مشوار طويل
رحلة مليانة احباطات و وجع و غضب, بس كمان لحظات دافية و تناتيف ملونة هتفضل مرافقاني باقي العمر
وجعت ناس كتير في السكة
بغضبي لما مالاقيتش معاهم خيالاتي
بحربي مع نفسي عشان ما اتخلاش عن الحلم
بثقل ذكريات مشارح و محاكم أنا نفسي ماكنتش عارفة اتعامل معاها ازاي
بمعافرتي مع الدنيا عشان ما استسلمش لفكرة " الحب بطبعه مرهق"
و وجعتهم بقسوتي في صنع النهايات
اسفة عن أي وجع اتسببت فيه
اسفة لو وجعت أي حد بقصد أو من غير
في لحظات كنت باحس كأن روحي بتتآكل
محاولات التمسك بأسطورة الحب أوقات كانت أقرب للهلاك منها لخفة الفراشات
لكن رغم كل ده لازم اعترف اني فعلا محظوظة ... جدا.
محظوظة بطاقة الحب اللي غمرت حياتي
محظوظة بقصص ما اكتملتش لكن شكلت البنت اللي بتكتب دلوقتي
محظوظة بقصص حب شوفتها حواليا بتكبر و شجعتني أطارد خيالاتي
محظوظة و ممتنة بكل حد مساراتي تقاطعت معاه و لمس روحي و لو لوهلة
و محظوظة ان آخر الطريق ده يستقبلني حب بالبساطة و الخفة دي
حب تكتشف انه كان معاك خطوة بخطوة بقاله كتير بس انت كنت خايف تصدق انك وصلت آخر الخط
حب من اللي يدوب قلبك كل مرة عينك تقع عليه, كأنه ابنك, كأنه سناء, حتة منك
حب من اللي يخليكو تتناقروا على أسامي العيال, و على أماكن السكن, و ترتيبات الجواز, بس انت و هو عارفين ان كل دي تفاصيل, المهم ان كل يوم هيجمعكو حلم واحد
عارفين في قصص ميكي و بطوط أما بعد مشي كتييير يوصلوا ليافطة مكتوب عليها "نهاية العالم" ؟
أنا وصلت هناك و لقيت مكتوبلي
"اللانهائية و ما بعدها"
:)
