الاثنين، ديسمبر 27، 2010

من مذكرات الساحرة




كنت دايما بارجع لكلامه في دماغي لما اتوه عن نفسي

بافتكر ازاي بيشوفني صغيرة و نقية و لسة يا دوبك باستكشف بخطوات صغيرة عالم جديد مثير

كل اما اكبر كل اما تخبطني اكتر قساوة الدنيا. السنة اللي فاتت اخدت خبطات مؤلمة جدا. اعترف بان فيه منهم كنت رايحة لهم بكامل ارادتي , لكن فيه منهم اخدتهم على غفلة. خسارته كانت على غفلة ,و الغريبة انها اكتر خبطة وجعتني

  سنتين كنت قاعدة متصورة اننا بنمر بمرحلة في صداقتنا و هنسترجع علاقتنا زي ما كانت زمان., بس اكتشفت ان دي خيالات العيلة اللي جوايا و ان الحقيقة ان فيه علاقات فجأة بتغير مسارها و لازم الواحد يتقبل ده و يحاول يستكشف الطريق الجديد.

بس من فترة قريبة قابلته, و للحظة استرجعت ومضات من علاقتنا القديمة.
.كنت صاحية في حالة تسامح مع الدنيا و في حالة حنين للناس اللي ممكن يحيوا جوايا النسخة الملونة مني. فكلمته و قابلته.

من زمن ماحستش بالراحة دي في الكلام معاه. ماكانش فيه ادعاء, ماكانش فيه توقعات و ضغوط و غيوم سودة طابقة على روحنا. الطبقات القاسية اللي اكتسبناها على مدار سنين دابت و رجعت انا البنت الصغيرة اللي بتحاول تدعي الشجاعة و تواجه الشارع, و هو الولد الجدع اللي تبناها في صمت.

كان نفسي احكيله ازاي مشيت و انا ممتنة اليوم ده. اكنت عايزة شكره على الدفا, الذكريات, الرضا, الدلع,بس اهم من ده كله , على انه ساعدني اضيف اخر غرزة في جرح  كنت فقدت الأمل في انه يلتئم.

ملحوظة: التدوينة دي بدأت في كشكول الساحرة الشريرة في يناير و اكتملت النهاردة :)

هناك 5 تعليقات:

غير معرف يقول...

أحبك يامنى .. احب اقرا لك رغم كل الاختلاف الذي بيننا قيميا . ربنا يوفقك ويسعدك، وتقابلي الانسان اللي يحبك بجد وتحبيه بجد وتعيشوا حياة جميلة

غير معرف يقول...

يومها مأخدتش بالها اني كنت بحاول بس اظبط نفسي .. بحاول اني اكون انا .. من غير ماسكات من غير اي شئ , مشت وهي مبسوطة انا واثق من دا , لكن وانا في طريقي للبيت كل كلمة وكل تفصيلة بدات تهاجمني .. هو انت صح؟ هو انت اتسرعت؟ هو ليه الحفر زادت لدرجة بقت حفرة واحدة كبيرة؟ وهي ماشية وبعد السلام وكل الكلام دا حاولت اني مبصش ورايا لاني عارف ومتاكد اني هتعب زيادة لاني هفكر ازيد كان فيه كلام كنت عاوز اقوله ليها
بس الكلام كله بقوله دلوقتي
لوحدي .. من غير اي معني
او من غير اي روح
شطارة الساحر
انه بيخلي الناس مركزه مع ايده اليمين
بينما الشغل كله
بيتم بايده الشمال
يمكن اكون كدا
او يمكن اكون مجرد
ساحر فاشل
جديد.

غير معرف يقول...

انت انسانه تستاهلى كل خير والله..انتم يا بنات عليكم شوية احاسيس كونيه جده ..بس للاسف مابيبنش عليكم

نيللى يقول...

كل اللى أقدر أقوله ..لو فى إنسان بيحب إنسان وشايفه ان ده هو حب عمره ,فسحقا لأى أوجاع أو أختلاف أو أى مشاكل..لأن ببساطه الدنيا والعمر بيمر بسرعه لايتخيلها أحد ,وساعتها بيأتى الندم على كل التصرفات ,فكل إنسان يعمل وقفه مع نفسه ويصارح نفسه ,كتير ناس خسرت ناس ومع الوقت بتعرف أنها خسرت أحلى حاجه فى حياتها ..

mohamed elgammal يقول...

بجد جامدة اخر شويه حاجات مع بعضيهم بس نصيحتي استخدمي ثوريتك ونضالك من اجل الحصول على ما تريين انك تستحقينه قاتلي من اجل حلمك فبعض الاحلام لا تاتينا في العمر الا مرة واحدة