلا فى حالة تتنيح و مش عارفة اقولك ايه!!
اول مرة حد يهاجمنى بالطريقة دى, و اللى مش قادرة اصدقه ان كل ده عشان قلت" يبوس ايديا" ...حاولى الابقاء على ما يمكن ابقاءه... يالهوى, انا مش عارفة بعد ايديا ايه اللى هيبقالى!!

من الاخر
خللى نصايحك لنفسك, لا انت اخويا عشان تديللى نصايح اخوية, و لا انا كنت ال21 سنة اللى فاتت مستنية ظهور حضرتك عشان تقول رأيك فيا

لا, ياريتك كنت اصولى معقد متطرف رجعى
لا ده انت صايع على حد قولك, اهى النوعية دى بالذات اللى باحتقرها اكتر من اى حاجة تانية. الولد اللى شايف نفسه صايع و بيعك بس هو تمام, لكن البنت هى اللى بنت *** و مااتربتش و تستاهل اللى يحصلها

بص هى دى مدونتى و هى دى كتاباتى, عاجبك اهلا و سهلا مش عاجبك ممكن تحافظ على روحك الطاهرة و ماتقراليش تانى

بوسة ايد عملت كل ده!! دنيا

monasosh يقول...

اضافة صغيرة للأخ المجهول
انت اكيد ماشفتش التدوينة دى
http://ma3t.blogspot.com/2006/11/blog-post_05.html
:D
تحياتى

غير معرف يقول...

بصي حضرتك متستغربيش
انا متيقن انها لم تكن بوسة ايد
فقط
ودي متفرقش معايا كتير
لا انتي اول ولا اخر
وانتي طبعا عارفة اللي بتعمل الحاجات دي برة نطاق الزواج الشرعي

العامه والسوقة اللي زيي بيسموها ايه
شر*****
انا بقي اللي بكرهه اكتر من الواد الصايع اللي مفكر نفسه مقطع السمكه وديلها البت الصايعه اللي مفكرة نفسها بت روشه ومحدش بيعلم عليها
مع ان كل جسمها بشل(مصطلح سوقي)
طيب موضوع اني مش اخوكي اوكي
والله البق دة عشان مصلحتك واحساسي انك كويسة يعني وقلبك قلب خسايه
وانتي برضة متفرقيش معايا
لكن قلبي بيقلي لا ياد دي زي اختك برضة
والنصيحة واجبة
وبعدين برضة عشان الواد ميلبسهاش الطاسه ويعيشها في وهم وقصة كدابة تصحي منها علي حقيقة ان يااااالهوي حمادة خطب بت قال ايه محترمة وبنت ناس وملهاش تجارب اصلها مؤدبة ومتربية
تتعقدي انتي بقي
وتنحرفي
وتضييع حياتك عشان حضرتك مقدرتيش تتحكمي في نفسك شوية وتدوسي علي قلبك
طب والحب الكبير
وسهر الليالي
والمكالمات الطويلة
وبوس الايادي
والوهم الخداع
خلاص جيم اوفر
بالنسبة بقي لروحي الطاهرة
فمتقلقيش عليها
هتفضل برضة تهيم حول مدونتك بكل انتظام
بالنسبة بقي لحبك لغامض مدينة البلالا
فدي حب شرعي لا غبار عليه
ويجوز له تقبيل يدك
مع طبعا وجود حاجز يمنع تلامس لحم اليد
هذا والله اعلم



حافظي علي الواد
وحاولي تفهميه انك غاليه اوي وعاليه اوي زي نجمه في السما
مش رخيصة
اي حد وكل حد ممكن يبوس ايدها ويسرح بيها يومين

ملحوظة
يا ريت متخديش الكلام علي صدرك
انتي مش مراة ابويا يعني

masrawy 3'alabawy يقول...

كل ده يا فوزيه علشان مسك ايديك مكنتى تسبيه يمسكها يا فوزيه
ملحوظه للاخ اللى بيقول ان الواد لما يجى يتجوز هيتجوز وحده معرفتش حد اقبل كده يبقى ميش هايلاقى حد يدجوزه لو مسكه الايد بتعمل كل المشاكل دى

غير معرف يقول...

الاخ ابو نصايح اخويا وحياه ابوك وفر نصايحك دي لنفسك وياريت بقي نبطل كلنا حوار النصيحه الاخويه والشفهيه والمنيليه

كل واحد ياسيدي الفاضل متعلق من عرقوبه
وبعدين انت ايش عرفك بالولد اللي هيا بتتكلم عليه تعرف انت منيييييييييييين انه صايع ولا ضايع؟؟
مش هنبطل بقي نحدف الناس بالتهم واحنا منعرفهمش؟؟
وعلي راي المصراوي الغلباوي كنتي سبتيه يمسكها يافوزيه
يمكن كانت تطري في ايديه

monasosh يقول...

