الخميس، ديسمبر 27، 2012

خلينا سوا

كنت بافكر فيك 
بعدين شغلت برنامج المزيكا على مود "لخبطة" لقيت الأغنية دي اشتغلت 



فاكرها؟
عندنا أحلام حكيناها اتفقنا عليها و بديناها
جوة قلبي انت موجود 

عديت عليك في بون ابيتي في يوم و اديتك 3 أغاني, منهم الأغنية دي
كنت باسمعهم بالساعات و أنا باتمشى و انا باسوق و انا باشتغل و أفكر فيك, و فينا
و فضلوا التلات أغاني دول يحكوا قصتنا

أغرب علاقة في حياتي

ابتدت عابرة
كعبلها الحب
كسرها الحزن
و بعد كدة رجعت كل التناتيف المتبعترة اتجمعت و ربطتنا بالتعويذة الساحرة اللي جمعانا دلوقتي
رابط هش من كتر الحزن اللي شاركناه

رقيق من كتر الشد و الجذب
بس رغم هشاشته ماقدرش أجازف بخسارته لأن عالطرف التاني روحي
صحيت في يوم و اكتشفت حبنا كان مرحلة و عدت
تخطيناها لما هو أجمل
صحيت في يوم و اكتشفت ان في حتة منك نبتت جذور جوة بطني

لما الكوابيس بتطاردني انت الحد اللي بالجأله
في ليالي البرد و الوحدة في الاعتصامات كنت انت الحد اللي باستنجد بدفئه
و لما باتخيلني كبيرة بشعر أبيض, دايما بتبقى حاضر في المشهد, بوسامتك اللي بتدوبني 
في خيالاتي انت حبيب روحي و منك ملامح الابن

يمكن تكون الدنيا شايلالنا قصص تانية في المستقبل
و يمكن تكون هتفاجئنا بيقين لسة تايه عنا 
كل الاحتمالات واردة و كل السكك مفتوحة
بس اللي متأكدة منه اني معتمدة دايما على وجودك
و أيا كان مستقبلنا هياخدنا فين عايزاك دايما حواليا
محتاجاك دايما حواليا

رفيق روحي , أيا كان اللي هيحصل, خلينا زي ما الأغنية بتقول كدة 

   "خلينا سوا" :)




هناك 4 تعليقات:

Hawaa Fashoin يقول...

شكرا على الموضوع ....))
أزياء
الرشاقه والرجيم
العنايه بالبشره والشعر

وشوشات يقول...

إنتي إزاي بتقدري تصيغي مشاعر ملعبكة كده في كلمات و جمل؟! وحشتينا أوي على فكرة :) علا عثمان

شركة الحسينى يقول...

موفقين :)

luxusumzug يقول...

موضوع ممتاز .. بالتوفيق
ماكينات الطباعة
خطوط انتاج ورق الكمبيوتر
ماكينات الطباعة gto
drent gazelle