الجمعة، مايو ٠٢، ٢٠٠٨

عن البحر و خرافات اخرى




زمان و انا صغيرة كنت باكلم البحر

ايوة باكلمه, و كان بيسمع كلامى
اقول له اعمل امواج كتيير... اليحر يثور و يتحول كله لرغاوى بيضا , ارمى نفسى جواها و اسيبها ترقصنى و ترمينى من مكان لمكان
اوشوشله بالراحة عشان يهدى... يسمع الكلام و يبقى حنين عليا و بالراحة يشيلني على سطحه و يسيبنى انام

ماهو انا فى الاصل مش زيكوا, انا فى الاصل كائن صغنتوت من البحر, شرد على الارض من باب الفضول.
كان نفسى اقابل ناس جديدة و اكتسب الوان مختلفة, فطلعت من المياه و سرحت
من ساعتها و انا باتخبط و الدنيا بتلعب بيا
حبة ابقى مبسوطة و الالوان تسيح فى دماغى. اسمع موسيقى جايالى من بعيد تلف حواليا, تستقبلها الاول اطراف شعرى فتتحول لشرايط شوكولاتة دافية تبلعنى جواها
و حبة ابقى زعلانة و محبطة, و اشوف الوانى بتتسرب منى, احاول امسكها و اقفل ايدى عليها بس بالاقيها بتسيح و تهرب من بين صوابعى

حاولت افتكر انا كنت انهو كائن فى المياه بس مااعرفتش
فاتت سنين كتير و انا اتغيرت و ذكرياتى عن حياتى قبل كدة بقت مشوشة
هو انا اكيد كنت من الكائنات اللى بتعيش قريب من سطح المياه, عشان انا جزأ منى من الشمس, و لو غابت كتير عنى جناحاتى بتكرمش و بتتكسر حتى من احن لمسة

ايه ده! انا قلت جناحات, يبقى انا اكيد كان عندى جناحات وقتها لانى دلوقتى مش شايفاهم, و لو ان اللى يدقق فى تفاصيل ضهرى هيلاقى ندبتين صغيرين زى الوشم ملونين فى ضهرى , و عمرى ما كنت عارفة هما ايه .اكيد هما بواقى جناحاتى, او الاحلى من كدة يمكن دول براعم لجناحاتى الجديدة و لازم بس اكتشف طريقة انبتهم تانى

كمان انا اكيد كنت كائن مايص, حد كدة بيتمرمرغ فى الطينة الصبح و يتشمس , زى سيد قشطة كدة مثلا او كلب البحر. شبههم يعنى بس مش زيهم بالظبط, لانى صغير و عندى جناحات
و كمان لانى سريع جدا و كنت باتنقل من مكان لمكان, ماهو عشان كدة انا عندى حكايات كتير بابقى عايزة احكيها, و صور كتيرة فى خيالى عن احداث حصلتلى او حصلت لحد شبهى .ماهم بيقولوا عليا رغاية
و بعدين جايز يكون ده كمان السبب اللى ورا انى بازعل لو حد مااعرفهوش كشر فى وشى فى الشارع. مش جايز يكون كان قنديل بحر قابلنى قبل كدة فى المياه بس مااخدش باله . يعنى ممكن نطلع معارف, طيب ليه التكشير!!!

بس كأن بمرورالسنين بافقد حبة حبة اتصالى بالمياه و الشمس و الطين
من كام يوم وشوشت البحر و رميت نفسى جواه و انا مغمضة عينى و مطمنة
حسيته بيطبق عليا, سمعت نفسى بيزيد كأنى مقفول عليا فى صندوق مكبر للصوت
حسيت الميه بتبلعنى جواها , وفجأة لفظتنى لبرة على الرملة كأنى جسم غريب عنها
و الشمس هربت منى و استخبت ورا السحاب
و حسيت بوجع سخن في الندبيتين اللى فى ضهرى
جريت على البيت و بصيت على ضهرى فى المراية, لقيت جرحين صغيرين بينزفوا الوان


هناك ١٧ تعليقًا:

m.sobhy1990@gmail.com يقول...

