الأحد، ديسمبر 10، 2006

حالة هبل

الصورة تبتدى تتشكل فى خيالى. من اول اليوم باحاول مااديهاش فرصة تكمل
ششش ورايا مذاكرة
افتح الكتاب, ابتدى اقرا
سطر
اتنين
هو قاللى ايه ؟؟ كنا قاعدين مع بعض, و بعدين ك..
لا لا لا.ركزى شوية...ميكروسكوب , عينة, خلايا

مافيش فايدة
طيب هاقوم اعمل نسكافبه
اجيب النسكافيه, اترزع قدام الكتاب, المرة دى اخلص درس كامل, ابص فى الساعة, الوقت اتأخر و هو لسة ما اتصلش. اقاوم انى اقوم و اتصل انا
-بطلى ازعاج و دوشة يا بت, اديله فرصة يشتغل
حاضر
-و اتلمى و ذاكرى
ماشى... و فى دماغى اطلع لسانى لضميرى اللى مصر يأنبنى

اشغل اغانى اسمعها, و افتح الكتاب. الصورة تبتدى ترجع تانى, تعاكسنى, و حالة هبل تحل عليا
خلاص مش هاقاوم , هاسيب نفسى...اما اشوف ايه اخرتها
ارزع الكتاب على جنب و اغمض عينى
تبدأ الصورة ترجع , بكل تفاصيلها, و بكل حاجة حسيتها وقتها
فجأة
انا مبسوطة
الحياة حلوة

ضميرى يصحى, و محاضرة كل يوم تبتدى
-قومى ذاكرى, امتحانك بعد بكرة. بكرة هتتزنقى و تتوترى, و تقعدى تلعنى فى كل حاجة و كل حد خلاكى تدلعى و تطنشى المذاكرة
صح انا عارفة ده
احس على دمى, و يا دوبك بافتح الكتاب , تجيلى كلمات الاغنية اللى شغالة


يا حبيبى تعالى الحقنى شوف اللى جراللى

من بعدك

استسلم
ارفع العلم الابيض , و اقرر
خسارة انبساطى ده على المذاكرة, انا هاقوم ارقص

هناك 10 تعليقات:

frozen love يقول...

belzbt.....bs keda

Ghada يقول...

:))))
فكرتيني بالذي مضى.. وبالذات موضوع خسارة إنبساطي في المذاكرة ده!

shaimaa يقول...

يادي النيله

اقعدي غني وارقصي

بلا مذاكره بلا قلبه دماغ

ماشى الطريق يقول...

خسارة إنبساطى ده فى المذاكرة
لووووووووووووول
كانت على طول بتحصل معايا وساعتها كنت غالباً بانزل أعمل أى نشاط كده
حلوة فكرة الرقص دى
إزاى غابت عنى؟؟؟؟

مصرى يقول...

آه كل ما أفتكر كوضوع الإمتحانات و عدم التركيز
جيتي ع الوجيعة يا ماعت
ربنا يستر و أتخرج بقى لحسن أنا بقيت من جيل الرواد أو ممكن يتقال الآباء المؤسسين في الكلية

wael elgazawey يقول...

من الواضح ان جنان الامتحانات بدأ يتفشى بين كل الممتحنين.. لكل الامتحانات ليها مواعيد محددة بالنسبة للكليات والمدارس لكن في الحياة العملية الواحد بيمر كل يوم بامتحان جديد

Ma3t يقول...

حالة الجنان لسة معايا
و شكلها هتطول
يعنى جت عليها, اذا كانت الامتحانات هتفضل معايا لحد فبراير
اكيد حالة الجنان مش بس هتطول, دى هتزيييييييييييييد

Elsede3' يقول...

welemte7anat...
asl ana met3a2ad yabenty men elmawedoo3 da
walawen elgenan azraf keteer bardo men elekte2ab
ya rab 3ala toool mabzoota keda

masrawy 3'alabawy يقول...

احسن حاجه ان فى حاجه بتعمليها زى الرقص مثلا لكن انا كل حاجه بتسبب ليا الم مهما كانت حتى لو نكته!!!ه

elbadrym يقول...

الحقي استمتعي بأيام الجامعة بكل عبلها. لان بكرة تخلص و يشتغل الجنان الي على اصلة في حياة الشغل....عال الأقل في الجامعة الزنقة وقت الإمتحانات و الصيف كلة اجازة أما في الشغل فالسنة كلها أشغال شاقة...ده غير الملل من الروتين...صدقيني يا معت مفيش أحلى من حرية أسوار الجامعة...

احدى ضحايا كلية العلوم