الأربعاء، أبريل 02، 2008

عن كائن صغنتوت بيتاوب



الفترة دى غريبة اوى
عندى حالة كسل مرعبة, و فى نفس كل يومين عندى خطوبة او ليلة حنة, او فرح او عيد ميلاد. يعنى مش عارفة اندمج فى حالة الكسل بذمة
:)

من كام يوم كانت خطوبة قريبة عزيزة اوى عليا. كان يوم حلو جدا, العيلة كلها متجمعة, بنات العيلة كلهم متزوقين و شكلهم حلو, و كله كان مبسوط
فى وسط كل الزحمة دى, و احنا فى البيت اللى فيه الخطوبة كان فيه بيبى صغنتوتة بنت اخو العروسة, و الست اللى بتخلى بالها منها كانت محتاسة لانى البيبى مرعوبة من الدوشة و هى محتاجة تسيبها عشان تروح تزغرط فى وسط المعازيم لانها الوحيدة اللى بتعرف تدى زغروتة معتبرة.
انا كنت واقفة قدامها, و مش عارفة ليه تطوعت, فسلمتنى البنت و خرجت للمعازيم
حالة رعب حلت عليا. طول عمرى باحب الاطفال, و بالعب معاهم, بس دى يا دوبك لسة تامة شهر, و صغنتوتة اوى اوى
امها شافتنى و ضحكت على انى مرعوبة من كائن صغير كدة و اخدتها منى
قضيت ساعة بعدها باتفرج على البنوتة. كفها قد عقلة صباعى, و تفاصيله منمنمة و جميلة جدا
بعد شوية تشجعت و رحت شيلتها, و اخدتها فى اوضتها بعيد عن الدوشة و قعدت اغنيلها عشان تنام
ضمت ايديها و مسحت بيها عينيها و اتاوبت و انا حسيت انى باسيح فى مكانى
افتكرت واحد صاحبى من كام اسبوع فى عيدميلادى قاللى ان هو ده السن اللى البنات بتبدى تتهبل فيه على الخلفة, ضحكت و طنشت اللى هو قاله لانى عايزة اخلف طبعا بس مش لازم دلوقتى
لكن فى اللحظة اللى انا كنت شايلاها فيها لو كان حد قاللى انى حامل وقتها, كنا هانبسط اوى

بس بقى, ما حضرتش اللحظة بتاعة تلبيس الدبل و شرب الشربات لانى كنت باغنيلها فى اوضتها. و قضيت يومين بعديها عايشة جوة عالم خاص جدا و ليا انا بس, فيه فراشات و انا و بنوتة صغنتوتة بتتاوب
:)

هناك 6 تعليقات:

ربيع يقول...

بصراحه الرسم خرافي ، يعني المكنه الجديده دي مذهلة تماما

Maat يقول...

awwwww... this is sooooo cuuute!!!
well, I know exactly how all that feels.. umm... except the "i'd be happy if I knew I was pregnant" part, not there yet... thought still freaks me out!
bas yeah I love watching teeny tiny babies and counting their little details and singing them to sleep and hugging them and rocking them till I fall asleep myself. it just feels so damn peaceful, the whole world could fall apart and I wouldn't care!



missed your posts ya ma3toota ;)

radwa osama يقول...

اجمل حاجه انك تشوفى طفل بيتاوب ..لسه من كام يوم كنا بنبارك لبراء ودعاء على طفلتهم ..قمر ..تجنن .. على فكره الصورة حلوة ..حطيتها خلفية للكمبيوتر ..وحشااااااااااانى

mydmermaid يقول...

رائعة يا ماعت (:

التفاصيل الصغيرة في التدوينة تماشت مع التفاصيل الصغيرة في البيبي.

أنا فاهمة إنت حسيتي بإيه لما حضنتيها. إحساس إن كل حاجة زائفة واللحظة ديه بس هي اللي حقيقية.

الصورة فوق عن معبرة ومشرقة (:

shaimaa يقول...

خلتيني اعيط ربنا يسمحك
:'(((

Ma3t يقول...

ربيع
بلاش اقولك ايه اول حاجة جت فى بالى لما قريت تعليقك
"المكنة" صايعة جدا, ممكن تبقى تجربها و تشخبط لو عايز
:)

Maat
معتوتة :)
مواااااه

رضوى اسامة
هيهي سامعة صوتك و قادة اتخيلك و انتى بتقوللى " قمر...تجنن" , عاملة زى " "شنجلايف" كدة, ليكى طريقة خاصة و انتى بتقوليهم
انتى كمان وحشانى

mydmermaid
:)
انا لحد دلوقتى مش عارفة اوصف انا حسيت بايه, طول عمرى بالعب مع اطافيل و باشيلهم, بس كنت اول مرة اتثبت فى مكانى كدة
يمكن باكبر
:)
سعيدة بتعليقك

شيماء
ايه شغل التلاكيك ده يا بطاطسيتى بس, ليه ممكن تشوفى رسوماتى الهبلة اللى فيها ورد و فراشات و تعيطى؟؟؟
يا بلالا انتى :)