السبت، يناير ١٩، ٢٠١٣

فصول من قصتنا


 الفصل الأول - قبل الثورة 
تدوينات لم تكتمل و لم تنشر 


صحاني بابتسامة زغزغت قلبي
فاكرة اول ما اتقابلنا
ضحكنا و رقصنا و بعد مرور ساعات و خيالات اكتشفنا اننا ما نعرفش اسامي بعض 


*********
و في عز جنان يومي
داعبني بحنية لحد ما نعست و في حضن كفه سكنت
*********

كان نفسي أعرف أحكي
هو بالنسبالي حب الطفولة. هو كل حاجة عبيطة و حلوة و صغيرة و مالهاش أي معني
مافيش حاجة معقدة في ذكرياتي معاه, مافيش الحب اللي بيعصرني من جوة, و مافيش الوجع اللي بيطفي كل ألواني.
فيه رقص و حواديت و مداعبات و ضحك كتير.

و فيه شوكولاتة دافية. كل اما افتكر عينيه و ابتسامته احس بتنميلة خفيفة في روحي و بشوكولاتة دافية بتلف حواليا بالراحة


*********
الفصل الثاني- أول الثورة 
صمت
...

*********

 الفصل الثالث - يحدث الآن
اللانهائية و ما بعدها

في لحظات بتغير رؤيتك للدنيا
من سنة صديقة عمري اتصابت في كل جسمها بخرطوش من بلطجية الداخلية. 
في لحظة كدة كنت باحطلها بيتادين على الجروح, لقيتني بافكر: لو ده حصلي مين هابقى محتاجة وجودهم جنبي, و هارتاح انهم يسندوني و يساعدوني اتحرك؟
اسمه اترسم قدامي.
ببساطة و سهولة -فاجئني خيالي- و لقيته من أول الأسماء اللي خطرت في بالي, بجانب أسماء تانية بديهي اني أفكر فيها.

ماعرفتش أحكيله ساعتها لأن حسيتها دراما جدا و ماعرفتش اذا كنت هاعرف أشرحله الصور اللي مرت في ذهني.

من شهرين أحداث الاتحادية حصلت, بعدها رحت و قلتله:
"لو حصلي حاجة خليك جنبي
عارفة انك بتتكسف و غالبا ده هيخليك تحتاس في التعامل و مش هتقول لأهلي انك عايز تفضل جنبي , بس انا باقولك دلوقتي لو حصلي حاجة و ماقدرتش اتكلم خليك عارف اني هابقى عايزاك حواليا, محتاجاك قريب مني... جنبي."

أما باحاول أوصف احساسي ناحيته, أهميته عندي, أهمية صداقتنا واعتمادي عليها, مشاعري اللي اتطورت و اتعقدت في رحلة كبرنا فيها مع بعض, جملة واحدة بتفضل تتردد جوايا: هو حتة مني.



هناك ١٠ تعليقات:

غير معرف يقول...

هو مين دا؟؟ حيرتينا معاكي والله :)) دا عبد الرحمن ولا حد تاني ,, انت وعبد الرحمن اخباركم اية؟؟ معلش علي التدخل بس حكاياتك وتقلباتك خلتك تة مننا بنفرح لك لما تفرحي ونزعل لما تزعلي.. حتة مننا

فافى يقول...

منى انا اتخنقت حقيقى
قلت لك 100 مره الغى الخاصيه بتاعة برنامج الروبوت دى اللى فى المدونه :)
على كل حال انا مبسوطه انك مبسوطه

غير معرف يقول...

منى .. انتى وعبد الرحمن قصة حب جميلة جدا .. وأدام انتى حاسة انه حتة منك كملى المشوار معاه .. عشان اما تكبرى وشعرك يبيّض تلاقيه جمبك بابتسامته اللى بتحبيها..
شوفتك يوم القرصاية وكان نفسي أكلمك .. ربنا يرجع الود والحب بينكم .
وادعيلي انا كمان يرجع الود والحب بينى وبين زوجى الثورجى الحبيب .. قصتنا فيها شبه شوية من قصتكم على فكرة زوجى هو كمان اسمه عبد الرحمن :) .. بدعيلك نفس دعائى لنفسي ربنا يهديكى ويوفقك ويكرمك :)
سها

monasosh يقول...
أزال المؤلف هذا التعليق.
monasosh يقول...

التدوينة دي مش عن عبد الرحمن. عبد الرحمن معرفتنا ببعض ما كملتش 3 شهور, اكتشفنا بعدها ان خيالنا و تصوراتنا عن علاقتناازاي مختلفة جدا عن الحقيقة
التدوينة دي عن علاقة أعقد بحد في حياتي بقاله 3 سنين و أقرب اصحابي. الولد اللي كسر قلبي قبل الثورة على طول رغم كدة الحب اللي بيجمعنا اتطور لحاجة أجمل و أقوى
قصة معقدة :)

ل "غير معرف" في كل الأحوال اتمنالك انتي كل الخير مع عبد الرحمن بتاعك و انا مع حبيبي أيا كان اسمه :)

غير معرف يقول...

رجب؟؟

غير معرف يقول...

ربنا يسعدك

غير معرف يقول...

يعني يا منى مفيش امل انكو ترجعو لبعض؟

luxusumzug يقول...
أزال أحد مشرفي المدونة هذا التعليق.
monasosh يقول...

@غير معرف

سعادتنا مش مع بعض, عشان كدة أملي مش ممكن يبقى رجوعنا لبعض, أملي ان كل واحد يلاقي السعادة و الحب اللي بيحلم به :)