الجمعة، يناير ٠٥، ٢٠٠٧

ما تيجى نلعب



اتنقلت لمدرسة التربية القومية فى الزمالك و انا فى رابعة ابتدائى.و اول يوم ليا فى المدرسة اكتشفت عالم البنات, و اكتشفت قد ايه انا كائن فضائى للعالم ده
اول مرة دخلت الفصل, لقيت البنات كلهم مسرحين شعرهم, اللى عملاه ضفيرة, و اللى شعرها مفرود و طويل, و كلهم لابسين توك بفيونكات و ورد. انا طول عمرى شعرى منعكش, و لحد وقتها ماكنتش باركز فى ده, كنت باتعامل على ان النعكشة هى الحالة الطبيعية للبنات فى سنى, و يوم يعنى لما ابقى عايزة اتزوق و ابهر الناس, اعمل زعرورة كدة صغيرة فوق راسى, و اقوم مفنكشاها عشان يبقى الشعر طالع من حوالين التوكة. كنت مسمية التسريحة دى النخلة
جت الفسحة, و جربت اقعد مع البنات على جنب. لقيت كل واحدة منهم بتطلع علبة بلاستك صغيرة ملونة, جواها سندوتشات او بيتزا, و انا باطلع كيس فيه سندوتشات مفعصة, و الجبنة دخلت على المربى
حاولت كذا يوم ورا بعض, اسرح شعرى, اكوى اللجيبة, و اقعد مع البنات فى الفسحة على جنب ناكل السنوتشات و نتكلم
انا فعلا حاولت, و فعلا فشلت
من بعدها, كنت تدخل المدرسة تلاقى على شمالك البنات قاعدين مع بعض على جنب, و فى نص الحوش تلاقينى باجرى ورا واحد صاحبى اسمه محمود, منعكشة و قميصى طالع برة الجيبة
محمود ده كان قاعد جنبى فى اتوبيس المدرسة, و اول صاحب ليا فيها. ما اعرفش ازاى انا و هو بقينا اصحاب و لا ازاى اتفقنا على لعبتنا, بس بقينا كل يوم اول ما نوصل المدرسة هو يجرى, و انا افضل اجرى وراه لحد اما امسكه. و لو مسكته, اضربه و اجرى, و يبقى هو عليه الدور يجرى ورايا
من ساعتها و انا بقى دورى فى المدرسة واضح: انا المتشردة بتاعتهم
بعد شوية ابديت اتعرف على بقية ولاد الفصل. عدينا الاول بمرحلة ان كل ولد مقتنع انه وقع فى غرامى- عادى بتحصل مع كل بنت جديدة على الفصل- اقوم انا بهدوء و حكمة اشرحلهم ازاى باعتبرهم كلهم زى اخواتى, و ازاى انا اطول منهم كلهم, غير انه وقتها كنت ابتديت اخد بالى من على
بعد اما عدينا مرحلة الحب الابدى, بقيت بينى و بين ولاد الفصل علاقة واضحة, انا اختهم اللى بيحكولها عن مشاكلهم و يطلبوا رأيها, و انا بفزلكتى المعتادة اديهم النصايح اللى اكتسبتها من تجاربى الكتيرة
:)
انا فاكرة بعد نتيجة اول امتحانات شهر, طلعت الاولى على الفصل, و جاللى ولد من الفصل قاللى : انا طول عمرى باطلع الاول . انا عديتهالك المرة دى عشان انتى بنت و جديدة علينا
يومها انا وعدت نفسى انى مش هاديله فرصة يتفوق عليا, و فعلا من ساعتها بقيت اشطر واحدة فى الفصل, و انا و هو بقينا اصحاب. كانت تيجى الفسحة و ولاد فصلنا يتقسموا فريقين. فريق معايا و فريق معاه, نلعب بكرة التنس الصغيرة. كل واحد يرميها لفريقه بايده من غير ما الفريق التانى ياخدها.وكل حاجة مسموح بيها, ضرب, عض و شد شعر. تلاقينا بنجرى زى الطرازانات و نطلع على الزحليقة اللى فى وسط الحوش و نرمى الكرة من فوقيها. و قمة الخبث, لما ما يبقاش حواليا حد من فريقى, اخبى الكرة تحت القميص و البلوفر, و لو سألونى عليها, اديهم اكتر ابتسامة بريئة عندى و اقولهم " ما اعرفش" , و اول ما ابعد و اكون فى منطقة امان, اطلع الكرة و ارميها, و نكمل لعب
بعد شوية البنات عازوا يلعبوا معانا, بس حاولوا يطلبوا فريق للبنات بس, قمت انا اديتهم محاضرة المساواة بتاعتى, و حطيت ايدى فى جنبى, و بعندى اللى هم عارفين انهم مش قده, قلتلهم " انا مش هاتخلى عن الولاد بتوع فريقى" . فى الاخر البنات استسلموا و بقوا بيلعبوا معايا انا و الولاد
على خامسة ابتدائى , كنا بنلعب كرة قدم مع بعض بنات و ولاد (بس كل بنتين يحرسوا مرمى واحد). كمان الولاد كانوا بيلعبوا معانا اللعب اللى كانت تعتبر بتاعة بنات بس, زى الاولى و اللعب اللى بالتصقيف و الغنا, و لعبة اسمها تتجوزينى
على اولى اعدادى كنت انا دخلت فى دور البنت اللى بتسرح شعرها, و تكوى القميص, و تمشى بالراحةو تفرد جيبتها و هى ماشية , قال عاملة فيها انسة بتمثل فى فيلم....ملل و الله
اكيد كنت الطف و انا شوارعية
:)
غزال غزال غزال
كنا بنلعب تحت الشجرة بتلات صوانى
نط علينا بوليس الحارة بتلات عساكر
اولهم بيقزقز لب
تانيهم لابس مينى جيب
تالتهم ماسك عصاية, عصاية طويلة
طويلة عريضة
من هنا للجيزة
من الجيزة لشبرا
من
....