قال ايه بيعدينى!!

غير معرف يقول...

هيا بقت كدة
ماشي
بالنسبه للاخ المصراوي الغلباوي
الدنيا بخير حضرتك
والبنات اللي لسه ايديهم منبساتش كتيرررررر اوي
بس يمكن الوساخة هيا اللي بتظهر علي السطح
زي البحر بالظبط
لكن الشعب المرجانية والمية الصافية واللؤلؤ دايما مبيظهرش
لكن دة ميمنعش انه موجود وكتير

الابلة شيماء
بالنسبة بقي لمعاليكي
انا عن نفسي ممكن اجيب الف عذر لبنت غلطت وايديها انباست
كلنا بنغلط حضرتك ومحدش معصوم
لكن مقدرش اجيب اعذار لقوادي الكلمات ومزيني الباطل
حضرتك بتلومني علي نصيحة يمكن اكون انا شايف انها صح
لكن حضرتك الكلام مش جاي علي هواكي
ليه
؟؟؟؟؟
معرفش بصراحة
لكن انا اعتقد برضة ان اللي علي راسة بطحة بيحسس علي دماغ اللي جنبة عشان يشوف البطحة دي عند غيرة ولا لا
ولما قلت ان الواد بتاعها شكله صايع وبيلعب بيها
كان ليها اسباب
اولها ان سنه 30سنه يعني مش مراهق لسه وكمان برضة يعني مستواه الاجتماعي والمادي غالبا كويس
والانسه اللي ايديها انباست بلغت سن الرشد حسب كلامها
يبقي ايه المانع يخطبها
ويبوس ايديها زي ما هو عايز
علي الاقل الاوباش اللي زيي يحطوا في عينهم حصوة ملح
وميلسنوش علي ربة الصون والعفاف
لكن الواضح ان غامض البلالا مقضيها
وعاجبة الفيلم
وحكايه ان كل واحد متعلق من عرقوبة
طبعااااااااا يعني
وانا حضرتك مش مصلح اجتماعي
لكن
ساعات وانتي ماشيه وعربية جاية بسرعه وهتخبط حد بدون اي تفكير اول كلمه بتطلع من بقك
حااااااااااااااااسب
تفتكري دي بتطلع بتفكير
يمكن دة اللي حصل معايا
وبرضة
لو محاسبش انا مش خسران
موضوع بقي انه يمسك ايد فوزية
وانها تطري في ايدة
دة تفكير غالبا غلط
هيا مبتطراش
هيا بتنشف علي اللي بيمسكها بعدة
يتنحس
بتبقي خلاص مسكه سكند هند

الانسه ونحتسبها كذلك ماعت
هو فعلا هيعديكي
لكن انتي اللي هتختاري المكان اللي هتعدي ليه
وهيعديكي ويفضل جنبك
ولا
هيعديكي ويخلع منك




وعشان تاخدي الواد وش
المرة الجاية وهو بيبوس ايدك يبقي
قوليله
حمادة انا جايلي عريس
اظن معروفة دي
ويبقي احكيلي

استفهام
هو انتي برضة مقضياها ولا معشمه

masrawy 3'alabawy يقول...

بالنسبه للستاذ بتاع النصايح اللى شايف انهم لازم يتخطبه وبعد الخطوبه يعمله اللى هما عايزينه ال يعنى هو لو ولد وحش مش ممكن يفك منها بعد الخطوبه على العموم طول مافى ناس زيك عمالين ينصحو الناس عمال على بطال وهما امس مايكون للنصيحه صدقنى عمر البلد دى ما هتتقدم ولا هتشوف تقدم

غير معرف يقول...

والله انا ولا عندي بطحه ولا بحسس عليها ولا اي حاجه
انت اللي شكلك متناقض بتقول انا مش عارف ايه وايه وجاي تدي الناس نصايح

وكلام معات جه علي جرحك

3ala asm masr يقول...

معات بعيدا عن كل النصايح وكلام الدبش اللى عمالين تحدفوه لبعض انا عايزه اقولك ربنا يخليكوا لبعض

Camellia Hussein يقول...

بعيدا عن الخناقة دي
ياستي ربنا يسعدكم وتدوبو في بعض اكتر
والدنيا تنور جواكي اكتر
ودايما في حضن الشمس