لو ليك صاحب أو قريب أو اي حد تعرفه اتضرب في مظاهرة, من الجيش و هو بيفضها, اتهان في الشارع من ظابط جيش عشان الحظر, او اتضرب عليه نار عشان هتف ضد السفير الاسرائيلي. أو لو كنت انت اللي اتعرضت لده
لو كنت واقف في اعتصام بتحاول تحمي ثورتك و شفت حد بيتاخد قدامك و بيتكهرب و يضرب و بعدين يتحاكم محاكمة عسكرية ظالمة و في ظرف أيام يتحكم عليه بالسجن.
لو كنت مثلت امام محكمة عسكرية مش المفروض انها اللي تنظر في أمرك, و في ظرف ساعات حكم عليك بالسجن مع ايقاف التنفيذ على جرائم لم ترتكبها.
لو كنت فتحت مرة التليفزيون المصري على القناة الأولى و لقيت صورة أخوك باين عليه اثار الضرب و التعذيب و تحتها كلمة "بلطجي"
لو كنت كل مرة بتقرأ بيانات المجلس الأعلى للقوات المسلحة بتحس انهم بيحاولوا يستغفلوك أوبيتهموك بالتسبب في خراب الاقتصاد, او بيوصفوك بانك "مندس" و "فلول"
لو كنت حاسس ان المجلس الأعلى للقوات المسلحة بيحاول يجهض الثورة, و ان الاعلام بيلمع صورته زي ماكان بيلمع صورة النظام السابق
شاركنا و دَوِّن عن المجلس العسكري, بالكتابة, فيديو, صور, لف صوت, تدوينة, نوت على الفيسبوك....
ساعدنا نظهر حقيقة الدور اللي بيلعبه المجلس العسكري في تعطيل عجلة الثورة و التغيير, ساهم في التصدي للتعتيم الاعلامي على انتهاكات و افتراءات المجلس العسكري.
ملاحظات:
- يرجى اضافة الوسم -تاج- Noscaf لاي تدوينة تشارك بها في اليوم
- رجاء ارسال رابط لمشاركتك على تويتر و معه الوسم Noscaf#
هناك تعليقان (٢):
مطلوب مجلس رئاسى ووضع دستور دائم للبلاد ، فالمجلس العسكرى مجموعه ضباط تابعه لرئيس فاسد واتحدى ان ينفى طنطاوى من ان ابنه عاصم شريك جمال مبارك فى شركة فيوجين ، ويكفى ان مدير المخابرات العامة قام باصدار خطاب من الجهاز يفيد ان فيلا سوزان مبارك مملوكة للجهاز لتبرئتها ومنذ متى والمخابرات تعطى فيلل ؟؟ فقد كنا من شهرين فقط نلم ونشحت على جمعه الشوان بعد ان باع منزله ليعالج بعد ان تقطعت به السبل فى الحصول على علاج فى المستشفيات العسكرية ، وشحتنا عليه لنحصل له على شقة بديلة للتى قام ببيعها للصرف على العلاج ؟؟ اية يامصر لسة بيضحكوا علينا تانى
حرام عليكو البلد عماله تخرب و الفوضي بتزيد و البطاله
و الناس الي بتنتهز الفرصه جمعه الغضب و بتطلع تسرق و تحرق - اه مش انتو الي بتسرقو بس البلطجيه بيتهزو الفرصه
البلد مش ناقصه و انتو حبه عيال ثوريين عايزن تولعوها نار
مش عندي غير حسبنا الله و نعم الوكيل
إرسال تعليق