غزل اليمين الأزرق

صديقي

لا تخدع نفسك بأنك في مأمن من تعويذاتي

فانا و انت نعلم, في عالم أخر ,في مكان هادئ بعيد, أرقد بالقرب منك,  تشاركني صمتك, و أشاركك قصصي التي لا تنضب.

أبتسملك, فتدفع رأسي برفق نحو كتفك و تمرر أصابعك بشعري.

أتنهد فتضحك و تتنفسني أكثر بداخلك

في عالم أخر, تتهاوى كل تلك الحواجز بيننا: هفواتي و تحفظاتك. عالمك المظلم و عالمي الملون, هدوءك و نفاذ صبري. 

و يبقى فقط ثلاثتنا: أنا و انت و فراشتنا الزرقاء

تدوينات مبتورة

خواطر و تدوينات غير مكتملة عن حبيب لم يكن الا في خيالي 

 29 أغسطس 

أترنح بين أمواج تذيبني و أوجاع تثقل قلبي

يوم ما في سبتمبر - رأس صدر

قعدت على البحر و تخيلتك, مش حاضنني, ولا قاعد جنبي و ماسك ايدي

بس قاعد جنبي, كتفك يادوب ملامس كتفي, بتتفرج معايا على البحر و هو بيحضن الشمس

مبتسم ... و أنا بادوب أكتر و أكتر

23 سبتمبر

كل فترة بتنتابني نوبة عياط

5 أكتوبر

" أنا من صغري باحب أحب" 

8 أكتوبر - دهب

كالحلم

جميل انت كفنجال قهوة بمصاحبة صوت فيروز

كفراشة تتلون أجنحتها بألوان الحب

كموسيقى أميللي

كلمسة أم تتحسس حركة جنين في بطنها

كجامعة القاهرة

كصمود أم أمام أسوار معتقل ابنها

كابتسامة أب يرى ابنه الوليد لأول مرة

كمداعبات أمواج البحر لأقدام حافية

8 أكتوبر - دهب

الان تبدأ قصتي

ان أردت, أستطيع أن أسرد بداية يغلفها السحر: مصادفات و لحظات جمعت أثنين قررا في صمت ان يتشاركا فنجال قهوة الصباح لباقي العمر.

أو أحكي أن البداية كانت رسالة, و لحظة شجاعة تلبستهما في نفس الوقت دون اتفاق

أي قصة و أي بداية دائما لها مدخل يضفي عليها سحر يجعلها من أساطير الحب, لكنني لا أهتم

السحر كل السحر في أن قصتي بدأت بابتسامته.

22 أكتوبر

بعد اللي باحبه شغل بالي

ولا شافش حبيبي اللي جرالي

أخطأت حين تصورت أن أعظم ما قدمتله لي الثورة هو صمودي في وحدتي

أخطأت حين ظننت أنني حين وجدت نفسي ,فقدت الحب و الأحباء

خلف صفوف من المدرعات, و البيريهات الحمراء, و مئات من أسرى العسكر, كان الحب ينتظرني

كان لابد لي أولا أن أسلم نفسي لأوجاعهم. أن أحفر أسماء كل عمرو و كل بدر و كل محمد على كفي. أن أحمل عن أم احمد بعض من الثقل  و أشاركها بعض الدموع.  كان لابد لحزنهم أن يعتصر قلبي ليرق فينفذ حبه الى كل ثناياه

2 نوفمبر

اعتراف

قلبي وجعني

22 ديسمبر 

تمت

الرحمة

لو طلعت كل الوجع اللي كتمته خلال السنة اللي فاتت مش هتعرفوا تتنفسوا
من فضلكو أرحموني !
Sent from Mona's BlackBerry® from mobinil

الحزن

ساعات بيبقى الحل الوحيد انك تبطل تقاومه, تستسلم له جايز تبقى الرحلة بصحبته أهون.

خسارة

من يومين كنت هاكتب عنك تدوينة كلها ألوان. عن التفاصيل اللي تاهت مننا في زحمة الاعتصامات, عن التناتيف الحلوة , عن شمس و بحر و درويش و خاتم و كوباية شاي. 

