السبت، أبريل ٠٧، ٢٠٠٧

بافكر فيك...نص ساعة بس

ورايا حاجات كتيرة لازم اخلصها للجامعة, و مذاكرة لامتحاناتى اللى قدامها اسبوع و تبتدى. و انت عارفنى بابقى عاملة مجنونة, و اقعد ابرطم على الناس و الدنيا اللى مش مديينى فرصة اركز و انجز الحاجات اللى ورايا, و اول اما ابعد عن البشر, و يبقى ماوراييش حاجة الا انى اركز على اللى ورايا, ابتدى اعمل اى حاجة تانية الا الشغل : اعمل حواجبى, اشغل موسيقى و ارقص , اكتبلك ايميلات طويلة و اطلع عينك بمكالماتى الكتيرة, اقرا كتاب, اجرب هدوم, او اى حاجة. لما ابقى خلاص صابحة هامتحن او لازم اسلم الشغل اللى كان مطلوب منى, تنزل عليا الجنونة و الحاجات اللى كانت المفروض تتعمل فى اسبوع او اتنين, انجزها كلها فى يوم واحد, بس بحرق اعصاب

النهاردة وعدت نفسى, اقرا فصلين بس من الرواية اللى جنب سريرى الايام دى, و ما اسمحش لنفسى افكر فيك اكتر من نص ساعة النهاردة
:)

قريت 7 فصول من القصة, و قضيت 3 ساعات بافكر فيك
3 ساعات بحالهم فضلت متنحة و سرحانة فيك. مفترية انا!! بس انت عارفنى, لما اعمل حاجة لازم اعملها بذمة و حماس

بتيجى على بالى فى اغرب الاوقات. ابقى فى وسط محاضرة , و المحاضر ممل و عمال يخرج عن الموضوع و فجأة افتكر حاجة مضحكة انت قلتهالى, فاضحك, و على طول اراجع نفسى, و استرجع تعبيرات الملل مع سنة الاهتمام اللى بيبانوا على وشى فى المحاضرات

4 حاجات بيحددوا ازاى هاستقبل كل يوم جديد: النور, الموسيقى , انت, و احلامى اللى انا لسة مكلبشة فيها

اكتر وقت باحبه اللى قبل ما انام على طول
وقتها ,بالعب لعبة بينى و بين نفسى. اوطى النور و اخليه يادوبك ضى خفيف, و اشغل موسيقى, امدد على سريرى و اسيب نفسى لخيالى و ليك
احاول افتكر شكلك اخر مرة شفتك, ملامح وشك, دخلتك عليا, و دايما احاول افتكر اكتر حاجة قلتهالى و اثرت فيا يوميها. و تبدأ المقاوحة بينى و بين نفسى
,هو قالى ايه؟
قاللى " كذا"
ايوة بس ما اقالهاش بالطريقة دى
بس قال حاجة بالمعنى ده
ايوة بس مش كدة, انتى كأنك بتنقلى معناه بس بطريقتك,
مش حقيقى
لا حقيقى هو مبيستخدمش الكلام كدة... و افضل كدة لحد اما ازهق من نفسى و اقرر اركز فى انا حسيت ايه وقتها , مش فى تفاصيل الكلام

اهو, ادينى باعمل نفس الحاجة تانى, بدل اما اذاكر قاعدة باكتب عنك

بكرة, مش هاقرا الا فصلين من القصة
و هافكر فيك نص ساعة
بس

تحديث: خلصت الرواية اللى هى 40 فصل, و ما اعرفش فكرت فيك قد ايه, بس اكيد مش نص ساعة بس

هناك ٤ تعليقات:

maged stephen يقول...

الحب بهدلة
و
الوحدة أيضا

يساري مصري يقول...

بصي من الآخر كدا انتي مجنونه آخر حاجه و انا مدمن قراءة تدويناتك
و اسلوبك في التعبير خلاني احس انني بسمع فيروز وهي بتتغنى عشقاً في البوي فريند بتاعها
كيب بوستنج انتي جامده
و على فكره مازيكتي انطبقت على مزيكت حد كدا انا عارف انوا هيقرا الكلام دا
بس طلع في فرق في الفريكوانسي تقريباً بس اسّه بنكون مع بعض اغنيه رائعه ل بينك فلويد

غير معرف يقول...

هممممم
الله الله قاعده تفكري وتقري وسايبه المذاكره تضرب تقلب؟؟

فكريني لما اشوفك اضربك
:D
مع انك واحشاني وبقالي كتييييييييييير مشفتكيش الا اني برده مش طايقاكي
قومي ذاكري يا بت انتي ومتخفيش بعد كده هتلاقي وقت كبير تسرحي فيه مش تلات ساعات بس

ممكن تقضي اليوم نوم وسرحان وشويه صالصا
بس بعد ما تخلصي امتحانات
;)

FATMA يقول...

مش هقولك ركزي في مزاكرتك
اصل انا عارفه انك مش هتسمعي الكلام
بس ممكن تخلي النص ساعة اكتر شوية
اكيد هتسمعي الكلام