الاثنين، فبراير ٠٩، ٢٠٠٩

حضرة الظابط: اتفوو

باركب عربة السيدات في المترو من محطة السادات لقيت 3 مفتشين بيسألوا على التذاكر. واحد منهم قاعد يقاوح مع بنت تدفعله العشرة جنيه غرامة.
ليه يا سيدي؟
عشان هي ركبت ناحية محمد نجيب و بعدين غيرت رأيها و رجعت, و التذكرة دي لرحلة واحدة بس. و ابتدى الاستاذ يديها محاضرة انها لو راكبة ميكروباص هتضطر تدفع الأجرة مرتين. ايوة يا سيدي بس هي مش راكبة ميكروباص هي راكبة الزفت المترو, و بعدين هي ما طلعتش بالتذكرة من الماكنة, هي نزلت من المترو و عدت للرصيف التاني , ماهو الواحد لو غلط و نزل محطة متأخر بياخد المترو راجع.
بس سعادته مصر انه لا و ان ده قانون (سلامات يا قانون) مكتوب على كل شبابيك التذاكر. نقاوح معاه و نقوله الكلام ده استهبال, قام قال طب تعالي معايا للريس. البنت جدعة , قالتله ماروحش حتة , قام منادي على الريس بتاعه
الريس بقى ده كائن حقير كدة ظابط , منفوخ و قليل الادب. دخل يطلب اثبات الشخصية منها, رفضت تديهوله و قالتله انا مش عاملة حاجة غلط , تسمعني الاول و بعدين لو عايز اثبات الشخصية اديهولك. طبعاً سعادته ازاي و ازاي هي ما تفطش تنط تعمل اللي هو بيقوله. قام شخط و قالها: اللي اقوله يتنفذ.
البنت برضو جدعة رفضت . بس الستات جنبها حايلوها تديله اثبات الشخصية. قام اخده و المفتشين قالوله لازم ننزل يا باشا قام قايلها تعالي نكمل كلام على الرصيف. اصرت انه لأ و انه المفروض يديها اثبات الشخصية بتاعها, و هو بكل عنطزة قالها: انا ممكن اديكي بطاقتك و برضو هاجيبك من القطار, قالتله :ازاي يعني؟! قالها: ما تعرفيش ازاي ؟ بالانتربول (سلامات يا انتربول). و نزلوا.

ايها الظابط اينما كنت , مش عارفة اشتمك لان كل الشتايم اللي جاية في بالي دلوقتي بالأم و هي كفاية عليها انها جابت شئ وسخ زيك. الهي يتَف عليك في الشارع و تضرب بالجزم و الشباشب و عيالك يتبروا منك و يحاولوا يخبو انهم ولادك عشان ما يتشتموش.

و البنت الجدعة اينما كنت, تحياتي.

هناك ٨ تعليقات:

مثلية فقط يقول...

هو دور الشرطة في مصر جعل الناس تطلع من روحا و تبحث عن اسرع طريقة للإنتحار ؟ ؟؟

شو هالقرف ؟ مو معقول قديش عندن ثقة انو هني القانون و فوق القانون وفوق الناس .... ليش صار الوضع سيء لهذه الدرجة ؟؟؟

تمنياتي لك بكل الخير

monasosh يقول...

مثلية فقط:
ااه , مش الشعار الجديد دلوقتي على كل اقسام الشرطة " الشرطة و الشعب في خدمة سيادة القانون"

:)

غير معرف يقول...

eh el khara dah!
maho tab3an... very typical...
!@#$@#$!!@$~%^*&*!@%&
3alam 3ayzal 7ar2

monasosh يقول...

@Evaluna

Please don't write these cursing symbols. whenever I see them associated with ur name I can't stop myself from LOL

I can't imagine you that angry, :) u r too balala

ADMIRAL يقول...

ايها الظابط اينما كنت , مش عارفة اشتمك لان كل الشتايم اللي جاية في بالي دلوقتي بالأم و هي كفاية عليها انها جابت شئ وسخ زيك. الهي يتَف عليك في الشارع و تضرب بالجزم و الشباشب و عيالك يتبروا منك و يحاولوا يخبو انهم ولادك عشان ما يتشتموش.

>> هههههههههههههههههههههههههههههههه لا والله انا حتجنن بصراحة ..

كل هذا اللي بتقوليه والشعب ساكت !!
يعني انا بسمع من الوالدة الله يحفظها أنه العالم المصري إذا وقع عليه شي ضده او لا يتناسب مع مصلحته القومية بيقوم الشعب يد واحده .. واكررها يد واحدة !! بس اللي استنتجته من كلامك أنه صار كل واحد يقول نفسي يا نفسي زي يوم القيامة !

الفرق بيننا وبينكم أنه ولله الحمد والشكر صحيح عندنا أسوء من ضباطكم وشرطتكم لكن ......
من ناحية المرأة أو أي أنثى كبيرة او صغيرة ، بيعرفوا شو آخرتها لو فكروا يلعبوا بذيلهم مع واحده ! الواحد بيغار على اللي بالشارع زي أخته ..
لكن عندكم لو واحد قال غلط ولا عيب يقوم الكل ينقلب ضده ومجرب هذا !! يعني اسكت وما تدخلش بشي !

ومشاكل الميكروباص والمترو تبعكم أنا لاحظتها كمان لما رحت مصر في زيارة ..
الفرق بيننا وبينكم انه عندنا في شي اسمه شهامة !! يعني سواق الباص أو الحافلات بيكون مدير لوسيلة النقل ونافذة سيطرته عليها .. وركاب الباص بيعرفوا انه لكل واحد حرمة وعرض وشرف ، وأقل شي يعمله يفرغ مكان للحريم وحتى لو على مصلحته الشخصية .!

ADMIRAL يقول...

امممممممم نسيت اقول !!
كمـــان مثلية فقط ، والله انا كنت عايش في عالم للأموات !!

عشنا وشفنا يا زمن !!!!!!!!!!!!!!!!!!

Mkjwe يقول...

سؤال يعني هو اشعرف الظابط انها بدلت القطر؟؟ طالما هي مدخلتش التذكرة في الماكينة؟؟
وانا لو مكانك كنت صورت هذه الحادثة في الخباسة , احنا نعمل مشروع قومي لفضائح الشرطة المصرية ونعرض في كل الكليبات والصور ونفضحهم كلهم واي ظابط كويس نخليه مش كويس ونعمل ضجة في الوسط العربي ان الحكومة المصرية فاسدة فاسدة فاسدة بدرجة 101%
تحياتي لكي بالعطور الفرنسية

غير معرف يقول...

انا نفسى اعرف هما بيعلموهم ايه فى المحروقه كلية الشرطة بيدرسولهم ازاى تكون خنيق وقليل الرباية وتكفر الناس فى العيشة ياظباط الشرطه الى من صنف الظابط دا انتو بتاكلو ايه