الأربعاء، يناير ١٦، ٢٠٠٨

فضفضة


طول عمرى باتعامل مع حياتى على انها زى قصص الاطفال, كل النهايات فيها سعيدة, الشرير مش بيفضل شرير , وكلهم بيعيشوا فى تبات و نبات و يخلفوا صبيان و بنات

لسة ماتعلمتش اتعامل مع اختفاء اشخاص من حياتى, سواء بانهم سافروا, او اتغيرو فافترقنا , او ماتوا

عندى احلام كتيرة اوى و خايفة تعدى عليا سنين و ابقى كل اللى عملته هو ان انا كتبت عنها و بس

عايزة اتعلم كويس و اقضى حياتى باشتغل و باتعلم بنفس الشغف اللى كان عندى من سنة باالظبط
عايزة انجوز الحد اللى باحبه و ابقى عارفة انى كل يوم بالليل هاتدفس فى حضنه و هاقعد احكيله حواديتى الكتيرة اللى مالهاش معنى
عايزة ابقى بارقص كويس و اعلم جسمى يبطل يخشب اول اما حد ييجى يرقصنى
عايزة اخلف عيال و كل يوم جمعة نتغطى انا و هم فى السرير و نسمع بابايا و هو بيرتجل حواديت زى ما كان بيعمل معايا و انا صغيرة

و عايزة اما اعجز و ابقى جدة يبقى عندى احفاد بيحبونى زى ما انا باحب جدتى, و عايزة وقتها يبقى هو جنبى و ايده لسة بتلمس خدى بنفس الحنية, و اقعد احكى لاحفادى و افكره هو بيوم على جزيرة , بشمس و هوا, و بموسيقى فى دماغ بنوتة عبيطة كانت لسة هتكتشف الحب

هناك ٦ تعليقات:

Maat يقول...

:) this is so incredibly cute!! and again ma3toota i can soo identify with this post! well... not the details, basically the 1st half and the spirit and the hopes!

AHMED SAMIR يقول...

على الرغم ان في الحالات اللي زي كدة بتبقى التعليقات من عينة ربنا يحقق لك اللي بتتمنيه ويرزقك بابن الحلال
الا اني هكون قاسي و اقوللك
عودي نفسك ان مش كل حلم بتحلميه هيتحقق ومش كل حد مرتبطة بيه هيفضل معاكي على طول لأن هي دي الحياة
محدش بياخد كل حاجة
تحياتي

غير معرف يقول...

غبتى كتير المرة دى
و لسه بتحسسينى بنفس الدفىء اللى بحسه لما بدخل مدونتك يا ماعت ..
:)
فكرة إننا لسه بنحلم ..فى حد ذاته شىء جميل و معجزة فى بعض الأحيان .!

ميرسى ليكى يا ماعت على أحساسيس حلوة بحسها هنا ..

حـدوتـة يقول...

:)))))

جميلة أوي أوي

وحياتك...كل ده هيحصل...وأحسن وأجمل منه كمان :))

حضن تفعيص

حمامة يقول...

كفاية انك تتكلمى عن احلامك البريئة دى
ربنا يقدرك وتحققيها واكتر منها كمان :)

LOST يقول...

جميله اوي..