انك تكوني بنت في بلد زي بلدنا دي حاجة مرهقة.طريق طويل مليان احباطات و ضغوط من ناس كتيرة , رجالة و ستات؛ الطرق المحددة اللي مقبول ان البنت تعبر عن نفسها بيها, التوقعات المستمرة لسلوك معين, القوالب اللي من خلالها الناس مستعدة تقبل أحلامك. و للأسف ساعات احنا نفسنا البنات اللي بنمارس القمع علينا و على أحلامنا بس عشان تقل الضغوط أو عشان نتقبل من اللي حوالينا.
اما ابتديت تدوين في أكتوبر 2006ماكنتش متخيلة ان من خلال ماعت هيتوجدلي مساحة اقدر أفضفض فيها زي ماانا عايزة و اكتشف جوانب لنفسي كانت غريبة عني, بس المفاجأة الأكبر ليا كانت عالم البنات اللي مختلفين عني في حاجات كتير بس يشبهوني في انهم بيحاولوا يلاقوا نفسهم و يعيشوا أحلامهم في وسط مجتمع كتير من الوقت بيبقى قاسي عليهم.
شاركونا يوم 19 أكتوبر , شاركوا كل ليلى عايزة تحكي و يتسمعلها. عشان في يوم من الأيام و انا قاعدة حاضنة بنتي أقدر أقولها اني بجد حاولت أخللي الدنيا حنينة عليها شوية, و أحكيلها ان "كلنا ليلى" كان من الانتصارات الكبيرة لبنات صغيرين
1- بداية الفكرة
2- مقال عن أول كلنا ليلى
ليست هناك تعليقات:
إرسال تعليق