هناك ٢٥ تعليقًا:

4thH يقول...

ايه الاحترام اللي كنتم فيه ده ؟؟ انتي استفزتيني احكي عن ايام مدرستي .. متهيالي سمعتي انتي جزء منها قبل كده
..
بس ايه لعبة تتجوزيني دي ؟؟

غير معرف يقول...

تتجوزينى ديه هى نفسها
voulez vous dancer madame?
?

Dananeer يقول...

تسريحه النخله
جامده يا معت
بجد انا استمتعت بالذكريات و الرسومات دى جدا
".

monasosh يقول...

هيثم
اهلا بيك فى بيتنا المتواضع
معلش يا سيدى, كل واحد على قده !! انا سمعت جزأ من حكاياتك اه, و اكيد ما اقدرش انافس المستوى ده من التشرد. يا عم ده شغل عصابات اللى انت حكيت عنه
لكن بذمتك, عمرك لعبت تتجوزينى, او غزال؟؟
:)
anonymous
اعتقد ان هى نفس الفكرة, بس انتوا كنتوا بتسألوا على الرقص, و احنا كنا سابقينكم و بنكلم على الجواز

Dananeer
دايما انتى من اوائل الناس اللى بيعلقوا لما اكتب حاجة جديدة. بانبسط بيكى اوى
شوفتى تسريحة النخلة , اغراء مافيش زيه :)
ممكن اعملها قريب للشخص اللى باحبه, اكيد هينبهر

غير معرف يقول...

ياعيني يا عيني علي الذكريات

بس انا بيتهيالي انك لسه بتنكشي شعرك لحد دلوقتي

:P

ايه لعبه تتجوزيني دي يا بت انتي ملعبتهاش انا قبل كده انا لعبت الاولي دي كتير قوي زمان

وبعدين تعالي هنا انتي مبتذكريش لييه؟؟ العيد خلص خلاص قومي اجري زاكري يالا عندك امتحانات

غير معرف يقول...

hwa ana fe madrasa banat bas mafish far2:
ya3ni e7na kona benel3ab "voulez vous danser madame?"_ bas kona benet5ane2 3ala min el-walad we min el-bent.
we kona benel3ab kora bas el-far2 eno gon handball( so3'ayar) we 5 banat beyo2fo 7ares marma.

mesh far2a ketir, mesh darory welad 3ashan teb2y shwar3aya

حـدوتـة يقول...

تسريحة النخلة!!! يااااه! إزاي أهالينا كانوا بيسيبونا ننزل المدرسة بالمنظر ده؟؟ ده أنا عندي صورة عاملة فيها 3 نخلات في شعري مش نخلة واحدة بس :))

يخرب عقلك يا معت...كنت هاموت من الضحك بسبب التدوينة دي دلوقتي :) لإني عندي دور برد رهيب وكل ما أضحك أقعد أكح...بس والله ولا همني...قعدت أضحك وأكح وأدمع :))

فكرتيني بيا أوي...أنا كنت متشردة جداً كده برضه وأغلب أصحابي كانوا أولاد...وتخيلي كان عندي وليد برضه بأجري وراه وأضربه طول الفسحة!

