الخميس، يونيو ٢١، ٢٠٠٧

لو سمحت, سيبنى اعيش


انا بجد تعبت
عارفة ان مافيش حاجة جدت فى الموضوع, كل البنات بيتسخف عليهم فى الشارع و بيتعاكسوا, و كل البنات بيكبروا مدركين ده و بيحضروا نفسهم للتعامل معاه
و موسم الصيف بقى الاوكازيون, الناس ماشية فى الشارع ماوراهاش غير خلق الله التانية اللى فى الشارع زيهم

بجد حرام, نفسى يرحمونا بقى
ايوة بامشى فى الشارع زى العسكرى, باحط سماعات فى ودنى و اسمع موسيقى و ماالتفتش لاى كلمة حد حدفها ناحيتى, باعمل نفسى مش سامعة و اكمل مشى زى ماانا
بس بجد ساعات باحس ان انا تعبانة, مش قادرة استحمل اكتر من كدة, بابقى عايزة اقف فى مكانى و اقعد على اى رصيف و اعيط
ايوة باعمل نفسى مش سامعة بس الكلام بيوصللى و بيوجع, و اما يبقى كلام كتير ورا بعضه باحسه بيتراكم و يطبق على صدرى, لحد اما احس انى باتخنق
يعنى مش من حقى اتمشى فى الشارع و اشم هوا؟؟
لازم كلام سخيف فى كل خطوة, و البهوات التانيين اللى عندهم عربيات و فاكرين ان حلم حياة كل بنت ان واحد يقفلها بعربية بتبرق. و انا بقى اركز مع العربيات, و لا مع الناس , ولا مع ايديهم اللى بيحاولوا يوصلوا بيها لاى جزأ من جسم اى بنت ماشية فى الشارع

جسمى ده ملكى انا ماهواش مشاع. مش من حق اى حد يتعامل معاه بحرية انا ماسمحتش بيها. زى ما الواحد ممكن يبقى عنده عربية بتاعته هو, او تليفون محمول بتاعه, شقة, سرير, اى حاجة. جسمى ده بتاعى انا, انا بس

اخدت سنين عشان افهم ان الغلط مش فيا انا, او انى مش المفروض امشى مأتبة , متكلفتة جوة نفسى , و جوايا باتمنى اتسخط و ارجع عيلة بتحبى
بس لسة فى مشاعر بتفضل جوة الواحد مهما حصل
لسة مع كل معاكسة باحس بالاهانة
و بالخوف
بس ماينفعش نبين الخوف, لأن لسبب غريب ده بيشجعهم على التمادى فى التعدى علينا. لازم نمشى زى العسكرى, و نبان صامدين, مافيش حاجة بتوصللنا , كأن كلامهم بيخبط فينا و يرتد بعيد, او لمساتهم بتتمسح باستيكة و مش بترجعلنا فى كوابيسنا

كنت نسيت احساس الخوف ده, اتعودت على ان الاحساس المسيطر يبقى القرف,
لحد النهاردة
فجأة ولد طلع من وسط اصحابه و نط حاول يلمسنى, اتفاجأت , و اترعبت , و هم شافوا ده و ضحكوا

عايزة الناس ترحمنا بقى, يحوشوا ايديهم عننا. و يستخدموا الكلام فى حاجة افيد, البشرية لما اخترعت الكلام كان عشان يتواصلوا مع بعض مش عشان يعذبوا بعض

نفسى فى طاقية اخفاء, عشان اقدر امشى فى الشارع على راحتى , مايبقاش مطلوب منى اركز مع كل واحد ماشى , واقف, او راكب عربية فى الشارع و اركز فى ازاى اتفاداه من غير اما يبان انى باتفاداه عشان مااشدش انتباهه ليا
عايزة بيقى ينفع انزل اتمشى فى الشارع, احس بالهوا بيخبط وشى, ابص فى فتارين المحلات, و اقف عند بقال اشترى كيكة و امشى اكلها فى الشارع.
اسمع موسيقى, احس بالاضاءة فى عينيا بتتغير, اتفرج على حركة العربيات و الناس و اتخيل نفسى فى مشهد من قصة او فيلم من خيالى
عايزة امشى مرتاحة, مبسوطة, او حتى زعلانة و مشغولة بهمومى.
عايزة اعيش و استمتع بالحواس بتاعتى, بالسمع و البصر. مش اكتمهم عشان اعرف اعيش
عايزة يبقى عندى حرية الاختيار فى انى اركز فى التفاصيل و الاحداث اللى بتحصل حوالية, او فى انى اخليها تبهت فى خلفية خيالى



هناك ١٦ تعليقًا:

ربيع يقول...

