اعتراف

اعترف ان غواية الحلم كانت عظيمة

لكن واقع فراقك أحن على روحي من ثقل حبك

نهاية

قررت اقفل الفصل ده تماما في حياتي

قبل اما يتنقش في معجم خيالاتي مرادف وجع: ابتسامتك

تمت 

في الأفق

في يوم من الأيام هتبقى سياسي عظيم,

و أنا 

هابقى قاعدة على الكنبة في بيتي, متكلفتة في بطانية, باتفرج عليك في التليفزيون و انا باسند راسي على كتفه

بس كدة

وجع اسوأ من اي حاجة مريت بيها من كتير

من 5 سنين لما جدتي ماتت على غفلة مني وقتها اكتشفت أبعاد جديدة للوجع, مرحلة من الوجع لما باوصلها مش باتعامل بالشكل المعتاد باني اعيط و انهار لحد اما احس اني كويسة

لا ... باسكت

النوع ده من الوجع لو حاولت تتخلص منه بانك تعيط او تزعق او تصرخ هتجنن, هتقفد صلتك باي حاجة باقية من عقلك

فبيفضل جواك,يحتل جزء من روحك و ينبت جذور و تتعلم تعيش به

جرح موجود يثقل عليك لحظات كتير في المستقبل, يخبطك و يفكرك ان باليتة ألوان أحلامك ناقصها لون

باحبك ... بحبك

هاحاول احكي

انا و انت اترمينا في سكة بعض في لحظة شقاوة من الدنيا

بأقول لحظة شقاوة لأن مش ممكن أي حد يفكر يجمعنا مع بعض غير لو مستني انفجارات, صدامات,خناقات, مشاعر متطرفة,  لخبطة, و حب و سيحان

انت : الهادي الساكت المبتسم دائما. 

الولد اللي بيتجاوز التفاصيل, و ما بياخدش باله من الحاجات اللي ممكن تشتت تركيزه عن الرحلة الأكبر و الأهم

الولد اللي الدنيا ما علمتوش يزعل من حد, بس كمان ما علمتوش يشارك مسارات حياته مع حد

أنا: العصبية الرغاية جدا

البنت اللي بتركز في كل التفاصيل, و دائما بتحيد عن مساراتها عشان تقتفي آثر فراشة أو حدوتة شاردة

البنت اللي بتنتقل بين مزاجاتها بسرعة خاطفة, تزعل بسرعة, تنبسط أسرع, تحبط و تتحمس بفارق ساعات, و بعدها نبتدي رحلة المزاجات من اول و جديد

عارفة اني كتير بابقى حادة في ردود أفعالي, بس ده لأني فعلا باتخض

باتخض من قد ايه انت جوايا, نافذ لكل ركن مستخبي و كل فكرة لسة بتتكون في دماغي

باتخض لأني متعودة انا اللي اتحكم في المساحات اللي الناس يقتحموها, و انت فعلا نافذ لكل عوالم خيالاتي 

يا عبد الرحمن فيك كل حاجة عكس تصوراتي عن الحب, و رغم كدة مسحت كل تصوراتي و - بهدوء و ثقة تعصب الصراحة - استبدلتها بحروف اسمك

أخدت وقت عشان أفهم و أصدق و بعدين أعترف:

باحبك ... بحبك

:)

وحدات بناء

وحدة بناء الكون : حدوتة

وحدة بناء الحنين : تنهيدة

وحدة بناء الذاكرة : تنتوفة

وحدة بناء الحب : ابتسامته

أووف جررر بع !

عزيزي السيد عين

انت بتختبر اكتر صفة شبه منعدمة فيا 

نموذج منى المتاح دلوقتي مانزلش معاه تطبيقات " الصبر " خالص

ارجع بقى :(

حب المتهورين

 تصوير عبد الرحمن 

باحب واحد عنده دعاسيق في دماغه :)

صحيت بدري النهاردة, منتعشة و متحمسة. 

بصيت على كلمات درويش بخط ايدك اللي متعلقة على مرايتي و بعتلك بوسة 

لميت شغلي و حاجتي و نزلت على مخبأي المفضل. 

قاعدة باشتغل دلوقتي على نفس الكنبة اللي اكتشفتك فيها, و مفتقدة صحبتك جدا.

