الخميس، مارس ٢٩، ٢٠٠٧

مزيكة حياتى

قد ايه الموسيقى بتفرق فى مزاجى

كل يوم و انا فى طريقى للجامعة, او رايحة اى حتة تانية, لازم ابقى باسمع اغانى

اتجنن لو ماكنتش فى اغانى شغالة فى ودانى, اسرح معاها, و اتاهل الناس اللى حواليا

ممكن ساعات ابقى مركزة مع الناس اللى فى الشارع, و الموسيقى اللى باسمعها نحل محل دوشة المشهد. لكن ساعات تانية بابقى اصلا مش معاهم فى الشارع, بابقى سرحانة فى مشهد تانى, دنيا تانية فى خيالى

وقتها الاغنية اللى باسمعها ممكن تحطنى فى حالة حب, تنقلنى لمكان تانى ابقى بارقص فيه, تنقلنى لحبيبى , امشى صوابعى على وشه و اضحكله, او تنقلنى لبحر اتمشى على شطه

طوال عمرى نفسى فى موسيقى تصويرية لحياتى, موسيقى دايما تبقى معايا و تعكس حالتى المزاجية

و ابتديت اسرح


لو كل واحد فينا فعلا عنده موسيقى تصويرية خاصة, ملازماه فى كل لحظة فى يومه

يااه اصحى الصبح مرة و تبقى فيروز بتغنيلى " صباح و مسا" , بالليل سعاد ماسى تغنيلى " مسك الليل"

تركب المترو , تبقى الدنيا لخبطة, اغانى و موسيقى من كل ناحة, بس كل واحد حاسس بموسيقته اكتر, كأنها فقاعة هو جواها, و بقية الموسيقى تبهت فى الخلفية


و مرة امشى فى الشارع, و الناس تعدى عليا بمزيكتهم.

فجأة واحد يعدى و موسيقته هى موسيقتى تمام, نتسمر فى مكاننا, و نتنح لبعض



فى لحظتها نعرف ...ده الحب من اول نظرة

من غير كلام نمسك ايد بعض, و نمشى مع بعض. الدنيا تعدى علينا, و سنين تمر و احنا ايدنا فى ايد بعض. نحب فى بعض, نخرج, نتفسح, نتخانق, نتصالح, ننام فى حضن بعض, نتجوز, و ابقى حامل

و يوم الولادة, موسيقتى تتصاعد مع كل دفعة باحاول اخرج بيها بنتنا, هو يبقى جنبى محتاس و موسيقته توصلى ناعمة , حنينة بتحاول تطمنى, و بدفعة اخيرة تطلع البنوتة

نمسك نفسنا انا و هو, و موسيقتنا تقف, و امد ايدى اخد بنتنا و اقربها لصدرى, تبدأ موسيقتها تبان ضعيفة فى الاول , و سنة سنة تعلى

نضحك

و للحظةحلوة صغيرة, موسيقتنا تبقى واحدة, انا و هو و هى

هناك ١٥ تعليقًا:

حـدوتـة يقول...

جميلة يا معت :)

4thH يقول...

يخرب بيت جمال خيالك
:))

..

انا بادور حاليا على واحده تكون مزيكتها : يا بنت جملك هبشني

Mohamed يقول...

احساسك حلو قوي وخصوصا حكاية الفقاعة دي أنا بجد طول عمري نفسي كل واحد يكون في فقاعته بالذات في المترو ..:)

karakib يقول...

كلماتك بترقص مع مزيكتك
حلوة

Aladdin يقول...

يا ريت ماينهيش المود الجميل دا بمحاضرة سخيفة أو مترو مزدحم عن آخره بالركاب!!

Dananeer يقول...

جميله اوى يا معت

الدنيا من غير موسيقى الحياه و موسيقى القلوب متنفعش
ده قوت

حلو اوى لحظه الولاده

Shower-Mirror يقول...

اللى انتى بتقوليه ده ناقص بس يتكتب على ورق ... و يبقى حاجه اسمها سيناريو ....


