الجمعة، ديسمبر 22، 2006

من جواب لم يرسل


فيه 20 سنة فى عمرى فاتوا و انت مش فيهم,نفسى اقدر اخليك تعيشهم معايا. جايز 20 سنة ولا حاجة فى حياة ناس تانية, بس هم دول السنين اللى خلتنى البنت اللى موجودة دلوقتى

مشكلتى انى بانسى كتير. ساعات بانسى حاجات مش المفروض تتنسى, و فجأة حاجة صغيرة صغيرة تفكرنى بيها و ابقى مش مصدقة ازاى نسيتها
فاكر لما قلتلك باحب كل طرق التواصل بالكتابة, ايميلات, جوابات, و مذكراتى الشخصية. جزا من حبى ليه علاقة بان فى حاجات بانسى قد ايه كانت حلوة بالنسبة لى . الكلمات اللى انا كتباها مع الصور, بتساعدنى افتكر اى احساس حلو كان ممكن ابقى حسيته فى وقت قبل كدة
زمان اصحابى كان كل اما تنتهى اى علاقة ليهم, سواء صداقة او علاقة خاصة اكتر ( خاصة على قد معيلتنا طبعا), كانوا يتخلصوا من كل الحاجات اللى ممكن تفكرهم بيها, لكن انا ما كنتش باعمل كدة. جزأ منه انى باخاف انسى التفاصيل, و الاقى عندى فراغ فى حياتى مش فاكرة حاجة فيه, و الجزأ التانى انى متخيلة لما اكبر الحاجات دى ممكن اضحك عليها ازاى, و افتكرها و استغرب نفسى. يعنى ده تاريخ البنت الهبلة اللى هى انا.

حياتى دى كلها عبارة عن قصاقيص ورق, و صور فى كرتونتين و درج. لو سحبت واحدة, مرة تبقى بتاريخ 1990. و بعديها ممكن 2003 و بعدين 1997, و اقعد انا اتوه فى وسط كل ده
ازاى ماكنتش زيك باستف كل حاجة فى ملف خاص, بنظام يسهل التعامل مع الحاجات بعد كدة؟
طول عمرى طفلة فوضوية. زمان كانت الهدوم بتاعتى كلها على الارض, بس كنت عارفة مكان كل حاجة
النهاردة هالبس البنطلون الاسود, اسيب اول و تانى كومة هدوم, و ادفس ايدى فى الكومة التالتة على الارض, و اطلع البنطلون الاسود و البسه...حلوة الدنيا

اتغيرت كتير , و غالبا لسة قدامى اكتر. بس فيه فى كام حاجة عمرهم ما اتغيروا
حبى للعلوم, حبى للعيال الصغيرين, و حبى للغنا و الرقص

انا واحدة بيفرق معاها اوى ان يبقى ليها مساحة خاصة. مكان بتاعى انا بس اقدر اقفل على نفسى فيه, و اقعد اقرا, اسمع موسيقى, ارقص, اجرب هدوم, امشى عريانة, اسرح فى احداث اليوم, او احاول اتخيل مشهد نفسى ابقى فيه...يعنى اقضى وقت لنفسى فى مكان بتاعى حتى لو حتة صغنتوتة اوى

انت عارف قد ايه باحب الناس, و يفرق معايا اوى انهم يحبونى. بس اول اما ابقى عايزة وقت لوحدى, بافصل تماما. قليلين اوى الناس اللى فى حياتى اللى باحس ان و انا فى حالة انعزالى , ممكن اقضى معاهم حبة وقت. انت منهم
لما ابقى عايزة انعزل عن الدنيا, بابقى قادرة اتخيلك حوالية. غالبا عشان هدوءك, و عشان انا باحس انى "انا" و انت حواليا, مش حد من كتر ما بهت الواحد مش عارف يتعرف عليه, و لانى و انت حوالية باقدر احتفظ بخصوصيتى, مش بالاقى اى ضغوط منك, و بشكل طبيعى بابقى عايزة الجأ لحضنك و احكيلك عن حياتى العبيطة

كفاية كدة, انا بانام على روحى...تصبح على خير

هناك 8 تعليقات:

karakib يقول...

اجمل الأفكار و الذكريات تولد و تنمو في لحظات الوحده ما قبل النوم

Maat يقول...

this post reminds me sooooo much of myself!!

nicely put Ma3t ;)

Manal يقول...

لول

مش مصدقة رسوماتك

:D

Ma3t يقول...

Maat
i am glad u said this, coz last time i read one of ur posts, u reminded me of myself. u said something about the letters that are constalntly in ur mind. i have this, i go around adressing people in my mind, describing things, explaining my feelngs, anger, or happiness. i thought of telling u then, but the similarities between us r quite freeky ;)

Manal:
ايه رأيك؟ مش رسومات صايعة؟ انا بافكر اسيب علوم و اتفرغ للفن
:)

زبادي في الخلاط يقول...

جميلة قوي الفكرة بتاعه العشرين اللي فاتو

رؤية جميلة واحساس عالي قوي

Ma3t يقول...

زبادى فى الخلاط
شكرا جدا...سعيدة بانك شرفتنا
:)

Dananeer يقول...

ده انا بعيد عن نعكشه الهدوم
لانى مريضه بالترتيب

بس فى ورقى و كل اللى حاجات اللى باشيلها تفكرنى
منعكشه جدا".

معت مش حاقولك اد ايه البوست ده بالذات علم
فيا
فيه حد ليا نفس هواياته و طقوسه
و قدر يترجمها فى كلمات
شكرا

Ma3t يقول...

dananeer
كان زمان موضوع نعكشة الهدوم, دلوقتى انا كمان مريضة بالترتيب. واحدة صاحبتى بتقوللى :هتجننينى, كل اما اتصل بيكى تبقى بتروقى اوضتك
بس عارفة يا دنانير, الواحد اصله ما بيتغيرش, لو عندى خروجة و عايزة يبقى شكلى حلو, تلاقينى عمالة اطلع فى هدوم, و فى خلال دقايق تلاقى الاوضة كأن مر فيها اعصار
بس على طول تلاقينى اكتئب من الكركبة, و ابتدى الم كل حاة مكانها
:)
مش عارفة اقولك قد ايه تعليقك اثر فيا