عشان نكمل, لازم نحتفل

قريت التدوينة اللي كتبتها يوم 24 يناير بالليل, و انا بافتش جوايا عن أسباب أدعو بيها الناس لنزول الشارع يوم 25 يناير, و ابتسمت.

وقتها كتبت 

"اتمنى نعيش الثورة بس خايفة ما نلحقهاش. لكن اللي متأكدة منه ان كل واحد مننا لازم يعيش اللحظة دي, اللحظة اللي بيبقى ماشي فيها كتفه في كتف واحد او واحدة مايعرفهمش بس همهم واحد , بيهتفوا بصوت واحد و مصدقين ان البلد بلدنا و ان خلاصها بايدينا."

يااه! من 3 شهور كنت بأقول اتمنى نعيش الثورة. من 3 شهور كان املي نمشي في شارع و نهتف و نعيش للحظ احساس ان البلد دي بلدنا. من 3 شهور كنت خايفة الثورة تفوتني, و دلوقتي الثورة بتصاحب كل لحظة باقضيها في يومي.

ازاي سبت الارهاق ينسيني؟ ازاي سبنا الارهاق ينسينا كلنا ننبسط و نفخر بكل اللي حققناه و اللي لسة هنحققه؟

لازم نحتفل... نحتفل بكل انتصارتنا صغيرة او كبيرة.

نحتفل باننا قضينا على أسطورة طاغية بدأت من قبل اما كتير مننا يتولدوا أصلا.

نحتفل بان البلد رجعتلنا, و ان كل الميادين بقت بيوتنا. 

نحتفل باننا عشنا و اتعلمنا أهم درس, ان القوة في الشعب. الشعب بس هو مصدر كل حاجة حلوة و كل انتصار في الثورة دي.

نحتفل بشهداءنا و بجرحانا و بكل واحد مننا برغم المخاطر فضل في الميدان.

نحتفل باول يوم ملينا الميادين عشرات الالاف, و مئات الالاف, و مليون, و ملايين.

نحتفل بالأصحاب اللي اعدنا اكتشافهم و اصحابنا اللي اكتسبناهم في الميدان.

نحتفل بكل غريب ابتسم في وشنا او شاركنا لقمته, بكل بنت و ولد و راجل و ست جريوا و ساعدونا لما وقعنا, عطشنا او استشنقنا غاز مسيل للدموع.

نحتفل بالمستشفى الميداني, و اللجان الشعبية, حلاق الثورة, و فشار الثورة كمان!

نحتفل بالبصل و ازايز المياه اللي اتحدفوا علينا من البلكونات في كل منطقة مشينا في شوارعها نهتف " الشعب يريد اسقاط النظام".

نحتفل بأن هوس كرة القدم بتاعنا جابلنا الألتراس الجدعان .

نحتفل بان في اكتر اللحظات وجع و حزن فاجأنا نفسنا بنكتتنا و بروحنا الحلوة. 

نحتفل باننا لسة بنحارب و نقاوح: بواقي النظام, انتهاكات الجيش, الفجوة الدستورية, الفجوة الأمنية و اي فجوة تانية يخترعوهالنا.

الثورة مستمرة, الطريق قدامنا طويل, هنحارب, هنتلخبط, هنفترق و هنتجمع تاني بسرعة. ومن وقت لتاني هيخبطنا الارهاق, هناخد نفس و نسترجع انتصارتنا و نخطفلنا لحظة ننزل الميدان نحتفل... عشان نكمل.