يا فندم علاء سيف ماكنش بيهزر لما اتكلم عن ابرة التريكو ، دي أسهل و ادق الحلول

غير معرف يقول...

بصي من الآخر بقى الموضوع ده مش هيتحل و مفيش حاجة تعمليها غير أنك تسيبي البلد

معرفش أوصفلك شكل منال بيبقى عامل ازاي لما بنسافر، مبفهمش حجم المأساة الا لما أشوف شكل منال بيتغير ازاي لما بنسافر، مجرد أنها بتمشي في الشارع من غير خوف من اللي حواليها بيغير مظهرها الخارجي تماما، حمل كبيييييير انشال و بني آدم كان مسجون و اتحرر

بجد بجد بجد بجد يا ماعت سافري و سيبيها، و ارجعي كده كل صيف كام أسبوع عايشة في وهم رومانسي أن بلدك أجمل بلد في الدنيا زي خالتك ما بتعمل و خلاص

غير معرف يقول...

عارفه انا فعلا بكره نفسي فعلا
الموضوع بقو بيتعاملو معاه انه حق مكتسب ليهم
انك تلاقي واحد حاطط ايده علي رجلك في المواصلات ولما تزقيها يستغرب قوي انك بتزقيها كانه من حقه انه يحط ايده عليكي
ولو اتخانقتي تبقي انتي اللي شجعتيه اصلا وانتي اللي عملتي وانتي اللي نيلتي
عارفه انا فعلا عاوزه اسبها وامشي خلاص كرهتها مش قادره كرهتها وكرهت اني انثي
طب عارفه من يومين بالظبط كنت في التحرير وخبطتني عربيه ووقعت والناس اتلمو انتي عارفه حسيت بحاجه كده رحت بصيت للحيوان اللي كان واقف ورا ضهري وقلتله حراام عليييك وانفتحت في العياط
كلهم افتكرو اني بعيط من الخبطه وبس
بس انا كنت بعيط من القهره حاسيت اني مشلوله مش قادره احمي نفسي

santakarim يقول...

i agree with alaa, hia de albald, we dol nas albald, aly mosh 3agbo yamshy...

Dananeer يقول...

يااه يا معت جيتى على الجرح
و اتغاظتيلنا

بجد حاجه تقرف
ولا اكننا فى سوق نخاسه
200 300 400

عواجيز بقى عيال شباب مش فارقه
كله معدندوش دم
و اولهم العساكر و بتوع الامن

اكتر حاجه باتمنى اسافر عشانها ده
الحريه فى انك تتصرفى على راحتك
من غير ما حد ينتهك خصوصياتك و اولهم جسمك

و المشكله ان الحاجات دى بتعلم فى الواحد
و اننا بنحب البلد

arabesque يقول...

انتي عبرتي صح وحلو أوي
وكلام علاء عن شكل منال اللي بيتغير برا كمان صح جدا
من كم سنة كان حظي إني أسافر أسبوعين ألمانيا
لما رجعت كانت إجابتي على سؤال إيه أكتر حاجة عجبتك هناك حاجتين أولهم الحرية
و الحرية كان معناها بالضبط إني بأقدر أمشي -وتخيلي- أجري في الشارع من غير ما حد حتى يبص عليا

انتي بالضبط عبرتي عن كلام "إنسان" بني آدم عادي جدا عايز يمارس حقه أن يكون...يكون في طريقة لبسه وحركته ومشيه في الشارع

انك بقى تفهمي الكلام ده للمجموعة المستبيحة للأعراض أو للمجموعة التانية اللي عايزة تفرض رأيها في اللبس - سواء نغطي أو نعري- تبقي كفرتي
ولو قلتي ده مش معناه تتخلى عن قناعاتك في اللبس و لا في أي شيء بس برده معناه تحترم خيارات "الإنسان" اللي قدامك يا إما تبقي بتتكلمي في هلاميات ومع مستوى وعي مش مستحمل أصلا انتي بتقولي إيه
يا إما تكوني كفرتي برده

الحل: تفضلي تعملي اللي انت عايزاه و برده تمشي رافعة رأسك مش متأثرة مهما كان حساب ده على أعصابك
أو تسيبي البلد وده الاختيار اللي أنا لسه مش معاه وبأكرهه

غير معرف يقول...