خسارة
خسارة ان الكائن المبهر اللي قابلته يبقى مكانه الشخص ده: بارد و قاسي و مصدر للاحباط
خسارة ان يبقى عادي أسمع الأغنية دي من غير أما أحس بنغزة في قلبي, او حبة حنين
خسارة أني أجي أكتب عنك و كل اللي يطلع مني هو

و تفضل لمستك الخاصة في كل لحظة مختلفة و منورة في حياتي هي انك تجسيد ل " الندالة"

قصة عمرو : تمت

سجل يا زمن: 20 فبراير 2012 الساعة 1:31 ص عمرو البحيري رجع بيته في وسط أهله

بضحكة بتزغزغ كل خلايا جسمي باكتب اخر سطور في القصة

النهاردة زي كل قصص الأطفال, و رغم كل الوجع و التفاصيل المؤلمة, قصتي مع عمرو انتهت بنهاية سعيدة.

عمرو رجع في وسط أهله و ناسه. 

توتة توتة رغم العسكر انتصرنا في الحدوتة :)

على الهامش: ستو كان نفسي جدا تبقي معايا في اللحظة دي. أتمنى تبقي شايفاني من فوق و بتبتسميلي و انتي راضية عني. وحشتيني.

امتى يا بكرة تجيني قوام

ساعات بابقى نفسي أسرع الوقت, مستعجلة على بكرة, عندي قصص كتير عايزة أحكيها لأولادي و خايفة أنساها

الحرية على بعد خطوة ... عمرو

عمرو البحيري

بداية معركتي مع المحاكمات العسكرية

بداية قصة بانقش تفاصيلها في كف ايدي عشان أحكيها لولادي 

النهاردة قبل أما يختم سنة كاملة في السجن ظلم, اتحكم عليه ب 6 شهور سجن و لأنه قضاهم و زيادة كمان فهيخرج خلاص

نفس طويييييييل و نكمل 

الحرية لكل عمرو في السجن بسبب ظلم العسكر 

يسقط يسقط حكم العسكر 

صباح الفل

بقالي كتير ما صحيتش على نور الشمس

بقالي كتير ما صحيتش على فراشات بتهمس في ودني و قلب خفيف.

و انا بانزل رجلي من على السرير في دماغي رجلي بتلمس رملة دافية و البحر على بعد خطوتين

الثورة مرهقة

خلاط مشاعر و تجارب. كأني عشت أ كتر من حياة, خبرت الحب و الخسارة و الألم, شفت الموت, و عرفت كل ألوانه. لون الدم و الكفن و لون دموع حد اتخطف منه حبيب في لحظة غدر.

بس برغم كل الوجع ده لسة خيالاتي زي ما هي

حب يغمرني بالزبدة الدافية

عيال كتير تشبهني و تشبهه بتجري حافية على البحر و بتضحك للشمس

معمل استخبى فيه بالساعات و أنا بدندن و باشتغل على مزاجي

قهوة الصبح نتشاركها في حضن دافي زي الشمس

حواديت كتير, و خيالات

برتقان و برقوق و شوكولاتة بيضا و موسيقى و رقص, و مداعبات, جنان و زعيق, دلع و مياصة 

كل حاجة ... سعادة و حب بمنتهى الطفاسة

و أهم حاجة, ضحك كتير, ضحك من اللي يزغزغ كل تناتيف جسمنا

صباحكو فل :)

شكرا

للحب أوجه عدة, أجملها : المفاجأة

صديقي
شكرا لتذكرتي

كيف تفقد الايمان بالحب و انت في وسط ثورة !

حبيب

بين الكف و الكف دعسوقة صغيرة تتبع مسارات أصابع حبيب 

بين العين و العين, نسمة هواء خفيف تذكرني بأنفاسه

فوق حاجبي الأيمن تنميلة تحمل صدى لمسة خاطفة

في أعلى البطن فراشة على وشك الاحتراق

على الجبين طبعة قبلة

و على الخد ملحه امتزج بملحي و هو يهمس بحبه قبل أن يختفي

فراشة

فراشة احتلت الجزء الأعلى من بطني خلسة و بدفئ وعودها اغتويت

شئ ما يدفعني للتمسك بها، لمراقبة تغير ألوان أجنحتها، لنتشارك عوالمنا و نرسم معا دروب و قصص

لكن صوت صغير و حاد يذكرني

بعض الأحلام وجدت لتجهض قبل ان يداعبها النور

Sent from Mona's BlackBerry® from mobinil

كفاية

و النبي يا رب كفاية

و النبي يا رب ماتخليش موت أصحابنا خبر عادي

قلق

أتمنى تكون بخير

بعتلك فراشة تدور عليك و تطمني