أ ح ا

حتى المشاعر و الخيالات مطلوب مني احجمها عشان ما تتخضش

لو "الشغف" بيجتاحني, ليه ماخليكش تغرق معايا فيه ؟!

كان نفسي تبقي هنا

قالتلي " لو ستو كانت عايشة كانت هتفرح بيكي أوي "

ستو، أتمنى تبقي شايفاني و بتبسمي راضية عني
وحشتيني
Sent from Mona's BlackBerry® from mobinil

أووف جررر بع !

عزيزي السيد عين

انت بتختبر اكتر صفة شبه منعدمة فيا 

نموذج منى المتاح دلوقتي مانزلش معاه تطبيقات " الصبر " خالص

ارجع بقى :(

عزيزي

هكذا يترك العاشقان وداعهما فوضويًّا، كرائحة الياسمين على ليل تمّوز

                            

                                                                                    درويش

أشكرك على الرحلة و الذكريات

 :)

حب المتهورين

 تصوير عبد الرحمن 

باحب واحد عنده دعاسيق في دماغه :)

صحيت بدري النهاردة, منتعشة و متحمسة. 

بصيت على كلمات درويش بخط ايدك اللي متعلقة على مرايتي و بعتلك بوسة 

لميت شغلي و حاجتي و نزلت على مخبأي المفضل. 

قاعدة باشتغل دلوقتي على نفس الكنبة اللي اكتشفتك فيها, و مفتقدة صحبتك جدا.

كل اما افتكر ان كل الناس اخدوا بالهم بمشاعري ناحيتك قبل اما انا اخد بالي اصلا, باضحك على عبطي :)

مش عارفة ازاي ممكن اتنين يوصلوا للحالة اللي احنا فيها بالسرعة دي, بس اللي متأكدة منه ان الدنيا بقالها سنين بتحضر للحظة لقانا. 

اللحظة اللي مساراتنا تتقاطع فيها و نكمل, كل واحد بطريقته و ايقاعه بس دايما قريبين من بعض, خيالاتنا و أحلامنا متشابكة.

حبيبي,

صديقي,

رفيق دربي و خيالاتي

وحشتني  ... ارجع بقى كفاية كدة 

هو الحُب

بعدك عني واجع قلبي, بس روحي هتتففت لمليون فراشة من كتر ما انا فخورة بيك و بحُبك 

باحبك يا عبد الرحمن و باعتالك كل فراشاتي تحميك و تخفف على قلبك ثقل المغامرة

عبد الرحمن

لو بعد كل الوجع ده في "انت"
فأنا راضية
Sent from Mona's BlackBerry® from mobinil

أنا آسفة

و نبتدي نوبة عياط في مكان عام

مقهورة! قلبي هيتحرق من القهرة!

أنا اسفة يا اسلام

أنا اسفة يا محمد

بجد كنت متخيلة ان انتو أسهل حاجة في المعركة.

كنت متخيلة ان اي حد هيعرف ان في عيال صغيرة قد اختي سناء و أصغر متحاكمين عسكري و متبهدلين في سجن طرة, على طول هيتنفض و يؤمر بخروجكو و يعتذرلكو مائة مرة على اللي شوفتوه

ميتين اللجنة و الرئاسة و العسكر و كل حد عمل فيكو كدة او كان بايده يخرجكو و ما خرجكوش

أنا اسفة

بس كدة

أنا زعلانة أوي
Sent from Mona's BlackBerry® from mobinil

طظ في وجعك

ساعات كدة الواحد بيتهيأ له ان كدمات روحه كلها خفت لحد اما حد يهبدك على واحدة منهم و يجدد الوجع

وجعك بطل يبقى صارخ و يخطف نفسي مني

وجعك بقى مصمت, دايما مكتوم

اتعلمت اعتاده و اعيش بصحبته

صديقي 

طظ في كل تناتيف " الفندان "  اللي ما بينا 

رفيق وحدتي

صديقي 

لعلك لا تدرك أنك تسكن مساحة خاصة في قلبي

ركن خاص, تناثرت به حروف الأبجدية مرسومة بخط بديع, كل بضعة ايام تتراص لتكون كلمة تربطني بك دون أن تدرى

سكون

صمت

أبيض

روح

موسيقى

نقاء

سكينة

سلام

اي كلام  :)

في كواليس حياتي الصاخبة المزدحمة نسخة أقل توترا مني, تأتيك في خفة و صمت لتزيح بعيدا السحب السوداء التي تحاوطك, و نمضي بقية العمر نغزل من أشعة الشمس زبدا دافئا, أنت تخبز و أنا ادندن 

وكسة

في يوم واحد بابقى عايزة :

أحفظ ابتسامته و اخليها ترافقني في كل لحظات يومي

أخطفه جوة حضني و أخبيه في بطني

أهبده بطاسة على نفوخه 

 أو أولع في نفسي!

أيوة, متنيلة على عين اللي خلفوني باحب!