يا اربيسك يا حبيبتي
الحل بتاعك دا يبقي في الحلم وبس
مهما سديتي ودانك بالقطن بقي او المزيكا او اي نيله
الكلام هيوصلك
نظراتهم بتقول انيل من لسانهم
انا فاكره كويس قوي لما حكيتي عن رحله المانيا فاكره تعبيرات وشك ساعتها كان منور واحساس الحريه مسيطر عليكي
بس برده هنا لا لا الموضوع بقي بيسوء اكتر واكتر
خلاص قفلو مخهم علي النقطه دي ومبقتش تفرق بقي عريانه ولا محجبه ولا نص ونص
كله زي بعضه
عارفين كارتون توم وجيري لما توم بيتخيل ان جيري دا قطعه لحم ماشي قدامه
اهو احنا بقينا كده مجرد حته لحم واللي يلحق يخطف منها حته

غير معرف يقول...

فعلا زى ما علاء قال..الحل انك تسيبى البلد دى لإن الناس مش هتتغير و اللى بيعاكسوا مش هيبطلوا معاكسه

Nour يقول...

والله يا ماعت لسة راجعة من برة من شوية و أنا و واحدة صاحبتي كنت بقولها شوارعنا دي مبقاش يتمشي فيها خلاص
:S

محدش خلاص بقى بيلم نفسه و يحط لسانه جوة بقه.. و إحساسك بالإهانة ده صدقيني مشترك جدا..

متزعليش يا بنوتة يا جميلة.. و على رأي برايز.. العيب مش فيكو.. العيب في النظام
;)

غير معرف يقول...

بجد عبرتى عن المأساه اللى الواحد بيواجها كل يوم بطريقة صادقة اوى و المشكلة ان الولاد عمرهم ما حيحسوا اد ايه احنا بنعانى و اللى يغيظ ان فى ولاد بيفتكروا ان دى حاجة بتبسط البنات
الواحد بقى بيفكر الف مرة قبل ما ينزل يعمل مشوار على رجله او يتمشى على الكورنيش من كتر الأرف اللى بيشوفه
انا كتييييير اوى بأفكر اهاجر بسبب الموضوع ده لأن الواحد لما يسافر بره و يحس بمتعة التمشية فى الشارع يكره انه يمشى فى شوارع بلده
الواحدة بره حرة تلبس اللى هى عاوزاه و تمشى بالطريقة اللى تعجبها و هى ضامنه ان محدش حيفكر يبص عليها و يفصص جسمها
اما فى بلدنا فلو لبسنا خيمه فبرده مش حنترحم
و اللى ينرفز الناس اللى تقولك ان السبب فى البنت و فى طريقة لبسها و ماشيتها نفسى اعرف دول عايشييين معانا و بيمشوا فى شوارعنا ..... جايبين الفكرة دى منين انا مش عارفه

و اللى يكسف ان الواحدة بتتعاكس من ناس فى سن ابوها .... مفيش دم
الشوارع مليانه بالحيوانات اللى مش عارفين يتحكموا فى غرايزهم

زى ما بيأمروا البنت تبقى ملتزمة بلبسها ما الاولى نتشطر على الشباب و نقولهم يغضوا بصرهم

انا زمان مكنتش برد على المعاكسات بس كان حيحصلى حاجة من كتر مأنا عماله اهرى فى نفسى
دلوقتى كل ما حد يعاكسنى لازم امسكه اهزأه وسط الشارع و اعلى صوتى و افضحه
و كتير منهم بيتخضوا من رد فعلى : منهم اللى بيخاف و يجرى و منهم اللى بيعتذر و قليل منهم اللى بيكمل تمادى فى الموضوع
و احلى احساس لما اهزأ واحد وسط صحابه و يقوم صحابه ضاحكييين عليه

