الأحد، نوفمبر 30، 2008

يللا نهرب


انا تعبت من الحر و الدوشة
من اني كل يوم الصبح ادور على اسباب عشان اقوم من على السرير
الدنيا زحمة و مكركبة, و كل حاجة عايزة مجهود
و انا ماعنديش طاقة

انت بعيد عني , باحاول اوصلك بس دايما بنا ناس كتير,حوالينا ناس كتير,زحمة, كلهم بيتكلموا في نفس الوقت, صوتهم عالي
حاجات كتير لازم تتعمل, شغل لازم يخلص و شغل لازم يبتدي, ترتيبات كتير لازم تتم
رسالة ماجستير لازم تبتدي
حاجات كتير و من كتر تفاصيلها نسيت هي كان ايه الهدف او المكسب منها

كل اللي بافكر فيه اني اخطفك و نهرب بعيد عن الدنيا دي
نرمي نفسنا للبحر و نسيبه يبلعنا
الاول هتتضطر تتنفس معايا, عشان انت بقالك كتير برة المياه, بس انا البحر فاكرني و خياشيمي لسة موجودة
هتتنفس مني
بس دي مش حاجة وحشة, نص نفس لكل واحد فينا كافي جدا, لان هناك مافيش زحمة, مافيش ناس بيسرقوا منك النفس قبل ما يوصلك

انا بجد تعبت, يللا بقى نهرب قبل اما اخر تنتوفة طاقة باقية جوايا تضيع مني و حتى الحلم بالهرب مااقدرش عليه

هناك 3 تعليقات:

radwa osama يقول...

))

ناري يقول...

we were standing in a garden
and i had a machine that made silence
it just sucked up the whole opinionated din
and there were no people on the payroll
and there were no monkeys on our backs
and i said, show me what you look like without skin
...
in the garden of simple
where all of us are nameless
you were never anything but beautiful to me
they never really owned you
you just carried them around you
and then one day you put 'em down
and found your hands were free

Sara Swidan يقول...

الله على الكلام... في القلب على طول ..