ربنا يسعدك :)

آه صحيح...دورت على إيمايلك علشان أبعتلك ما لقيتهوش...ابعتيلي إنتي :)

أحمد يقول...

"بعد شوية ابديت اتعرف على بقية ولاد الفصل. عدينا الاول بمرحلة ان كل ولد مقتنع انه وقع فى غرامى- عادى بتحصل مع كل بنت جديدة على الفصل- اقوم انا بهدوء و حكمة اشرحلهم ازاى باعتبرهم كلهم زى اخواتى, و ازاى انا اطول منهم كلهم,"

حضرتك دا وانتى في رابعة ابتدائي
كان الولاد عندهم مشاكل، عاطفية، وانت بتحليها

اشمعنى انا اللى بحس دايما ان كل تاريخي قبل ثانية اعدادى ممسوح

sofinqoraso يقول...

ياااااااااااااه
احلى ذكريات لأحلى ايام
والله فكرتينى بطفولتى
بجد كانت ايام من عمرنا
ربنا يجعل كل ايامك سعادة

karakib يقول...

ضحكتيني :) لذيذه ذكريات المدرسه دي

ماشى الطريق يقول...

أنا فاكر لعبة الأولى دى
بس أنا فاكر إن إحنا الولاد كانوا بنلعبوها أكتر من البنات فى المدرسة
وكمان كانت إسمها سيجا
الرسومات الكروكية دى لذيذة جداً
:)))))))
تدوينة لذيذة جداً

hurricane_x يقول...

best times..no hatred
just pure kiddy love!
cute drawings :)

frozen love يقول...

b7b elzkryat we elayamde..we wsfk we 2slobk gamel awy

t7yaty

Ghada يقول...

إنتي سكرر

وقعت على ظهري من الضحك لما قريت البوست، ولما قريت تعليقك على تسريحة النخلة فطست تماما :))

أنا ماكانش عندي نخلة.. كانت ماما تعمل لي تسريحة القرون المتعددة.. ضفيرتين من قدام مشبوكين بضفيرة من ورا.. كان شكلي بنت ناس.. لو اتغاضينا عن الشراب الأبيض اللي بيبقى مطين آخر اليوم والفناكيش اللي بتطلع من الضفاير.. كنا نعز بلاك شوز ولعبة أي قوي.. عيال سادية!

فكرتيني بالتشرد الأطفالي.. كانت أيام :)))

عاوزة أشكرك على البوست ده.. سبب لي حالة انشكاح فعلا :))

Elsede3' يقول...

didnt i tell u that i love ur drawings???
they're awesome
walawen elbent elly betel3ab 2oola mesh 3aref bezabt heyya beta3mel eih, bas they're cute :)
fakarteeny be ayam makonna benel3ab teero
ella sa7ee7 eih heyya tetgawezeeny aw voulrz vous dancer???
noshkor anonymous 3al tawdee7 el3azeem da tab3an

monasosh يقول...

شيماء
يعنى باحاول اضحك على الناس و اديهم انطباع ان انا كنت منعكشة زمان بس دلوقتى باسرح شعرى و مش منعكشاه...بوظتى كل الخطة
:(
ممكن طبعا ادعى انى ما اعرفكيش و ولا عمرى شفتك :)
ادينى اهو باتنيل اذاكر, مش لازم تقطمينى

يا ستى لعبة تتجوزينى دى هبلة اوى, بنقف صفبنات و و لاد (او بنات بيمثلوا ولاد) يعدوا على واحدة واحدة و يطلبوا منها الجواز, و هى تقبل, او تلف ضهرها ليهم علامة الرفض
تقريبا الولد اللى بيتبقى من غير جواز بيجرى من بيننا و يتضرب
:)
مش عارفة ايه اللى كان بيعجبنا فيها

anonymous
احنا كمان كنا بنخلى البنات يبقوا ولاد لحد ما الولاد ابيدوا يلعبوا معانا
اكيد مش لازم ولاد عشان تبقى شوارعية, انا كنت شوارعية كدة من غير اى حاجة
:)

monasosh يقول...