انا نصيحتى للبنات انها ماتسبش حقها و كمان تنزل الشارع براحتها فمش عايزين كمان نسمح للولاد انهم يطردونا من الشارع و يتحول مجتمعنا لمجتمع ذكورى اكتر مما هو عليه الأن
و متفتكروش يا بنات ان العيب فينا .... العيب فى الحيوانات المريضة اللى مليييييييين الشوارع

عبقرينو يقول...

لأ بقى أنا معترض
الحل مش انك تسيبى البلد وتمشى....انا مقضيها سفر على طول ..بالف فى كل حته اللى بتشوفيه فى مصر هتشوفيه برده بره...بس الفرق أنك لو طلبتى التدخل من الشرطة تلاقى قانون بيتنفذ ...فى مصر عندنا فيه قانون لكن مش فيه تنفيذ
علشان كده الحل بسيط جدا جدا وانتى كمان كلية علوم يعنى زميلة درب وكفاح
شوية افتكاسات كيميائية كده أو أفكار جهنمية ...ممكن حل الإبرة ده بس ده حل أى حد غير ناس من كلية العلوم...أعملى غاز ثانى اكسيد الكبيريت خليه يلعن اليوم اللى شافك فيه وحاول يعاكسك..أوخل مركز أو فورمالدهيد كده وأرميهوله فى العربية هيخلى العربية ريحتها زفت
كل دى حاجات بسيطة وسهلة لو زودت عنكده هيتقبض عليا بحجة باعلم الناس ازاى يصنعوا متفجلاات ..ههههههههههه
ربنا يحرسك وثقى فى نفسك وبلاش فكرة السفر ديه

Searcher يقول...

العزيزة ماعت
لأن ردى كان طويل جداً ففضلت أنشره عندى فى المدونه
http://basoom.blogspot.com/2007/06/blog-post_24.html
مع تحياتى و مساندتى لكل من تتعرض لتلك المواقف
باسم

الأغاني للرأفتاني يقول...

فى حاجه غلط..كنت ماشى مع واحد صاحبى مصرى فى نيويورك.. وذهبنا للبارك ووجدنا مجموعه من البنات بياخدوا حمام شمس بالبكينى.. وجنبهم راجل قاعد يقرأ
سألت صاحبى تخيل لو البنات دول فى مصر؟ قالى كان زمان فى انقلاب فى الحكم..قال لى ان فى مصر بيبرروا الاسلوب الهمجى ده..علشان الشباب ما بيقمش علاقات غير شرعيه قبل الزواج..وان احنا هنا فى الغرب سهل هذا النوع من العلاقات.. والحق اقول انه تحليل معيوب..فاخلاق المجتمع بتاعنا وشبابنا فى النازل.. وان كل انسان محترم المفروض يحترم حريه الانسانه الاخرى..سواء كانت محجبه او غير جسمها حلو او وحش..ولكن هى التفاهه

ربنا يسترك انتى واللى زيك

maxxedout يقول...

ربنا معاكو بجد

Blank-Socrate يقول...

انا اسف للى بيحصل
و ربنا يسامحهم على التعدى اللى بيعملوه لانه خطأ عظيم

3ala asm masr يقول...

انا كمان زيك والله بمشى اتلفت حواليا فى كل شارع خايفه حد يطلعلى فجاه ويعمل حركه مش ظريفه
والحاجه اللى تجنن وتخلى الواحد يشد فى شعره انهم بينبسطوا اوى وبيقعدوا يضحكوا كانها شجاعه منهم مثلا او عمل وطنى الكل بيحيه عليه
احنا لازم تفكيرنا يتغير شويه ولازم وسائل الاعلام تعمل حملة توعيه ولازم الشرطه تبقى موجوده فى كل مكان وتاخد الحلو اللى بيتباهى برجولته اودام اصحابه يعرفوا ايه هى الرجوله
لازم فعلا يكون فى دور من الشرطه وحسبى الله ونعم الوكيل