تحياتى على خيالك لجميل ..

ابقى زوريينى

Maat يقول...

:) :) :)

seebek en i like your post... bas ezay keda.. there has to be a limit lel similarities.. i can't do anything without music in my ears also... and if not.. i hear it in my head.. and yess.. it takes me to places and scenes.. it's amazing

loved ur post :)

غير معرف يقول...

يا ماعت
شوفت مرة فيديون كليب في صورة شبه اللي رسمتيها بس عن واحدة بترقص على طول :)
كان دمه خفيف قوي و برضه كان فيه نفس فكرة مشهد الولادة
تن شاالله تصحي تلاقي حيانك كلها مزيكا يا ضي عيوني :D

Elsede3' يقول...

wow
that was sweet

bemonasbet elmazeeka, i didnt invite u to el so7bageyya right???
damn me

ألِف يقول...

"لو كل واحد فينا فعلا عنده موسيقى تصويرية خاصة, ملازماه فى كل لحظة فى يومه"

كنت بافكر الفكرة دي زمان

لكن الحقيقة ما جتليش فكرة أن ما تنين موسيقاهام تتوافق يتعرفوا على بعض!

monasosh يقول...

حدوتة
شكرا جدا
:)

هيثم
خيالى هو اللى معيشنى
لو لقيتهالك هأبلغك على طول

محمد
شكرا جدا
هيهي تخيل كل واحد ماشى بفقاعته :)

كراكيب
دايما كلامك بيبسطنى
ماتقطعش الجوابات

aladdin
ليه بس مخك يروح لاجات سخيفة كدة, زحمة و محاضرات, خلينا فى الحب من اول نظرة و الولادة
:)

دنانير
شكرا كتير
انا ما اطيقش الدنيا من غير موسيقى
:) انا كمان انشكحت بلحظة الولادة دى

shower-mirror
شكرا جدا

maat
اه انتى حكايتك حكاية
كل اما واحدة فينا هتكتب, التانية تلاقى نفسها فى كتابتها
انا خايفة اشوفك تطلعى شبهى
انا كنت حاسة انك زيى فى موضوع الموسيقى, من ساعة اما كتبتى انك بتمشى تقولى رسايل فى دماغك و انا قلت, الجنان بتاعنا اصله بييجة حتة واحدة
:)

قطر الندى
افتكرت دلوقتى الاعلان ده, مش بيتقابلوا الاتنين على سلم متحرك؟؟

حياتى دايما زيكة, المهم انها تبقى المزيكا الصح, زى مزيكة فيلم اميلى

el sede3'
thank u ketiiir
nope u forgot to tell me , but never mind, another time

الف
هاها اكيد الفكرة دى ماجتلكش, بس تقول ايه مواليد التمانينات بيبقوا دايما خيالهم اوسع
عامة كويس, عشان لو كان بالموسيقى, كنت انا و انت اول اما اتقابلنا قتلنا بعض :)

يساري مصري يقول...

خيالك مجنووووووووووووووووووووووون
انا سمعت مزيكا في و داني مع كل مشهد بتوصفيه
i'm speechless really have nothin too say but I ADORE THE WAY U DO IT

Bou-ME يقول...

قد ايه كلامك ده جميل جدااااااااااااااااا....عارفة فاكرني بايه؟؟
فاكرني بصفحة ضربة شمس في جرنال الدستور و بمقالات خالد كساب... برضوا بسرح معاها في خيالي و بنسى كا الامي و حالات الملل الي بقت أساسية في حياتنا....
و زي ما جاهين قال : أحسن ما فيها العشق و المعشقة
و شويتين الضحك و التريقة
شفت الحياة لفيت لقيت الألذ
تغييرها و ده يعني التعب و الشقا
و عجبي !!!

غير معرف يقول...

قليلون من هم في سكناتهم وحركاتهم تكمن الموسيقى ...والبقية عدم بكل وجودهم