كل اما افتكر ان كل الناس اخدوا بالهم بمشاعري ناحيتك قبل اما انا اخد بالي اصلا, باضحك على عبطي :)

مش عارفة ازاي ممكن اتنين يوصلوا للحالة اللي احنا فيها بالسرعة دي, بس اللي متأكدة منه ان الدنيا بقالها سنين بتحضر للحظة لقانا. 

اللحظة اللي مساراتنا تتقاطع فيها و نكمل, كل واحد بطريقته و ايقاعه بس دايما قريبين من بعض, خيالاتنا و أحلامنا متشابكة.

حبيبي,

صديقي,

رفيق دربي و خيالاتي

وحشتني  ... ارجع بقى كفاية كدة 

هو الحُب

بعدك عني واجع قلبي, بس روحي هتتففت لمليون فراشة من كتر ما انا فخورة بيك و بحُبك 

باحبك يا عبد الرحمن و باعتالك كل فراشاتي تحميك و تخفف على قلبك ثقل المغامرة

عبد الرحمن

لو بعد كل الوجع ده في "انت"
فأنا راضية
Sent from Mona's BlackBerry® from mobinil

وكسة

في يوم واحد بابقى عايزة :

أحفظ ابتسامته و اخليها ترافقني في كل لحظات يومي

أخطفه جوة حضني و أخبيه في بطني

أهبده بطاسة على نفوخه 

 أو أولع في نفسي!

أيوة, متنيلة على عين اللي خلفوني باحب! 

أنتَ بيني و بين, عزلة الكون

أنتَ بيني وبين كِتابي

نظريا دلوقتي المفروض ابقى قاعدة باذاكر. 

عزلت نفسي عن كل حاجة و استخبيت في قوقعتي عشان أركز و اخلص الشغل اللي ورايا

لكن بدل ده كله قاعدة أسرح في بداية قصتنا. في "المصادفات القدرية" اللي خليت مساراتنا تتقاطع أكتر من مرة لحد أما أجبرتنا ناخد بالنا و نبطل نتجاهل مداعبات الحب.

بيني وبينَ هدُوئي

أيوة متعفرتة!

كنت سلمت أمري لان "الحب" مشروع مؤجل لحد اما أخلص من العسكر و الماجستير

كنت تقبلت فكرة ان كمية الجثث اللي شوفتها و قصص التعذيب اللي سمعتها ثقلت أجنحتي بدرجة تمنعني من التحليق

كنت ارتضيت ان فراشاتي هربت من عالمي لحد أما السحابة السودة اللي مرافقاني تنسحب و تطلعلي شمس من جديد

و بعدين انت جيت

جيت كدة, بابتسامة طفل عنده 10 سنين مصدق انه يقدر يغير العالم كله و في السكة يخطف البنت دي معاه في رحلته و مغامراته, و بكل ثقة ربكتني بكلامك عن "المصادفات القدرية" و "اليقين" و "الحب".

شقلبت حياتي, و كركبت خيالاتي و عفرتني!

بيني وبينَ الكَلامْ 

نفسي أحكيلك

نفسي أوصفلك الصور اللي بتمر بخيالي لما باسمعك و انت بتحكي عن خطط مستقبلية و بكل نعومة بترسمني في تفاصيلها

نفسي الاقي ركن رايق في دماغي, من غير كركبة و زحمة و توقعات ناس كتير, و بالراحة أخدك معايا تزور تناتيف في خيالي عني انا و انت

نفسي أحكيلك قد ايه خايفة من حالة الارهاق اللي بقيت فيها معظم الوقت

كأن عداد الطاقة عندي مؤشره دايما قريب من الصفر, و على ابسط حاجة بتتحرق كل طاقتي في لحظة

و نفسي افهمك قد ايه مرعوبة

مرعوبة أوجعك

مرعوبة اتوجع

مرعوبة اسلم روحي لغواية الحلم

و مرعوبة نبقى انا و انت فعلا مقدرين لبعض, لكن التقينا في لحظة غير اللي مقدر لها تجمعنا
بس أكتر من أي حاجة مرعوبة ان تبقى دي اللحظة , و دي فعلا بداية القصة, و ابوظها عشان خايفة و مرهقة.

العبارات الملونة مقتبسة من شعر أمل دنقل سفر ألف دال مع تغيير ضمير مستقبٍل الكلام