الأحد، مارس ١٨، ٢٠٠٧

انا كبرت

انا كملت 21 سنة من 6 ايام
يعنى بقيت محسوبة عليكى يا بلد
يعنى امضتى بقالها قيمة

هاقعد على الكرسى قدام مكتبى,ارفع شعرى لفوق, و ازحلق النضارة لطرف مناخيرى, و اميل الكرسى لورا حبة , و بكل الاطة و عدم اهتمام, ابصلكوا من فوق لتحت و اقول: تعالوا تعالوا عشان امضيلكو الشيكات الكتير اللى معاكو
بس طبعا, بما انى اكبر كارثة برجلتين, المشهد ده هينتهى ب





طاخ!
ويتقلب الكرسى بيا








طبعا مش محتاجة اقول قد ايه انا شخص مفلس معظم ايام السنة. مش بس كدة, انا كمان شخص منحوس جدا. شهر مارس اللى هو شهر عيدميلادى المفروض يبقى فتحة خير عليا, المفروض يبقى ده الشهر اللى الفلوس فيه بتهل عليا من كل حتة. لكن الشهر ده بقى عندى فيه 7 عيد ميلادات و عيد الام طبعا
بس انا فى كل الاحوال مطمنة خالص, لان فى الاخر لو الدنيا قفلت اوى عليا عندى حساب فى البنك يسترنى
حسابى كان فيه 16 جنيه و 45 قرش, اتنفخ فى صورتهم الشهر الاخير و بقوا 16 جنيه و 98 قرش
:)
فيه موظف مسكين من البنك بيدب مشوار لبيتنا كل شهر عشان يسلمنى انا شخصيا كشف حساب, بس عشان الكام لحلوح دول. يعنى غالبا هو بيتكلف اكتر منهم عشان يوصللى
اكيد هو مش مبسوط اوى بيا
بس و لا يهمنى, و طبعا ده ما يقللش من اهمية استثماراتى المالية, و امضتى

كبرت؟
ايوة , 21 سنة بحالهم فى جعبتى دلوقتى
عقلت؟
اكيد لا, مفقود الامل فيا فى الموضوع ده
اتغيرت؟
فى يوم! ما اظنش, فى خلال السنين اللى فاتت؟! اكيد
هاتغير ؟
طبعا
دلوقتى حالا مبسوطة؟
جدا

حاسة ان الناس بتحبنى. كمية الناس اللى افتكرتنى اول ما الساعة جت 12, و اصحاب كتير ما اتكلمناش بقالنا شهور, بس افتكروا اليوم ده
قد ايه اليوم ده المفروض انه زيه زى اى يوم, بس فكرة انه ذكرى ميلادك, و ان الناس تفتكرك فيه, حاجة حلوة اوى

هو كان بيقوللى : انتى بتحبى تتحبى و تحبى
و كنت انا اشيط جواية و ابقى عايزة اقوله :لا, مش الفكرة اتحب فى المطلق, انا عايزة اتحب منك انت
بس هو عنده حق فى حاجة, انا فعلا باعتمد على حب الناس ليا, على رضاهم. باحب اعرف انى فارقة فى حياتهم, و ان ممكن اما يفتكرونى يبتسموا

انا بجد مبسوطة دلوقتى
جايز بكرة حاجة تحصل تزعلنى, جايز كمان 5 دقايق
بس فى اللحظة دى بالذات , انا حاسة الدنيا كلها نور و موسيقى
حاسة الدنيا كلها بتضحكلى

هناك ١٢ تعليقًا:

غير معرف يقول...

تتحسبي ع البلد؟ طب ده كلام، ده احنا بنقول كبرت وعقلت امال.. عموماً كل سنة وانتي طيبة ومبسوطة وعاملة دوشة لطيفة كدة

Lasto-adri *Blue* يقول...

كل سنة وانتى طيبة يا معات
:)

بس قولى لى لو حاسة بالفرق
:D

radwa osama يقول...

