علاء اللي هم ما يعرفوهوش!

في كل قصة جديدة عن ظلم العسكر دايما بأدور على تفصيلة تخليني أتبنى الموضوع بشكل شخصي. حاجة صغيرة تشبك وجعهم بوجعي و تخللي معركتنا واحدة. 

المرة دي مش محتاجة أفتش على تفاصيل  لشخصنة القضية. المرة دي القضية مني, و الوجع محبوس جوايا:  أنا منى سيف أخت علاء عبد الفتاح.  أخويا في السجن ظلم!

ماما بتحكيلي ان أول ما اتولدت هو قرر ان أنا بتاعته.

 كان بيقعد يستقبل الضيوف اللي جايين يشوفوا المولود الجديد و يقولهم بكل ألاطة " أتفضلوا استنوها, النونو لسة نايمة"
و كمان بتحكيلي اني كنت دايما انا و هو ناقر و نقير, لكن أول ما حد يدوسله على طرف أتجنن و اتحول فجأة لمحامية بتدافع عنه.

أخويا علمني التمرد من و أنا صغيرة.
أول مرة شاركت في مظاهرة كانت مظاهرة بقيادته. كنت في تانية ابتدائي, و مدير المدرسة قرر يقفل علينا البوابات عقابا للطلاب كلهم على حاجة ضايقته. مش فاكرة التفاصيل, بس فاكرة ان أخويا و أصحابه عملوا مظاهرة, و فجأة كلنا كنا بنتظاهر و بنطالب بفتح البوابات عشان نروح. و نجحنا وفتحوا البوابة و كان ده أول انتصار ليا على تعسف السلطة :)

المضحك كمان ان من أول الحاجات اللي علمني أتمرد عليها هي شرب السجاير. مش ان أنا أتمرد و أشرب سجاير, بالعكس أن أنا ما أشربهاش. 

ماما و بابا بيشربوا سجاير بشراهة. و من صغري علاء معلمني ان دي حاجة " يع جدا " و مش حلوة. قاللي حاجات كتير على انها مضرة بالصحة و بتضيع الفلوس, بس اللي أنا فاكراه كويس انها كانت فرصة للتمرد على أهلي. علاء اتفق معايا ان احنا نرفض نشتريلهم سجاير, أو نجيبلهم السجاير و الطفاية لما يبقوا بعاد عن متناول أيديهم. و فضلت دي لعبتنا و أنا صغيرة . بابا يقوللي " اشتريلي علبة سوبر و انتي تحت يا منى" و أنا أرد عليه بكل تحدي " لا يا بابا , احنا ضد السجاير" :)

اللي بيتكلموا عن أخويا و يتهموه بانه شمام, أو انه خاين, عمرهم ما أدوا نفسهم فرصة يعرفوا أو يفهموا علاء الحقيقي.

عمرهم ما شافوا علاء اللي أول ما قرأ عن الشهيدة أميرة عيط لأنه شاف فيها أخته الصغيرة سناء, و اتوجع.
عمرهم ما شافوا علاء اللي قابل منال و هو عنده 15 سنة, و حبوا بعض و من ساعتها الحاجة الوحيدة اللي فرقتهم مرة كان ظلم مبارك, و المرة دي ظلم جنرالات مبارك
عمرهم ما شافوا علاء الأخ اللي اخته الوسطانية  قعدت سنين تتمرد على وصفها ب " أخت علاء" و أما خلال الثورة انقلبت لأوضاع و الناس بقوا ساعات بيشيروا له ب " أخو منى " كان رده انه فخور بالتسمية دي.
عمرهم ما شافوا علاء اللي كان مقرر هو و منال ما يخلفوش عيال في بلد قاسية زي دي, رغم حبهم للأطفال, لكن يوم تنحي مبارك أعلنوا للعائلة أنهم قرروا يخلفوا. لو ولد هيسموه خالد على اسم خالد سعيد, و لو بنت هيسموها سالي على اسم سالي زهران.

عمرهم ما هيفهموا يا علاء , لا  العسكر, ولا سبايدر, و لا حنان خواسك, ولا محمد ماهر ولا مرتضى منصور ولا أي حد من اللي تخلوا عن ضمايرهم على أعتاب ميدان التحرير. اللي يقرأ كلامك و ما يتعرفش على الانسان اللي ورا الكلام, يبقى مش عايز يفهم و أختار الضلمة و الظلم و هو مفتح عينيه.

يا مينا، مصر الميدان هشة ممكن رصاصة واحدة طائشة تطيح بها.. يا مينا، مصر الميدان قوية ممكن حضن واحد ينقذها.. يا مينا، فى حضرتك فهمت تعاليم الأنبياء، متى يفهم العسكر؟

منى - أخت علاء

7 نوفمبر 2011

في السجن اللي خارج أسوار طرة