الأحد، مايو ٢٩، ٢٠١١

مدينة الحدائق


في الأفق أراه, يبتسم بوداعة و هدوء و يقبل جبيني بحنية, ثم يدفعني -برفق- بعيدا عن حزنه ... اعمق في أحزاني.

3أبريل 2011

الجمعة، مايو ٢٧، ٢٠١١

انا نازلة التحرير أنقذها مش أخربها


ليه الناس عايزة تكروت الثورة؟
ليه الناس عايز تكتفي بازالة الورم السرطاني و ماتكملش فترة العلاج الكيماوي اللي تضمنلنا عدم تجدد المرض؟
الثورة عايزة نفس طويل. الثورة مش عايزة كروتة.

يمكن تكون الفترة اللي احنا فيها دي مرهقة و كئيبة و تقيلة على قلبنا في حاجات كتير, بس لو فشلنا اننا نكمل الثورة دي و  نتتزع كل جذور النظام الفاسد السابق, لو فشلنا في ترسيخ حقيقي لمبادئ ثورتنا " عيش , حرية, عدالة اجتماعية" التاريخ هيشهد علينا لولادنا و أحفادنا و كل اللي ييجوا من بعدهم , هيشهد اننا أهدرنا فرصة الأجيال القادمة في "وطن"

انا نازلة التحرير أنقذها مش أخربها 

أنا نازلة عشان, كل الاعتصامات اللي الناس مصرين يوقولوا عليها "فئوية" لو ركزتوا فيها هتلاقوها امتداد طبيعي للثورة و مطالبها. هتلاقوا في الاساس بتطالب بتطهير الفساد من كل شبيه لمبارك,و توفير ضوابط حد أنى للحياة الكريمة لكل العاملين بها.
مش أحنا لما نزلنا الشارع يوم 25 يناير كان على رأس مطالبنا " حد أدنى للأجور" ؟ ليه بتطالبونا نتغاضى عن ده دلوقتي؟

أنا نازلة عشان كل المسؤولين اللي بيطلعهوملنا في الأعلام اللي شايفين ان الطريق لانتعاش الاقتصاد المصري و عجلة الانتاج, هو اننا نسامح الحرامية الكبار في سنين النهب و السرقة عشان يحنوا علينا و يستثمروا في بلدنا.
يا سادة , ده بدل ما تركزوا مع مطالب العمال و الموظفين اللي هم أصلا المسؤولين عن تشغيل عجلة الانتاج ؟

أنا نازلة عشان يا بلدي بعد اما مات فداكي و فدى حريتنا مئات و اتصاب الاف, لسة الناس الغلابة اللي مش مسنودة بتتسجن ظلم و الاعلام بيتجاهلها, لكن الناس المسنودة اللي عندها وسايط الظلم بيترفع عنها و الاعلام بينقل صوتها.

أنا نازلة عشان اطالب بالعدل.
 ليه المواطنين بيتحاكموا قدام محاكم عسكرية تفتقر لكل أسس و ظوابط الحق و العدل, و بيتحكم عليهم في بضع أيام, و رؤؤوس الفساد اللي خربوا و نهبوا بلدنا سنين بيتحاكموا بتباطؤ أمام قضاء مدني؟ لو واثقين في القضاء المصري المدني و ان هو اللي هيجيبلنا حقوقنا من كبار مجرمي البلد زي مبارك و العادلي, ليه مش كل المواطنين بيحاكموا قدامه؟

أنا نازلة عشان حق عاطف يحيى اللي اتضرب برصاص حي من الجيش في رسالة خاصة لتطييب خاطر اسرائيل
.دلوقتي عاطف راقد في المستشفى في انكار تام من متحدثي الحكومة لاستخدام رصاص حي, و تجاهل من قنوات الاعلام الكبرى.


أنا نازلة عشان حق عمرو البحيري, اللي دلوقتي بيقضي حكم 5 سنين في سجن الوادي الجديد على جريمة ماارتكبهاش, بس عشان احنا مش عايزين نقف قدام الجيش و نجبره على تطهير نفسه و محاكمة المسؤولين منه عن كل  الانتهاكات اللي ارتكبوها تجاه المواطنين


أنا نازلة عشان لما ولادي يسألوني أقولهم و انا ضميري مرتاح " انا عملت كل اللي أقدر عليه"

الخميس، مايو ٢٦، ٢٠١١

دليل الأمان مع جيش مصر الغلبان

عايز تبقى في الأمان, وزع المنشور ده


عايز تقضي يوم -أو اكتر- مع الجيش 
يبقى أنشر ده 




أو ده







الاثنين، مايو ٢٣، ٢٠١١

شاركنا... دَوِّن عن العسكر


لو ليك صاحب أو قريب أو اي حد تعرفه اتضرب في مظاهرة, من الجيش و هو بيفضها, اتهان في الشارع من ظابط جيش عشان الحظر, او اتضرب عليه نار عشان هتف ضد السفير الاسرائيلي. أو لو كنت انت اللي اتعرضت لده

لو  كنت واقف في اعتصام بتحاول تحمي ثورتك و شفت حد بيتاخد قدامك و بيتكهرب و يضرب و بعدين يتحاكم محاكمة عسكرية ظالمة و في ظرف أيام يتحكم عليه بالسجن.

لو كنت مثلت امام محكمة عسكرية مش المفروض انها اللي تنظر في أمرك, و في ظرف ساعات حكم عليك بالسجن مع ايقاف التنفيذ على جرائم لم ترتكبها.

لو كنت فتحت مرة التليفزيون المصري على القناة الأولى و لقيت صورة أخوك باين عليه اثار الضرب و التعذيب و تحتها كلمة "بلطجي"

لو كنت كل مرة بتقرأ بيانات المجلس الأعلى للقوات المسلحة بتحس انهم بيحاولوا يستغفلوك أوبيتهموك بالتسبب في خراب الاقتصاد, او بيوصفوك  بانك "مندس" و "فلول"

لو كنت حاسس ان المجلس الأعلى للقوات المسلحة بيحاول يجهض الثورة, و ان الاعلام بيلمع صورته زي ماكان بيلمع صورة النظام السابق

شاركنا و دَوِّن عن المجلس العسكري, بالكتابة, فيديو, صور, لف صوت, تدوينة, نوت على الفيسبوك....
ساعدنا نظهر حقيقة الدور اللي بيلعبه المجلس العسكري في تعطيل عجلة الثورة و التغيير, ساهم في التصدي للتعتيم الاعلامي على انتهاكات و افتراءات المجلس العسكري.

ملاحظات:

  • يرجى اضافة الوسم -تاج- Noscaf لاي تدوينة تشارك بها في اليوم
  • رجاء ارسال رابط لمشاركتك على تويتر و معه الوسم Noscaf#