عجبنى البوست قوى
إحساسك جميل

والمدونة كمان جميلة

فيه زيارات جاية أكيد

حـدوتـة يقول...

جميل أوي :)))

أقول لك سر: أنا كمان كنت باكلم البحر وكان بيسمع الكلام.. اتغير أوي البحر عن زمان.. وإحنا اتغيرنا أوي أوي

ياسمين حميد يقول...

الله
لما اقابلك حابقى ابتسم في وشك
مش جايز البحر اللي كنتي منه... كان على الكوكب بتاعي؟
;-p

غير معرف يقول...

:)
This is beautiful ya Ma3toota!!!
fe kam 7etta fel awel fakretny b a couple of things I wrote :)
I love it, you're the best!

غير معرف يقول...

ده من أجمل الحاجات اللي قريتهالك. رائعة بجد يا ماعت! بسيطة لكن مبدعة وصورك زي ماتكون أطفال لسه مولودة؛ ناعمة وبريئة!

برافو عليكي من هنا لبعد بكرة! :))

ألِف يقول...

أنا كمان كنت باعمل كدا.

الست نعامة يقول...

يظهر كلنا كنا كده ولا ايه؟؟ أنا كمان باعمل كده بس البحر لسه بيسمع كلامي :-) ممكن عشان أنا سمكة؟ هقوله المرة الجاية يسمع كلامك وم يلفظكيش.

Eman M يقول...

اقول ايه بس
جميل أوى

monasosh يقول...

محمد صبحى

شكرا جدا على تعليقك

و المدونة تناتيفها بترحب بيك فى اى وقت

:)


حدوتة

حدوتى الجميلة, ليكى وحشة اوى
ايوة احنا اتغيرنا, كل اما بنكبر كل اما اولننا بتبهت اكتر

ياسمين
فى انتظار ابتساماتك
:)

Evaluna
Mwaaaaaaaaaaaaaaaaaaaaaah for you

mydmermaid
احنا اكيد اتقابلنا فى المياه قبل كدة
مش انتى برضو من البحر؟

الف
عارفة, ماهو البحر حكالى كل اللى انت قولتهوله

الست نعامة
سمكة و لا نعامة؟ لخبطتينا
المرة الجاية هاصاحبه من اول و جديد

eman m
انبسطت اوى لما لقيت تعليق منك, كنتى لسة على بالى
:)

غير معرف يقول...

اييه دا انا كمان علي طول بكلمه وهوا بيكلمني
وطول عمري حاسه اني طالعه من جوه الميه وجيت هنا غلط وتهت عن مكاني الي جوه الميه

غير معرف يقول...

هو انتي مش بطريق ؟؟

كائن مايص و بيتحرك بسرعة و عنده جناحات، و انتي بتحنيله كتير .. بالتأكيد انتي كنتي بطريق :-)

فتوح أبو المفاتيح يقول...

حلو
جميل
البحر لوحده كائن خرافي
ممكن تكوني تقربيله
بأمارة انك بتحبي تقعجي تتكلمي معاه
الواحد مش بيقعد يتكلم غير مع الناس اللي هما حتة منه
يبقا البحر حتة منك
يبقا دلوقت حاولي تدوري عن صلة بينك وبين مستر بحر
انا جل اعتقادي انك مش من مخلوقات البحرية
انت تقربي للبحر ذاته
بس هو شكله زعلان منك اليومين دول
راجعي نفسك
وشوفي بتعملي ايه من وراها
وخلي بالك منها
البحر حلو
ورائع
وخصوصا لما يغرقني وانا ماشي على الكورنيش
بس هو بيهزر
وانا بحب هزاره
سلميلي عليه
قوليله فتوح جايلك قريب
سلاااااااااااام
:)

جبهة التهييس الشعبية يقول...

كنت عايزة اعلق على الموضوع اللي فوق: كله بيعدي

غير معرف يقول...

تحية حب واعجاب وتقدير لدماغك المهيسة:)

silent observer يقول...

this is a beautiful post, I read it several times :) I love it

Unknown يقول...

ana lesa baklam elba7r ;)

aly sob7y يقول...

بجد خلاص هابتدى أغلط من كتر الأعجاب