رحاب
سعيدة جدا بتعليقك عندى
كل واحد على قده , انتى كنت بتعملى 3 نخلات, انا شعرى كان يا دوبك يكفى اعمل نخلة واحدة
سلامتك الف سلامة. بس انا مبسوطة انك ضحكتى عندنا
:)
الله يمسيهم بالخير مطرح ماهم, الوليدات و المحمودات بتوع الدنيا دى
:)
هابعتلك ايميل حالا

احمد
معلش الحوت الحمر تلاقيه كان وراه حاجات اهم و هو فى رابعة ابتدائى
و بعدين تانية اعدادى مش متاخر اوى, لو كان تالتة اعدادى كنت اقولك : اقلق على نفسك
:)
اجدع سلام لمواليدك يا تمانينات

monasosh يقول...

sofinquraso
ربنا يملالك كل ايامك سعادة
مش عارفة اذا كانت اخلى الايام هى الطفولة. كل فترة و ليها طعم
اما مبسوطة فى الفترة دى مثلا
الاكيدان احلى حاجة انك تسترجع ذكريات الطفولة, و اى فترة حلوة عدت عليك

كراكيب
افتكرتك بعد نشر التدوينة دى على طول, كنت مستنية تعليقك عشان اعرف انك قريتها, بما انك كنت من اكبر مشجعينى فى تدوينة على
سعيدة بانى ضحكتك
انت عارف احنا فى الخدمة دائما

ماشى الطريق
سعيدة بان التدوينة عجيتك, و الرسومات على الاخص
:)
انا عارفة لعبة سيجا, كنت بالعبها فى الشارع و انا صغيرة, بس الاولى لعبة مختلفة و متعارف انها لعبة بنات
هى فيها رم زلطة, و الحجل على رجل واحدة من مربع للتانى عشان تجيب الزلطة من غير ما تدوس على الخط

بعد كدة اتطورت و اتضاف ليها حاجات زيادة
كنت باحب اللعبة دى اوى
لحد دلوقتى و انا كبيرة, لو ماشية فى حتة و لقيت بلاط مربعاته كبيرة, انط عليها كأنها مربعات الاولى
hurricane_x
hehe i love the drawings, i even enjoy it when i do them :D
thank u for ur comment, and welcome anytime...i specially welcome those who encourage my artistic side >>>those compliment my drawings :)

monasosh يقول...

frozen love
دايما كلامك عندى بيبسطنى
تحياتى ليكى

ghada
ربنا يسعدك على دعواتك و كلامك الحلو ده
انبسطت اوى اما لقيتك علقتى عندى
مت على نفسى من الضحك على تسريحة القرون المتعددة. غالبا ماحدش عمالهالى عشان شعرى كان قصير اوى
انا كمان كنت بالعب بلاك شوز...عمرى ما حبيت لعبة اى’ مع ان حتى اما كبرت, اصحابى كانوا بيحبوها, و كانوا بيفتروا على ايد بعض
ايه حب التعذيب ده
:)
شفتى , قولتله هاعملك تسريحة النخلة, قاللى مش هتبقى نخلة هتبقى اشجار استوائية
تفتكرى ما عجبتوش الفكرة :)
تحياتى ليكى

sede3'
my friend...long time no read :)
hehe glad u loved my drawings...yeah the girl looks quite strange i know, but i am still working on my style :P , see , atleast now i can draw such complicated pctures with the mouse:)
u know, when u left ur comment, i was online then, i was going to reply but then i thought "nah, we'll just strt another of those blog-chatting" and i really had to study then
:)
happy to have u here 3alatool

Elsede3' يقول...

:|
i dnt turn comment spaces into forums, 3AAAAA. well, i sometimes do
bas next time wen u're online, dnt hesitate. do it, and i'll do my best not to start a forum :D

Elsede3' يقول...

sa7ee7
awel marra aktashef ennek katba kalam souad massi
tab be hathehy elmonasaba
mayenfa3sh tes2alelna ostaz sherief naguib gab el lyrics meneen???
3ashan 3ayz le ba2eet ela3'any

Elsede3' يقول...

sa7ee7
awel marra aktashef ennek katba kalam souad massi
tab be hathehy elmonasaba
mayenfa3sh tes2alelna ostaz sherief naguib gab el lyrics meneen???
3ashan 3ayz le ba2eet ela3'any

monasosh يقول...

i think he figured out the lyrics by himself
Anyway, i don't Sherif Naguib, but we can ask him on his blog

happy as always to have u 3andena
:)

غير معرف يقول...

أنا أحسدك
أنا أحسدك
أنا
أ
ح
س
د
ك

غير معرف يقول...

أنا أحسدك
أنا أحسدك
أنا
أ
ح
س
د
ك