انت شخصيا فارقه في حياتي جدا وحاسه بالذنب تجاهك اني ما كنتش بحبك كده من زمان ..كل سنه وانت مجنونه وجميلة زى ما انت

غير معرف يقول...

كل سنة وانت طيبة
بجد أول مرة ازور البلوج بتاعك, مرح وظريف وخفيف بيخرج الواحد من الهموم اللى هوا فيها
http://3abkarino.blogspot.com/

أحمد يقول...

وانت بتعدى كمية الاوبشنز اللى اصبحت موجودة امامك بعد 21 سنة نسيتى اهم حاجة في هذه المرحلة التاريخية الهامة

الصلاحية القانونية لدخول جميع الاماكن في مصر
والحرية المطلقة في تناول اى مشروب
:-)

عمرو عزت يقول...

كل سنة او انتي طيبة

حلوة قوي "الكوميكس" اللي مع تدويناتك

غير معرف يقول...

كل سنه وانتي طيبه يا بنوته
وعقبال ميه سنه
;)

شجره الدر يقول...

كل سنه وانتى طيبه وعقبال مليون وواحد وعشرين سنه
ياااااااخبر
دانتى تبقى كبيره اوى
انا لما تميت 21 سنه كنت حاسه ان خلاص محدش ادى زيك كدا
يارب حياتك بجد تحسى انها اتغيرت للاحسن
وابقى بقى هاتى حته من التورته عشان انا جعانه حاليا
انا قريت البوستات كلها
عاجبانى خالص اسلوبك جميل
بس عايزا اسالك على حاجه
هو الرسومات دى انتى اللى عملاها
شكلك يجنن وانتى واقعه من على الكرسى

غير معرف يقول...

omar mostafa
و انت طيب...حلوة عاملة دوشة لطيفة دى, هيهي واضح ان انا فى التدويت باعمل دوش و بارغى كتييير زى فى الحقيقة
lasto adri blue
طبعا طبعا فيه فرق, انا عقلت جدا :)
و انت طيبة
radwa osama
و انتى طيبة يا رضوى يا جميلة, انا سعيدة انى فارقة فى حياتك, بس ليه تحسى بالذنب؟؟ احنا ماكناش نعرف بعض قبل كدة!!
3abkarino
و انت طيب, و شكرا جدا على الكلاماللطيف

مبسوطة ان مدونتنا المتواضعة نالت اعجاب حضراتكم :)

احمد
طب واحدة كل سنة و انتى طيبة كدة على الماشى!!! ماكانش ده العشم يا شريكى فى كفاح التمانينات :)
عندك حق, بس ماتنساش ان احنا البنات الموضوع اسها عندنا, اول اما يبقى معانا الرخصة, و ابتسامة مياصة كدة تدخلك اى مكان

عمرو عزت

و انت طيب يا جميل
عجبك الفن الصايع بتاعى !
هيهيهي

شيماء
و انت طيبة, بس 100 كتير اوى
فينك من زمان

شجرة الدر

و انتى طيبة
شكرا جدا على كلامك اللى يشكح
و بجد مبسوطة انك تحمستى لتدويناتى, و بالذات بقى رسوماتى :) , ايوة انا اللى عاملة الرسومات الهبلة دى

ماتتريقيش على منظرى و انا واقعة من فضلك و ال هاحرمك من نصيبك فى الشيكات
:)

Maat يقول...

happy birthdaaaaay.. belated

Unknown يقول...

ولا بيهمنى كلها سنتين وأكملهم ويبقى لى الصلاحية فى أى حاجة فى البلد دى:-)
كل سنة وانت طيبة يا جميلة

غير معرف يقول...

كانت تعلم سر كل هذا الحب والاهتمام والالتفاف من حولها ليس من خصوصية بها ...ولكن كانت انوار جدها تشع منها فتجذبهم وهم لا يعلمون ...اواه جداه ...واحبيبا ...وا قرة عينااا...سلاما سلاماا...