يلعن تاريخك!

لو على شمالي فراشة بتعاكسني و بتحاول تستدرجني لحب جديد

و على يميني صفوف من العساكر و المدرعات و البيريهات الحمرا

بدون تردد و بخطى ثابتة هامشي ناحية اليمين. 

ده اللي انت عملته فيا:

بقى أخف على قلبي مائة مرة أروح اواجه بياداتهم و لا اني أستسلم لغواية الحب تاني!

خسارة

ساعات بابقى عايزة أروح بس اسألك

فعلا ده اللي انت عايزه؟ كل الغضب الأقرب للكراهية ده يبقى هو اللي فاضل ما بينا؟

بعد اما كان اسمك ترنيمة بيقى لما ييجي قدامي ادعي اليوم يعدي على خير

و بعد اما كانت الموسيقى تجمعنا, اسمع أغانينا و ماحسش بشئ

و اما قلبي يحايلني بلحظات  لينا منورة, نغزة في بطني تخبطني و تفكرني بندالتك

بدل اما نحافظ على عالم سحري ملون خطفناه من الزمن, بدل اما يفضل جوايا ركن دافي مستخبي حافظة فيه كل تناتيفك عشان أما اشوفك بالصدفة أضحكلك من قلبي, أضحكلك و أفكرك بفراشتي اللي معاك في كل مشاويرك.

بدل ده كله اخترت الغضب؟!

أخاف أن تنام في قلوبنا جراحنا ... أخاف أن تنام !!

                                                      درويش

لعنات مونيتا

لعنة "داهية تاخدك يا بعيد"

في ناس ما يستاهلوش غير أستيكة, تمحي كل لحظة لهم و تسيب مكانهم فراغ في الذاكرة.  حتة كدة طراوة و هوا بدل السواد اللي كانوا سايبينه

لعنة "اتوكسوا" 

الواحد يكبر على أساطير عن الحب اللي يتخطى كل الصعاب, و يقهر كل الأعداء, و يدمج عوالم و يملا الدنيا سحر

بعدين بقى ييجي واحد يقولك " أصل انتي انسانة زيادة عن اللزوم"

و التاني يقولك " أصل احنا مختلفين زيادة عن اللزوم"

 طب ايه! ماتنوروني كدة و تحكولي عن المعايير العملية اللي ينفع معاها تحقق أسطورة!

لعنة " الله يحرقكو يا مجلس رمم واحد واحد" 

الأرق مش سايبني بقالي أسابيع

أصحابي بيحلموا انهم بيتقبض عليهم و بيحاولوا يتصلوا بيا

الناس لما تشوفني في خروجة تفتكر في حد اتحاكم عسكري

كمان شوية هيبقى في خيالي صوت الراوي لحياتي الرويني

حياتي الشخصية اتفشخت من ساعة البيان رقم 22 بتاعكو يا رمم

لعنات

عزيزي

انفجر شئ بداخلي مطلقا سراح كل لعناتي المكبوتة

فلعنت ماضيى و ماضيك
لعنت غموضك و لعنت ترقبي
لعنت الحر
لعنت كلية العلوم
لعنت اشتياقي لك
و لعنت تنقلي بين البيوت
لعنت كل اختياراتي السابقة
و لعنت كل اللحظات التي اضعتها على مطاردة احلام مستحيلة
لعنت انتظاري للكلمات و شعوري بالامتنان عند تلقيها
ولعنت كل من اذوني
لعنت نفسي
لعنت كل الاغاني التي لم ارقص عليها
لعنت عقلي الضئيل
لعنت الطفلة بداخلي
لعنت كل من لم يبتسم في وجهي عند اول لقاء
لعنت انبهاري بك
لعنت تشبثي بالحزن
لعنت الاقدار على تلاعبها بي
ولعنت اللون الاصفر

لعنت كل تلك اللعنات
ثم غمرني الارهاق
فلعنته هو ايضا

لقد حلت عليك اللعنة

ان كنت تظن ان بقاءك بعيدا عنى يحميك من لعناتى
غدا ستكتشف كم كنت ساذجا